X-bar 理論

X-bar 係由語言學家杭士基响一九七零年提出嘅諗法，最基本上主張無論係咩語言，一切嘅短語喺人腦入便都具有同樣嘅結構。簡化講，即係話好似分析樹嗰種做法，將句子拆做一截截短語，可以用於任何語言身上。

基本概論

睇埋：句法學同語句

根據認知科學嘅觀點，人喺腦入面組句子嘅過程，可以想像成

1. 由佢識嘅詞庫度，搵出佢想要用嗰啲詞語同形態素；
2. 將啲詞同形態素，按照佢用緊嗰隻語言嘅法則，組合埋一齊成 X-bar 噉嘅樣；
3. 最後將步驟二得出嘅句子，講或者寫出嚟。

深層句構

睇埋：生成文法

深層句構同淺層句構：生成文法上用到嘅概念；簡單噉講，認知科學會將人腦睇做識得做資訊處理嘅物體，腦入面會將諗緊嘅嘢組織做句子，然後再將句嘢講出嚟，例句

「阿明一拳打爆阿蟲塊面。」

「阿蟲塊面畀阿明一拳打爆。」

呢兩句嘢，講出嚟（喺語音同句法上）好唔同，但意思近乎一樣。某句嘢，實際上講出嚟嗰陣嘅樣係其淺層句構，而句嘢喺腦入面嘅語義表示就反映其深層句構。即係話上面兩句例句淺層句構唔同，但深層句構一樣，或者差唔多一樣咁滯。

腦部研究

睇埋：心理語言學

語境：有證據指，人腦聽人講嘢或者睇文本嗰陣，會自動噉判斷佢語法啱唔啱，例如語言學家做過研究，用腦電圖監察住受試者嘅腦電活動；佢哋發現啲人聽或者睇到一隻令到句子錯語法嘅詞（好似係下面句嘢噉），個腦會出現 P600 呢種腦電活動。

The cha siu bao was...（以英語語法嚟講，跟住隻詞可以係形容詞或者被動式嘅動詞）

... beautifully.（好靚噉；副詞）

由於最後聽或者見到嗰隻詞係副詞，句嘢唔啱語法，聽或者睇嗰個人（假設佢好熟英文）個腦好有可能會出現 P600 嘅活動。P600 喺語言學研究上幾有用，例如研究睇人點樣學第二語言，發現啱啱開始學某隻語言（叫呢隻語言做 L）嘅人，聽或者見到唔啱語法嘅 L 句子嗰陣個腦唔識得畀 P600 反應，但隨住佢哋使用 L 用到愈嚟愈熟，佢哋個腦開始會識畀噉嘅反應。

垃雜概念

其他有啦更嘅概念：

• 接受度判斷測驗：實證句法學研究成日用嘅研究方法；根據呢套做法，人腦入面會有一套對於自己母語嘅語法嘅內隱知識，所以如果想得知某隻語言嘅語法，最好就係攞一拃唔同嘅句子，問下一啲以嗰隻語言做母語嘅人，問佢哋覺得呢啲句子係咪可以接受，而接受度判斷就係做呢樣嘢。
• 充分層次：指緊某套語法有幾能夠充分噉描述隻語言；如果話某套語法觀察上充分，意思係話套語法做到準確噉描述手上有（例如睇語料庫）嘅字句；而如果話某套語法係描述上充分，意思係話呢套語法仲做到合乎母語使用者嘅直覺判斷。

另見

• 句法學
• 語義學
• 語法
• P600