同班同學 (香港電影)
《同班同學》（英文：Lazy Hazy Crazy），係香港電影，2015年10月29號喺香港上畫。由郭奕芯、廖子妤、麥芷誼領銜主演，謝爕雋、王宗堯、蒼井空、邵音音、蔡潔、陳靜、盧惠光、曾國祥、徐天佑、李拾壹主演。電影由彭浩翔同梁啟緣監製，同時亦係做過《春嬌與志明》同埋《低俗喜劇》編劇嘅陸以心初次執導之作。
電影以片中三個女主角郭奕芯、廖子妤同麥芷誼嘅關係作為主題，當中以援交個案改編為題材。
呢部戲喺2015年3月，已經喺香港國際影視展中，率先奪香港亞洲電影投資會 HAF 大獎同愛奇藝特別選擇大獎。同時亦入圍第廿八屆東京國際電影節，成為競賽電影之一，其中陸以心更獲提名最佳新導演獎。另外，吳宇森同日本大師級導演山田洋次，就獲頒「武士獎」，以表揚佢哋喺影壇成就。