冼澤正

冼澤正（—2019年11月26號）係香港一名嘅激進親中共派人士，曾經係香港警察，職位去到高級督察。

佢經常參與唔同嘅撐警活動，佢又曾經設立組織香港行動並且擔任召集人，並且同另一激進親中共派人士李偲嫣合作緊密。

佢喺2019年11月26號因病離世，終年64歲。

喺香港警察入面嘅工作

佢職位曾經做到高級督察，擔任過大嶼山區訓練及職員關係主任，仲係警察義工團成員。

爭議

環繞冼澤正嘅爭議，好多都係同佢支持警察，同埋佢作為激進親中共派嘅爭議言行有關。時事評論員黃世澤就曾經形容佢係親中共派批鬥民主派人士嘅始祖。

恐嚇嶺南大學校內音樂會表演團體

佢曾經公開恐嚇喺嶺南大學學生會「黑暗時代抗爭音樂會」入面唱粗口歌批評警察嘅青年樂隊血汗攻闖，叫佢哋要「小心」。

佔中支持警方武力執法言論

喺佔中嘅時候，警察被批評使用過度武力，但佢就強烈支持警方發放胡椒噴霧同埋催淚彈，施放870枚催淚彈都算多，話呢啲只係低武力，又聲稱話有啲示威人士只係當玩戰爭遊戲。

所屬組織質疑六四死亡人數爭議

佢所帶領嘅香港行動，係六四真相嘅組成團體之一，六四真相曾經質疑六四事件嘅死亡人數，結果被天安門母親運動嘅人批評褻瀆六四嘅亡魂，行為卑劣。