香港太空館

出自維基百科,自由嘅百科全書
香港太空館外貌

香港太空館英文Hong Kong Space Museum)喺香港九龍尖沙咀梳士巴利道10號,鄰近香港文化中心香港藝術館,係康樂及文化事務署轄下嘅博物館之一,佔地8,000平方米,喺1977年7月16號動工起,1980年10月7號開幕。太空館定期舉行各類型嘅天文展覽同講座,亦開放畀學校,團體同公眾參觀。太空館擁有一個形外殼建築,喺啟用初期,因為該蛋型建築(天象廳)係一格格正方形組成,所以好多市民都稱佢做「菠蘿包」。

歷史[編輯]

1957年,蘇聯發射第一粒人造衞星,開始引起唔少香港人對天文嘅關注。香港政府亦曾經响1961年建議喺維多利亞公園起天文館,但最後不了了之。直到1974年,天文館嘅計劃被市政局舊事重提,選址舊尖沙咀火車站附近嘅海旁,耗資6,000萬港元。由於香港嘅氣象部門香港天文台已經用咗「天文」一詞,為避免引起混淆,故此香港天文館最後落實稱為「香港太空館」。香港業餘天文學家廖慶齊先生係太空館嘅創館館長。

1980年開幕嘅香港太空館,成為全球首座電腦化嘅天文館。太空館天象廳裏面嘅電腦化星象儀,能夠透過光學原理模擬實際星空環境,將8,000粒恆星投射到天象廳嘅半球體螢幕。2004年,民政事務局為答謝何鴻燊捐助2,000萬港元弘民基金,決定將轄下嘅太空館天象廳命名為何鴻燊天象廳,為期15年。根據2005年資料,香港太空館每年平均約有70萬人次參觀。

太空館內部
何鴻燊天象廳
航天資料展覽

結構同設施[編輯]

  • 地窖(一般唔對外開放)
  • 地下
    • 宇宙展覽廳(蛋形建築下層)
    • 製作室、放映室(蛋形建築下層)
    • 演講廳
    • 天文書店
    • 詢問處
    • 票房(入口外)
  • 一樓
    • 天象廳(蛋形建築上層)
    • 辦事處(蛋形建築上層)
    • 太空探索展覽廳
  • 天台(只喺有觀測活動時開放)

天象廳[編輯]

香港太空館天象廳位於蛋形建築上層,係館內一個最重要嘅部分。佢係全球最大嘅天象廳之一,東半球第一座全天域電影放映設備,亦令太空館成為世界上第一座擁有全自動天象節目控制系統嘅天文博物館。以往觀眾進入天象廳時可以隨便搵位坐,但自從2000年6月29號起,天象廳開始實行劃位措施。

天象廳喺2004年命名為何鴻燊天象廳,命名為期15年。大部分節目用粵語旁述,部分場次就用英語旁述。觀眾可以用天象廳入面嘅耳筒,選擇粵語、英語、普通話日語旁述,並調校音量。1995年天象廳安裝影片與廳內觀眾互動系統,系統可以用作通過觀眾投票而選舉影片嘅發展,並作為問答比賽時嘅按鍵。

  • 座位:270個(翻新前有315個)
  • 銀幕直徑:23
  • 放映設備:可自動調節伸縮升降嘅蔡司VI A型星象儀
  • 放映節目:天象節目、全天域電影
  • 其他用途:每月星空巡禮、天文問答比賽

天象廳喺2020年進行最大規模嘅一次嘅翻新工程,主要更換直徑達23米嘅半球形螢幕,新螢幕提供無縫拼接嘅觀賞體驗,唔會好似舊螢幕噉睇片嗰陣會見到「一條條直線」,工程完成之後,已經喺2021年7月1號重新開放,票價同以前一樣冇變[1]

翻新工程[編輯]

