黃成智

黃成智
出生日	1957年10月11號（66歲）
出生地	香港
國籍	中華人民共和國
母校	香港理工大學
職業	政治人
政黨	民主黨、新思維
	[改維基數據]
	睇; 傾; 改;

黃成智（Nelson Wong Sing-chi，1957年 10月11號—），外號「中間超人」，係香港註冊社會工作者，香港立法會前議員，北區區議會前議員，新思維前成員，民主黨前成員，佢細佬係中華基督教會香港區會教育事工部主席黃成榮。

生平[編輯]

黃成智1979年開始做社工，做咗約莫20年。2007年佢因為「一時大意」無再續期社工身份嘅註冊，而又喺2008年香港立法會選舉以「社會工作者」嘅名義參選，2009年畀人踢爆。

2015年7月，黃成智因為支持政改有條件噉「袋住先」，唔跟民主黨立場，被開除黨籍^[1]。

離開民主黨後，黃成智遭遇多次選舉失利。佢喺2016年香港立法會選舉社會福利界功能界別以全港功能界別最低得票率（4.94%）落選；喺2018年香港立法會補選因為得票率得1.5%而被沒收選舉按金；喺2019年香港區議會選舉只得117票（2.27%），成為彩園選區得票最低嘅候選人，再被沒收選舉按金。

2021年立法會選舉，由於民選議席比例進一步減少再加埋國安審查，泛民主派對選舉反應冷淡，而黃成智就出戰新界東北選區。佢尋求大埔區同埋沙田區泛民主派區議員支持，不過大埔區嗰6名議員都請佢食檸檬，其中區鎮濠（區鎮樺細佬）批評佢離開民主黨後成日轉立場，同自己理念唔同^[2]。不過，佢堅稱自己係泛民主派，以「點五步，民主路」作為競選口號，但呢句競選口號就畀修憲派前立法會議員鄭松泰揶揄。結果佢都係選唔到。