中環

出自維基百科,自由嘅百科全書
  想搵第二個意思嘅話,請睇中環 (搞清楚)
中環
Central
由尖沙咀遠望中環一帶景色
尖沙咀遠望中環一帶景色
中環響香港嘅位置
中環
中環
中環喺香港嘅位置
行政區 香港
地區香港島
中西區
時區香港時間UTC+8
位於中環嘅干諾道中
聖約翰座堂

中環英文Central,舊時又直譯做:Chung WanChoong Wan),又叫中區Central District),係香港,地處香港島北岸,域多厘城四環之一。環頭西起消防街急庇利街城皇街樓梯街,東至金鐘道灣仔相接,南便去到堅道,北便經干諾道中望海。圍起上嚟約莫有309英畝。中環自香港開埠計起,一路都係行政同商業中心,亦係香港政府香港立法會所在地,故此有人話此地乃係「香港心臟」。

[編輯]

中環與中區,並非同一概念。中環個環,唐人聚居嘅地。最初係今日中環街市對上嘅谷,有幾條涌喺處,華人在此搭屋聚居。而中區係英人地域分野。

風物[編輯]

現時花園道鐵崗之間個山仔,大早開埠嗰時經已欽定為政府用地。故此政府機關即如港督府輔政司署軍需局兵房都通通擺響嗰處。而海關海軍船塢添馬艦海軍基地亦建於中環海旁。時移世易,雖則香港幾經變遷,不過舊蹟依然。

舊陣時重未曾填海德己立街威靈頓街嗰頭洋行多過米舖。當其時嘅洋行成棟樓都係佢嘅(亦即買斷一個地址冧把),樓下係辦公室,樓上就做職員宿舍。中環銀行亦都多到離晒譜,幾乎冚棒冷外國銀號都將總行置於中環。就咁,皇后大道中打上慢慢變成金融商業區,南便就做咗商業住宅地。外國三教九流諸如天主教聖公會浸信會都響中環興建總堂,愛嚟做傳教基地。後嚟重有埋西式學校,教化好多唐人子姪。

開埠初期,好多鬼佬唔妥唐人,做乜都唔滲唐人玩,中環一隅,唐人與狗唔入得。及至軒尼詩出任港督之後,至准唐人響中區買地。

時至1911年,中環經已旺到出汁,華洋薈萃、商賈雲集。享譽盛名有聖約翰座堂港督府舊大會堂香港會所畢打街舊鐘樓諸如此類。

家陣中環住宅同商業分得一清二楚。威靈頓街南便係住宅地,海旁係商業中心,石屎大廈林立,即如國際金融中心交易廣場置地廣場匯豐銀行大廈中國銀行大廈怡和大廈。座座大廈都零舍唔同人,每每令遊客歎為歡止。

中環雖則係旺到爆嘅商業區,之但係麻雀雖小五臟俱全,區內都相當多休憩場所,好似兵頭花園香港公園遮打花園皇后像廣場愛丁堡廣場咁。其中香港公園算係好去處,至啱冚家一齊去。

區內有眾多西式古蹟,譬如話荷李活道中區警署域多利監獄都爹利街煤氣燈之類。

中環至有異域情懷之地,相信皇后像廣場敢認第二都冇埞敢認第一。逢親禮拜日,皇后像廣場至遮打道都轉做行人專用區,准許各種團體做騷,呂宋文化大放異彩。

因為填海所以中環面積越來越大

得意街名[編輯]

港英政府官名

懷舊古老街名

[編輯]

1870年,黃遵憲廣州考鄕試途經香港,吟詩幾首,其中不乏講及中環情形。

見當其時中環洋商共教會之新奇:

酋長虬髯客,豪商碧眼胡。

金輪銘武后,寶塔禮耶穌。

火樹銀花耀,氈衣繡縷鋪。

五丁開鑿後,欲界亦仙都。

講述上中下環紙醉金迷、夜夜笙歌之情形:

沸池笙歌海,排山酒肉地。

連還屯萬室,尺土過千金。

民氣多羶行,夷言學鳥音。

黃標千萬積,翻訝屋沈沈。

便積金如斗,能從聚窟消。

蠻雲迷寶髻,脂夜蕩花妖。

龍女爭盤鏡,鮫人鬥織綃。

珠簾春十里,難遺可憐宵。