香港
出自維基百科，自由嘅百科全書
|
|||||
 |
|||||
| 官方語文 | 廣東話同埋英文（寫中文同埋英文） | ||||
| 行政長官 | 曾蔭權 | ||||
| 面積 - 水面面積 - 土地面積 - 水面面積嘅百分比 |
（中國排第33） 1,650平方千米 1,103平方千米 60% |
||||
| 人口 - 人口（2008年） - 人口密度 |
（未排名） 7,009,800 6,206／平方公里 |
||||
|
生產總值總共（2004年） |
排第37 2345億美金 排第14 34200美金 |
||||
| 開埠 - 嘅日期 |
穿鼻草約 1841年1月25號 |
||||
| 特區成立 - 嘅日期 |
主權由英國 移交畀中華人民共和國 1997年7月1號 |
||||
| 貨幣 | 港紙（HKD） | ||||
| 時區 | UTC +8 | ||||
| 域名 | .hk | ||||
| 長途電話代號 | 852 | ||||
| 區花 | 洋紫荊 | ||||
香港（英文Hong Kong）係喺華南嘅一個城市，三面環海。南面到南中國海，西面係珠江，東面隔住大鵬灣，北面隔住深圳河，同中國大陸連埋。1997年開始，香港行政上係中華人民共和國嘅特別行政區，叫中華人民共和國香港特別行政區。香港塊地原本屬於大清國。1841年，英國響鴉片戰爭後佔領咗香港島，響島嘅北面起咗個域多利亞城。清廷響1842年正式割咗個島畀英國。另外響1860年，再割埋九龍半島。1898年，英國又借埋新界99年，於是三個地區加埋就係依家嘅「香港」。咁英國響1997年約滿嗰年，就將新界，連同本身都已經係英國領土嘅香港島同九龍半島嘅主權一次過交番晒畀中華人民共和國。
中英兩國嘅政府簽咗《中英聯合聲明》，中華人民共和國政府保證過，一定會響1997年之後至少五十年，香港有高度自治，維持返香港本來嘅制度同埋生活方式。而中華人民共和國政府只係負責外交同防務，就係所謂一國兩制。
目錄 |
[編輯] 史
- 內文： 香港史
考古證明，香港響舊石器時代就有人住。響西貢黃地峒發現咗石器同整石器嘅架罉。喺新界同大嶼山好多地方都搵到新石器時代嘅遺址。旺角（以前叫「芒角」）就曾經係東漢、隋朝同唐朝人做陶器嘅地方。李鄭屋古墓亦證明香港喺東漢嗰時，畀番禺管。喺唐朝嗰陣，香港由惠州管，嗰陣軍隊就係駐喺而家嘅屯門，而呢區個名就係咁嚟㗎喇。
喺南宋嗰陣，嗰時得八歲嘅皇帝仔趙昰宋端宗畀元朝大軍一直追到嚟香港，聽講佢同佢細佬趙昺（有啲人叫宋帝昺）曾經喺一舊石頭度抖過，之後啲人就叫呢塊石做宋王台。後來趙昺登基，但係啲元兵係咁殺到嚟，佢就經淺灣（即係家陣嘅荃灣）向西面過海去新會，但係當架船駛到而家深圳蛇口左近嘅崖門嘅時候，蒙古大軍追到嚟，於是乎陸秀夫就揹住得嗰八歲嘅皇帝仔阿昺喺崖山跳海自殺身亡。
大清時香港係歸新安縣九龍司管，不過呢處記事寥寥無幾。後尾英國人去省城之前，都會取道香港先，兼攞埋水。1816年英使去北河見皇帝之前，7月10號到13號之間經過香港，就行過香港島。
