香港濕地公園

出自維基百科,自由嘅百科全書
香港濕地公園

香港濕地公園Hong Kong Wetland Park)位於香港元朗天水圍北部,有61公頃,包括60公頃嘅戶外保護區同埋1萬平方呎嘅室內展館。作為米埔濕地保護區嘅緩衝區,香港特區政府希望透過起呢個濕地公園嚟保育濕地教育市民同埋吸引遊客

歷史[編輯]

公園正門

香港濕地公園所在嗰塊地原本計劃做生態緩解區,用嚟補償返因為起天水圍新市鎮而冇咗嘅具生態價值土地。1998年,前漁農署(而家嘅漁農自然護理署)同前香港旅遊協會(而家嘅香港旅遊發展局)展開咗一項叫做「國際濕地公園及訪客中心可行性研究」嘅計劃,睇吓可唔可以將嗰個生態緩解區擴展成為一個濕地生態旅遊景點。研究結論係可以喺嗰度發展一個濕地公園,同時又唔削弱佢嘅生態緩解功能。香港濕地公園嘅發展更可以將嗰個生態緩解區提升成為一個集自然護理、教育同旅遊用途於一身嘅世界級景點。香港特區政府之後亦都將香港濕地公園計劃列做其中一個千禧年發展項目。

香港濕地公園喺1999年開始起,係香港第一個收費生態旅遊項目,用咗大概五億港元。公園分兩期發展,總共佔地61公頃。第一期展覽館已經喺2000年12月落成開放,而第二期展覽館亦已經喺2006年5月20號啟用。

設施簡介[編輯]

展館裏面嘅馬來長吻鱷

公園主要分「室內展覽區」同「戶外展覽區」兩種。室內展覽區裏面由 3 個大型展館(分別係「濕地知多少」、「濕地世界」同「人類文化」)同埋一個戶外公園所組成。除咗展出天然濕地生態之外,公園亦引入咗多種活生生,濕地可以見到嘅動植物嚟展覽,好似馬來長吻鱷小鼷鹿三線閉殼龜(俗名金錢龜)、重有香港獨有嘅濕地動物:香港鬥魚、盧文氏樹蛙等。

訪客中心有三個大型展館,包括影音劇場、電腦互動遊戲區,同埋展示唔同濕地生態環境嘅「濕地世界」。

「戶外展覽區」主要有多間觀鳥屋、紅樹林浮橋、濕地探索中心等,可以睇到鳥類、蝴蝶、蜻蜓、豆娘、兩棲類、爬蟲類、蟹、彈塗魚、淡水魚等。濕地公園嘅標誌:黑臉琵鷺,冬季就可以響觀鳥屋外見到。

公園第一期工程曾經獲得香港建築師學會2000年周年大獎會長獎,第二期亦獲得該學會2006年全年建築大獎。

貝貝之家[編輯]

内文:貝貝
貝貝響香港濕地公園嘅貝貝之家

2004年6月喺元朗山貝河捉到嘅小灣鱷貝貝亦喺2006年8月搬咗入去公園入面嘅「貝貝之家」。

貝貝之家簡介:

  • 位置:香港濕地公園遊客中心外面
  • 面積:戶外範圍:20 平方米(陸地)50 平方米(水池)
  • 內室:14 平方米

戶外設施[編輯]

  1. 水池:水深一米,水面有突出嚟嘅石台,畀鱷魚遮陰同匿埋。
  2. 紅外線暖爐:藏喺石簷底嘅紅外線暖爐,響凍嘅日子畀啲溫暖貝貝(溫度係 25℃)
  3. 電熱板:陸上嘅電熱板,響凍嘅日子畀貝貝休息取暖。
  4. 電子磅:巧妙咁收埋喺石簷之下,簷底有紅外線暖爐。每當鱷魚攤喺度取暖嗰陣,工作人員可以響室內嘅儀器紀錄重量,完全唔使騷擾貝貝。
  5. 濾水系統:池水唔停循環過濾,確保水質良好。先進嘅過濾系統包括過濾沙缸同埋紫外光消毒。
  6. 戶外植物:戶外展區種嘅植物除點綴之外亦為鱷魚提供蔭蔽地方,品種包括蒲葵、風車草、海芋、大薸等

室內設施[編輯]

室內屋企同戶外範圍由一道活分隔,畀鱷魚自由出入。內室方便獸醫幫貝貝做健康檢查,亦可以畀貝貝舒舒服服過寒冬。

  1. 通風系統同自然光:室內個窗特大,風扇同抽風系統,保持空氣流通。自然光由窗射入嚟,對鱷魚有益。
  2. 暖管:室內通風系統重有暖管,可以響冬天提供暖氣。溫度太低嗰陣重可以加紅外線暖爐。
  3. 暖水:好凍嘅冬天時可提供暖水,等室內池水保持 20 度以上。
  4. 閉路電視:室內外都有閉路電視,24 小時睇著條鱷魚嘅活動。來旅遊嘅人可以響戶外隔著塊玻璃睇吓貝貝嘅起居生活……

動漫宣傳[編輯]

濕地公園試過買動漫作品嘅授權,用嚟加強宣傳濕地公園嘅活動,包括麥兜、蠟筆小新同阿呢等動漫作品[1][2][3]

2010-11年度,濕地公園花喺買動漫作品嘅經費係兩萬四千蚊;2011﹣12年度,濕地公園花喺動漫作品嘅經費係八千五百蚊;2012﹣13年度,濕地公園花喺動漫作品嘅經費係一萬五千蚊[4]

入場費[編輯]

公園嘅入場費係大人港幣30蚊,小童、全日制學生同埋老人家港幣15蚊,三歲或以下嘅小童免費。另外亦都可以申請「家庭年票」,每張港幣50蚊。個人票大人港幣100蚊,小童、全日制學生同埋老人家港幣50蚊。

除咗現金,售票處亦接受用八達通卡、易辦事或公司支票畀錢。

消息[編輯]

曾經養過嘅小綠海龜
黑翅長腳鷸嘅BB
  • 2002年12月,濕地公園第一期正式開幕
  • 喺2005年10月1號起生效嘅《香港濕地公園(特別地區)令》令到香港濕地公園成為香港最新嘅特別地區,授權郊野公園及海岸公園管理局總監(即係漁農自然護理署署長)管理濕地公園,令到佢得到更加好嘅保護同埋管理。
  • 2005年1月,漁農自然護理署喺香港濕地公園發現大量懷疑係紅火蟻嘅昆蟲同埋幾十個佢哋嘅竇。
  • 2006年5月20號,濕地公園第二期正式開幕。
  • 2006年8月16號,貝貝成功運往「貝貝之家」。
  • 2007年2月,一群綠海龜仔暫住濕地公園,直到2007年7月放生。
  • 2007年5月20號,公園啟用1週年,新景點「蝴蝶園」開放。
  • 2007年7月1號,公園舉行「千蝶翩翩慶回歸」香港特別行政區成立十週年紀念活動
  • 2008年7月1號至10月,公園舉辦「愛蛙年2008」主題展覽同相關公眾活動,展示12種本土蛙類
  • 2009年5月6號,記錄到黑翅長腳鷸築巢生蛋。

交通[編輯]

[編輯]

其他香港主題公園[編輯]

參考[編輯]

出面網頁[編輯]