脧

  呢篇文講廣義嘅「脧」。想搵狹義嘅「脧」嘅話，請睇人脧。

呢幅描繪希臘神普里亞樸斯嘅壁畫，反映古羅馬人對巨脧嘅仰慕；見於龐貝古城。

脧（俗讀：zoe1，文讀：ceoi1／zeoi1）係多種雄性動物嘅外生殖器官，哺乳動物嘅脧重係排泄器官添。同相同品種嗰啲雌性動物嘅陰蒂一樣，脧發育自胚胎時嘅交接器原基。雄性動物用脧嚟屙尿同交配。本文之「朘」取時興意思——陰莖，而非老套意思——未發育嘅整副嘢（陰莖及膥袋）嘅統稱。

嗌法

現代粵人經常將傳統性器官名，用喺同原義冇關嘅嘢道，包括空泛噉鬧人，不過極力避免正經噉用來表達原意。今時今日，流行於廣府話，「脧」嘅古老同義詞除咗「脧脧」（zoe1 zoe1）同「脧脧仔」（zoe1*4 zoe1 zai2）等脧嘅衍生詞之外就只有「賓周」。脧同脧啲衍生詞仲要經常俾人誤用，意思變得含混。

與此同時，政府同各路「衛道之士」，勤於推廣呢種講嘢禮儀——以定為科學標準術語嘅書面語詞彙，嚟取代傳統粵辭，譬如取「陰莖」而捨「㞗」，取「陰囊」而捨「膥袋」，致使此等古老字詞淪為次文化之流。

喺另一邊廂，又有大把人同時嫌棄現代科學書面語同傳統粵口語，攪到用於直接意義嘅辭匯匱乏無比，大人向細孥仔講「賓周」時又喜用模糊字眼，例如「雞雞」、「雀仔」、「菇菇」、「咕咕」（gu1*4 gu1）、「周周」同「何B仔」之類，另有可以指男陰或女陰嘅「下面」、「嗰度」同「小便嗰道」等。語氣接近「賓周」嘅官話口語用詞有「小雞」。

結構

人

想知多啲：人脧

脧能夠成形，全靠胚胎體內嘅特定睾丸素。如果無咗呢啲激素，生殖器就會變成屄。以人類嘅為例，由脧一直到睾丸嘅下面，可以見到呢個痕跡。有啲胚胎發育唔健全，蘇蝦仔出世時，脧下面會有裂口，出世時要做手術縫埋佢，唔係第日痾尿時，啲尿會由脧下面流出嚟，搞到周地都係。

脧分成頭、體同埋根三部分，主要由兩個陰莖海綿體同一個尿道海綿體組成，外面筋膜同皮膚包圍。海綿體係兩端細嘅圓柱體，左、右各一，位於陰莖嘅背側。左、右兩者緊密結合，向前伸延，尖端變細，嵌入陰莖頭後面既凹陷內。陰莖海綿體嘅後端左、右分離，叫做陰莖腳，分別附喺兩側嘅恥骨下支同埋坐骨支。

尿道海綿體位於陰莖海綿體嘅腹側，尿道貫穿佢全長。中部呈圓柱形，前端膨大嘅係陰莖頭，後端膨大稱為尿道球，固定喺尿生殖膈嘅下面。每個海綿體外面都有一層厚而緻密嘅纖維膜，分別叫陰莖海綿體白膜同尿道海綿體白膜。

其他動物

大笨象脧

睇埋

• 男性生殖系統
• 膥 (身)
• 膥袋