Work from home

二〇一九年喺屋企做工嘅勞動人口比例

二〇二一至二〇二二年同一個氣候調查入面，大多數受訪者相信，再過二十年，大部分人都會為咗拯救地球而喺屋企工作。

美國海軍陸戰隊喺二〇一〇年開始容許遙距工作。

Work from home （WFH） 又叫 遙距工作、遠距通勤、遠距工作，同混合工作（部分遙距、部分返現場），係指唔喺 辦公室 或固定工作場所，而係喺自己嘅 屋企 或者 其他地方做嘢。

喺屋企做嘢其實已經有幾個世紀嘅歷史，不過大型僱主推行遙距工作，就係由一九七〇年代小規模開始，當時科技可以用電話線，透過啞終端，將分處各地嘅辦公室接駁到市中心嘅大型主機，作為一種網絡橋接（network bridge）。到咗一九九〇年代同二〇〇〇年代，配合互聯網技術，例如建基於雲端運算嘅協作軟件，同用視像通話進行開會，遙距工作就變得更普遍。二〇二〇年，因為新冠疫情嘅職場防疫措施，全球大量白領被迫快速轉為遙距工作，而呢個轉變喺限制解除之後，大致上都持續落嚟。

支持建立地域上分散式勞動力嘅人認為，咁樣可以減低維持辦公室嘅成本，畀員工更多自主同彈性，提升動力同工作滿意度，減少返工通勤對環境造成嘅破壞，亦可以令僱主喺更廣泛嘅地區搵人，同時畀員工搬去自己更想住嘅地方。

武漢肺炎疫情之後，遙距工作變得更加普遍，唔少員工一星期只會返辦公室其中幾日。為咗避免為閒置嘅辦公桌付出成本，企業因而更加依賴熱桌制。

反對遙距工作嘅人就話，遙距通訊科技始終未能完全取代面對面交流嘅好處，員工喺屋企更容易分心，又可能因為冇咗實體分隔而難以維持工作同生活平衡，而減少社交互動亦可能令人感到孤立。