以偏概全

出自維基百科,自由嘅百科全書

以偏概全係一種邏輯謬論,即係話以少量數據去對整體作出立論,又或者根據有利嘅條件選擇性咁去抽出立論嘅對象,例如有人喺街見到一個差人講粗口,然後就話差人都係爛口,但其實只係見過一個差人講粗口,而呢一個差人嘅行為並唔代表所有差人都係咁,即係話根據一個例子或者小量例子就對整體作出結論,就為之以偏概全。

觀察選擇[編輯]

觀察選擇observational selection)係以偏概全嘅一種,即係話只搵一啲對自己有利嘅條件做選擇對象,作出立論,忽略唔啱聽嘅部份,類似斷章取義,例如賭場搵一啲玩老虎機中咗大獎嘅人去做宣傳,話:「你睇玩老虎機中大獎幾咁易?」但係就無講其他玩老虎機中唔到嘅例子,咁為之觀察選擇。

呢種謬誤喺日常生活成日都出現。呢個謬誤之所以好難察覺係因為論證真係提供咗一啲證據,不過係唔夠之嘛。