謝婉雯

謝婉雯嘅銅像

謝婉雯，MBG（1968年3月31號—2003年5月13號）係喺沙士爆發期間，主動救病人嘅女醫生，佢係六名喺香港沙士疫情殉職嘅醫護人員之一。

經歷

謝婉雯生於草根家庭，喺新界葵涌石蔭邨長大。讀過石蔭慈幼葉漢小學、東華三院伍若瑜夫人紀念中學（1985年香港中學會考八優）同埋香港中文大學醫學院，成績優異，喺1992年畢業，畢業後喺屯門醫院服務。

對抗沙士

2003年3月，沙士喺香港爆發，屯門醫院收咗3個沙士病人，但係唔夠醫生，謝婉雯自願由內科病房轉到SARS病房，當時情況危急，謝婉雯同護士劉永佳先後親自幫末期SARS病人插喉，沾到飛沫，感染病毒。佢喺4月3號留院，15號入深切治療部，5月13號搶救無效不治。嗰日朝早，謝婉雯嘅死訊傳出，引起好多香港市民哀悼。5月17號，謝婉雯個老豆寫咗句嘢送畀香港人：「希望謝婉雯嘅勇氣同犧牲精神，可以鼓勵香港人永不放棄，並多謝各界對謝婉雯嘅關心。」

謝婉雯嘅安息禮拜喺5月22號舉行，時任行政長官董建華同好多局長都有出席，之後謝婉雯嘅遺體安葬喺浩園。跟住董建華宣佈，早前向香港立法會財務委員會要求撥款兩億，而當中7000萬係向受感染病毒嘅醫護人員提供援助，而當中1億3000萬係用喺醫護人員進修同培訓嘅。而為咗紀念呢一位「香港嘅女兒」謝婉雯，前行政長官董建華決定為呢一個進修培訓款項命名為「謝婉雯醫生培訓基金」。

謝婉雯醫生嘅事跡被基督教組織影音使團改編為電視電影《亞洲英雄》同電影《天作之盒》；佢學妹黃燕萍寫咗《一首傳世之歌》去紀念佢，經謝霆鋒作曲，由容祖兒主唱。

睇埋

• 李文亮：喺武漢肺炎爆發嗰陣披露疫情被訓誡，之後感染肺炎死咗嘅醫生。
• 陳靜秋：臺灣第一位喺SARS疫情殉職嘅醫療人員。