鷹司平通

鷹司平通（日文：たかつかさとしみち，1923年 8月26號—1966年 1月27號）係鷹司家第二十七代當主，同時係作曲家、鐵路研究家，曾經做過日本交通公社博物館調査役同埋交通博物館館長。佢老婆係昭和天皇三女和子內親王。

經歷[編輯]

1923年，平通響東京都出世，係公爵鷹司信輔個仔。由細細個開始，佢就係個鐵路迷，呢件事都好多人知^[1]。

1940年，佢參加大政翼讚會嘅公開招慕，最後入選。一年之後，佢響東京高等師範學校附屬中學校（即依家嘅筑波大學附屬中學兼高中），升讀大阪理工科大學（即依家嘅近畿大學）^[1]。同年，佢為大政翼讚會作咗會歌「大政翼賛の歌」。

1950年，佢同昭和天皇三女孝宮和子內親王響高輪光輪閣結婚，由於平通呢個時候已經做咗平民，所以兩公婆婚後嘅生活好貼地，正因為咁而畀人睇為「民主嘅象徵」^[2]。

因為細個嘅興趣，令到佢成為鐵路研究家，響產經新聞社上面都有份定期投稿，文章名係「鐵路物語」，而呢版文章都廣為人知。另外，佢曾經做過日本交通公社博物館調査員、交通博物館館長，又加入鐵道迷之會^[3]。同時之間，佢又係作曲家，間中都會幫啲中小學作校歌^[4]。

1955年，和子曾經大肚，但係最後死產（個BB死咗響和子個肚入面）。之後和子再冇大過肚。

1966年1月26號，平通突然失蹤，兩日之後發現佢嘅屍體，差人判斷佢係響失蹤後一日死嘅，死因好有可能係一氧化碳中毒（不過唔肯定係他殺定自殺），終年42歲。佢死後，老婆和子認咗大給松平家嘅尚武做契仔，後嚟尚武繼承咗鷹司家^[5]。

雖然兩公婆生活貼地，睇落過得好幸福，但其實就一直不和，原因係昭和天皇夾硬將和子嫁畀平通，所以平通根本唔鍾意和子。另外，平通都被指成日出去溝女，唔理和子。有人認為和子有可能返去同老豆昭和天皇講咗呢件事，而昭和天皇一嬲之下就搵人殺咗平通，所以呢個係佢死嘅「導火線」（呢個講法未被證實）^[6]。

1966年1月26號，佢去台東區上野公園國立美術館出席畫展，夜晚就同人去銀座酒吧，之後就失蹤。

兩日後，終於由交通博物館報警，最後畀人發現平通響涉谷區千駄谷同陪酒女前田美智子一齊死響前田嘅屋企，判斷兩人嘅死亡時間係響1月27號晏晝一點鐘至五點鐘呢段時間，死因係一氧化碳中毒。響同月29號，佢嘅死透過宮內廳發表，和子聽到之後好亂，唔知點算好，最後老豆昭和天皇嚟弔問，安慰之下先至好少少。

因為佢係出嗮名嘅鐵路研究家，所以佢嘅死實在好令人震驚，好多報紙都有報道佢嘅死，就連紐約時報同埋泰晤士報都有份，但係每家報道佢嘅死因都唔同：每日新聞同朝日新聞話佢係意外死、讀賣新聞話佢係自殺死、而週刊新潮仲話佢「死因可疑」，質疑差人講大話^[2]^[5]。

佢死後，越嚟越多人揭發平通同和子不和呢件事，開始有唔少人懷疑平通係「為情而死」，而和子響佢死後都好少出席公開活動。直到依家，平通嘅死都仲係一個迷^[5]。