小熊貓

How to read a taxobox 小熊貓
A. f. fulgens
瀕危指標
易危 (VU)
物種分類
界 動物界 Animalia 門 脊索動物門（Chordata） 綱 哺乳綱（Mammalia） 目 食肉目（Carnivora） 亞目 (Subordo): 食肉亞目 Superfamily: 熊狸超科 科 Ailuridae 屬 小熊貓屬 Ailurus 種 小熊貓 A. fulgens
二元學名
Ailurus fulgens F. Cuvier，1825年
紅熊貓品種範圍

小熊貓，又叫紅熊貓，九節狼，英文中亦有 firefox 嘅名（中文譯做「火狐」），係一種好奇特嘅細型哺乳動物，分布響中國南方到喜瑪拉雅山麓，棲息地由地面至到大約四千米嘅高山。係屬於食肉目、小熊貓科。佢究竟應該列入熊科定係浣熊科，咁多年來一直拗緊，不過最近經過基因分析，認為同美洲大陸嘅浣熊親緣關係最接近，應該單獨列為小熊貓科。「熊貓」呢個名最初係形容小熊貓，但係後來大熊貓更廣為人知，所以單稱「熊貓」嘅時候多數係指大熊貓。法國博物學者居維葉（Georges Cuvier）嘅細佬，同樣都係動物學者弗列德利克居維葉（Frédéric Cuvier）第一次見到小熊貓嘅標本嗰陣相當感動，所以就用希臘文中嘅「火焰色嘅貓（Ailurus fulgens）」作為小熊貓嘅學名。

特徵

小熊貓爬緊樹（喺海洋公園影）

小熊貓長約 50 至 60 厘米，體重約 3 至 5 公斤，身體軀毛為栗子色，四肢同個肚有啲黑色毛，面部白色花紋唔似大熊貓咁明顯，但係前爪根骨嘅一部分突起成手指狀，可作為第 6 手指抓實握實啲嘢，呢點同大熊貓相同。會用汗，尿或類似麝香嘅且門腺嘅分泌物嚟嘜住地盤。

習性

小熊貓主要食果實、根、筍、栓皮櫟、昆蟲等。鍾意夜行，主要喺地面行，但可以利用部分可伸縮嘅爪爬上樹，冬天可以響樹上好高嘅位度瞓。生性獨居，但幼仔會同阿媽生活大概1年。佢哋同其他食肉動物一樣，會利用汗﹑尿或者喺且門腺度用類似麝香嘅分泌物嚟劃分地盤。喺野外，雲豹、雪豹、貂同人類係小熊貓嘅主要天敵。

繁殖

交配期為 1 至 3 月，5 至 7 月生育，一胎一般有 1 至 4 隻仔。幼仔喺 5 個月左右斷奶，18 至 20 個月性成熟，懷孕期大約 130日。

瀕危同養殖動向

目前由於森林砍伐呢啲原因，野生棲息地縮細，加上當地人認為佢條尾可以帶嚟好運而捕殺，數量已明顯減少，據估計大約只有唔到 5000 隻（當中成年嘅只有2500隻）。小熊貓已經入 IUCN紅色名錄嘅瀕危級別，以及響華盛頓公約嘅附錄，一度列明嚴格禁止交易。

第一個養小熊貓嘅最早記錄係喺1869年嘅倫敦動物園，而第一個成功繁殖到小熊貓嘅紀錄係喺1908年位於印度嘅達致寧動物園（Darjeeling zoo）裏面。早期由於飼養員唔多清楚小熊貓嘅生態特性（包括飲食習慣，怕熱特性等），死亡率非常之高。有8-10歲命，喺動物園度養最長壽可到14歲。

當時倫敦動物園嘅Papa Bartlett起初以為小熊貓食肉，畀肉佢食，但完全唔掂，身體不斷變虛，後嚟放佢去花園度走吓，佢見到一啲有果實嘅灌木就即刻走去食，嗰時啲人先知道佢係食素嘅。

全球首宗成功繁殖嘅孖生小熊貓，係喺澳洲坎培拉動物園同紐西蘭塔斯動物園，喺2007年12月合作後，經人工繁殖後誕生嘅。

香港嘅保育情況

香港動植物公園喺1990年代養過小熊貓。當時飼養位置喺而家「教育及展覽中心」斜對面嘅獸籠裏面，只養過一隻。嚮2009年3月22號，香港海洋公園收到4隻小熊貓，分別叫做：泰山 (小熊貓)、柔柔、聰聰同栗子 (小熊貓)。而家已安放喺海洋公園裏面嘅「亞洲動物天地」裏面，呢個展館響2009年4月30號開幕。

睇埋

• 中國哺乳動物

相

• 
  小熊貓爬緊樹
•