YouTube言論審查爭議

有一啲香港同台灣嘅YouTube頻道內容創作者，曾經指控YouTube對佢哋進行言論審查，特別係一啲對中國共產黨不利嘅資料、言論(例如武漢肺炎疫情、香港反送中運動等)。發表呢啲資料、言論嘅影片，往往都會被「黃標」(即內容收益紅會大幅減少)，令內容創作者唔可以獲利。YouTube喺面對指控嘅時候就表示，呢啲係出於人工智能嘅審核判定機制未夠準確。

針對香港非建制派

• 反修例運動期間，有YouTuber發表支持運動或者批評中共言論，結果被YouTube黃標處理。
• 2021年12月21號，《升旗易得道》節目主持人Tony Choi 喺 Facebook表示頻道被政治打壓，所有影片都俾「黃標」，就連同政治無關嘅內容亦一樣，令佢地唔可以好似一般YouTube頻道咁樣獲利。YouTube甚至冤枉佢哋違反防疫政策、發佈不實醫療資訊，又唔回覆申訴。
• 時事評論員黃世澤多次公開批評YouTube對內容「黃標」嘅做法，甚至曾經形容自己同YouTube黃標組啲人關係，係去到敵對地步。佢舉例，喺佢評論閻麗夢、一帶一路、TikTok等對中共有批評嘅內容影片，就會被YouTube「黃標」，質疑YouTube係咪有中國嘅國安喺度。
• 《無糧軍師Water》亦發現佢明顯冇敏感嘢嘅影片被「黃標」；佢喺嗰排經常講及蔡天鳳案，其內容亦包括批評香港官府嘅言論。
• 經常批評港澳政府嘅司徒文進 CROSSBONE亦經常受「黃標」傍「紅標」困擾，佢嘅節目多數都直播出街。（注意：佢係澳門人，喺澳門撈。）

武漢肺炎疫情期間

喺武漢肺炎疫情（新冠肺炎）初期，有YouTuber表示自己提「武漢肺炎」就被黃標，認為 YouTube 打壓言論自由、限縮創作空間，更質疑黃標氾濫的背後原因唔簡單。其中因為影片提及武漢肺炎而被黃標嘅YouTube頻道有《Karen茄雲遊攝世界》、《志祺七七X圖文不符》等。

YouTube就武漢肺炎相關內容被黃標，佢哋就話係由於內容敏感同有爭議性，因此被限制或無法獲得廣告收益，又話事件同言論自由無關，審閱影片嘅時候亦冇政治取向。而去到2020年3月17號，YouTube就宣佈放寬，有限度准許武漢肺炎影片嘅廣告獲利。但時事評論員王陽翎就認為，YouTube就算要防止惡意謠言流傳，但一刀切劃一黃標影片嘅做法係太過懶惰。

其他知名受害人

其他知名受害人，仲包括台灣 YouTuber 呱吉等。

外間反應

• 2020年3月，有網民曾經喺美國白宮網站發起連署，要求YouTube解釋，點解喺武漢肺炎嘅主題，咁多影片會被「黃標」，特別係香港、台灣同韓國嘅YouTuber，聯署內容又質疑，中國係咪有參與YouTube限制言論自由嘅行動。聯署得到台灣時事節目《年代向前看》響應，之後超過10萬人參加。