卡通

出自維基百科,自由嘅百科全書

卡通(音譯自英文cartoon)包含咗幾種藝術形式,各種形式間有啲關係,但亦有好大分別。大體上,今日啲人用「卡通」一詞,指嘅可能係諷刺性嘅繪畫漫畫,或用動畫技術製作嘅電影電視節目

歷史上嘅卡通[編輯]

一幅達文西所繪嘅卡通:《The Virgin and Child with St. Anne and St. John the Baptist》

喺歷史上,卡通來自意大利文大張紙(cartone),係指喺紙上繪畫上一比一嘅草圖,以研究進行進一步嘅美術創作,好似油畫或刺繡地毯。卡通應用喺壁畫製作中,亦極為普遍。咁樣可以幫助畫家將圖畫嘅各個部分,準確噉畫喺灰泥度。

印刷媒體上嘅卡通[編輯]

《Cartoon no.1: Substance and Shadow》

《Cartoon no.1: Substance and Shadow》係由莊李治所繪畫一幅卡通,用嚟諷刺1843年喺新嘅英國國會議事廳入面,為繪畫壁畫作準備而畫嘅卡通草圖。結果,呢幅作品為「卡通」一詞,賦予新嘅意義。

喺現代印刷媒體,卡通係一種通常有幽默色彩或諷刺性嘅繪圖。呢個係喺1843年《笨拙》雜誌(Punch)刊出莊李治等嘅作品後,而獲賦予嘅意義。喺中文度,呢種卡通亦即係漫畫。之後,卡通亦指報章、雜誌上嘅連載四格漫畫

現代圖畫嘅卡通[編輯]

當卡通漸漸指向漫畫、連載漫畫意義,又因為連載漫畫同早期動畫電影嘅關係,而令「卡通」一詞指向動畫電影,繼而再涵括動畫電視節目。而呢個意義正係今日最常用嘅。呢度嘅「卡通」一詞,喺一般人嘅用法,同「動畫」同義。但準確來細分,卡通多指畫風抽象、故事情節較喜劇嘅動畫,詳細可以睇卡通物理學。呢類動畫較多以手繪嘅平面圖片進行拍攝,通常具有連續或單元劇情,而且大部份係以細路為對象嘅動畫作品。亦有人以製作方式來區分卡通同動畫,卡通專指用手畫平面圖片製作嘅動畫。