太空館兩個展覽廳曾經喺1991年翻新過。

2008年11月,香港太空館耗資約3,400萬港元,幫天象廳進行自1980年啟用以嚟首次大型翻新工程,主要係安裝一套全新數碼天象投影系統,可以實時模擬喺任何時間同從宇宙中任何地點觀看星空,系統更可以升級到播放全圓頂銀幕嘅動畫或電影,而家只有極少數嘅天文館擁有呢種高解像度嘅數碼天象投映系統。

此外,天象廳入面嘅300個座椅,亦會換上全新嘅多語言互動系統座椅,採用無線藍芽技術嘅耳筒,加上座椅配備多功能系統,觀眾之間可互發短訊,亦可進行即時問答遊戲、意見調查等活動。

天象廳2008年11月17號暫停開放進行維修。2009年7月1號重開,翻新後嘅天象廳設置咗數碼天象投影系統,價值達2000萬港元,系統採用美國公司Sky-Skan Inc嘅技術,解像度超過5,300萬像素,至今全球只有香港太空館同北京天文館能夠達到呢個水準。

此外,天象廳入面嘅座椅亦全部換晒,由法國製造,新座椅配備咗多語言互動系統,椅背嘅斜度可配合天幕嘅弧度。另一方面,觀眾唔再係只係响地球表面抬頭望天,更可以由太陽系嘅八大行星唔同角度仰望太空,亦可探索唔同星座嘅面貌,甚至從外太空反觀地球北極光嘅變化。

太空館嘅兩個展覽廳喺2015年10月5號暫停開放,進行全面翻新,新展廳將分別改名做「宇宙展覽廳」同「太空探索展覽廳」。地下嘅「宇宙展覽廳」將展示由近至遠嘅宇宙概念,畀觀眾置身一個幽暗而神秘嘅仿真太空環境內,展品包括「月球彈跳機」、「宇宙演化劇場」同「重力衝浪」等;一樓嘅「太空探索展覽廳」主題將環繞太空探索同太空科技嘅發展,內容包括「宇宙飄浮」、「發射火箭」同「太空人訓練」等,畀觀眾體驗喺太空生活嘅滋味[2]。2017年年尾展覽廳會先開放畀學校申請參觀並進行展品測試同運作評估,喺2018年4月25號全面開放畀公眾參觀。

出版書籍[編輯]

自1980年開始,香港太空館已開始編印同天文學有關嘅科普書籍,例如介紹宇宙天體同宇宙有關嘅物理現象嘅《恆星》同介紹彗星嘅書《彗星》等。此外,太空館亦印製唔少同天文學有關嘅棋,對象主要係兒童。

開放時間[編輯]

  • 星期一、三至五:下晝1點至夜晚9點
  • 星期六、日同公眾假期:上晝10點至夜晚9點
  • 聖誕節前夕、農曆大除夕開放至下晝5點
  • 逢星期二(除咗公眾假期)、農曆年初一同年初二休館

入場費[編輯]

展覽廳[編輯]

  • 標準飛:HK$10
  • 優惠飛:HK$5(適用於殘疾人士(同埋一位照顧嘅人)/ 60歲或以上高齡人士)
  • 團體飛:HK$7(20人或以上喺同日參觀團體嘅標準票特惠價)
免費入場
  • 逢星期三
  • 由買飛嘅成人陪同參觀嘅四歲以下小童
  • 康樂及文化事務署博物館入場證
  • 全日制學生

2019年4月1號開始,全日制學生或博物館通行證持有人只需要出示有效嘅學生證明文件或博物館通行證就可以免費入場,唔需要網上預約。

何鴻燊天象廳[編輯]

立體電影、全天域電影或天象節目
  • 標準飛:HK$24(前座),HK$32(後座)
  • 優惠飛:HK$12(前座),HK$16(後座)
學校節目
  • 學生:HK$16
  • 教師/成人:HK$32

睇埋[編輯]

香港太空館

參考[編輯]

  1.  . 香港電台. 2021-06-29. 原先內容歸檔喺2021-06-30. 喺2021-06-30搵到.
  2. 太空館及展覽廳將關閉更新展品

出面網頁[編輯]