喺1841年（道光廿一年辛丑歲），大清喺第一次鴉片戰爭裏面俾英國打敗咗，重喺之後嗰年簽咗《南京條約》，將香港島割讓左畀英國。之後清廷又輸畀英法聯軍，被逼簽埋《北京條約》，將九龍半島裏面近住香港島，成日搞事嘅地方，連埋昂船洲一齊割讓畀英國。由於嗰陣時嘅清廷自己已經好唔掂，喺九龍半島上嘅新邊界只係用好矮嘅鐵絲網分隔，位置就係喺今日嘅界限街。喺1898年，英國用同清廷簽嘅《展拓香港界址專條》同其他一系列嘅租借條約，租借埋新九龍、新界同附近嘅兩百幾個離島，租期係99年，但係就唔包括九龍城寨。
中華民國成立之後，民國政府本來係想取消不平等條約。但好快就自己搞唔掂，北伐單嘢搞到國民黨政府唔得閒諗住攞番香港嘅主權。但係，嗰陣香港政府重有開放中港邊界，兩地市民重可以自由咁來往。嗰陣唔少香港人，都同清時一樣，除咗捐錢返去之外，重身體力行加入國民政府做嘢。前國民政府外長伍廷芳就係嗰陣香港嘅名流喇。
打抗日戰爭之後，日軍喺1938年登陸廣東，重好快咁佔領埋廣州同附近嘅地方。之後香港嘅唐人支持抗戰，出錢出力。日本軍政府因為咁樣表現不滿，曾經好多次同英國嘅領事抗議。喺1941年12月7日，日本偷襲珍珠港之後幾個鐘頭，就攻打馬來亞同走過深圳河打香港。嗰時日本同香港義勇軍、加拿大兵，重有印度籍同西人嘅英軍打咗好多場好激烈嘅仗。最後因為駐港嘅英軍戰力唔夠，喺1941年12月25日聖誕節嗰日，嗰陣嘅港督楊慕琦宣佈向日本投降，開始咗香港三年零八個月嘅日治時期。日治嗰陣，日本人為咗方便統治，好多次將啲窮人搬返去中國大陸住。由於日軍對居民殘酷，到咗香港被佔領嘅中期，新界地區嘅居民響應東江游擊隊，喺香港成立港九縱隊，加入對抗日本嘅武裝勢力，參加者多數係而家叫左派嘅人。
打贏日本之後，中華民國政府一度喺聯合國上要求要收番香港，但礙於嗰陣國共內戰已經開始咗，佢再一次冇力同英國政府攞返香港。當中國共產黨喺1949年成立咗中華人民共和國政權之後，中、英兩方面就香港問題達成協議：中方唔諗住收返香港主權，亦都唔理國民政府軍民喺香港嘅活動，用嚟換取英國對中華人民共和國嘅承認。於是喺1950年，英國承認中華人民共和國嘅成立，變咗係第一個承認中華人民共和國嘅西方國家。而後來由於中華人民共和國喺韓戰激嬲西方世界，搞到俾佢哋禁運，令到香港變成中華人民共和國嘅轉運物資、徵集資金、收集情況唯一嘅窗口。
喺1950年代中，右派工會暴動，中華民國政府嘅情報人員從此就唔畀再入香港。
喺1967年，成個中國大陸都搞文化大革命，紅衛兵好多次想越過中港邊境。後來左派公然響應國內造反派嘅號召，喺香港好多地方搞暴亂，則係「六七暴動」。嗰陣喺香港街頭擺滿寫住「同胞勿近」嘅真假「菠蘿」（即係土製炸彈），搞到香港人好驚又好亂。後來中華人民共和國總理周恩來，話唔諗住收返香港，先平息到呢件事。
經歷過1960年代尾嘅暴動，香港政府喺1970年代初調整咗政策方針，開始諮詢華人嘅意見，逐漸納華人入政府做決策。1973年香港經歷咗一次經濟大衰退，不過自從1974年就開始咗有廿幾年咁長嘅高速增長。1970年代中香港地鐵開始動工、廉政公署成立、九年免費教育開始實施、同埋公共房屋計劃進一步擴展等等，都為香港未來嘅「經濟奇蹟」奠定咗基礎，令到香港喺1980年代初成為世界著名嘅「亞洲四小龍」之一。
喺1970年代初期，由於新界土地契約嘅問題，令到港英政府迫住要考慮香港前途嘅問題。英國政府曾經好多次要求中華人民共和國政府延續新界嘅租約，但畀佢拒絕咗。不過，喺1970年代末，「香港前途問題」已經變成中英兩國嘅正式議題，但究竟係邊方面先提出轉移香港政權，街外人都有唔同嘅講法，不過唔理邊個先提出，「香港前途問題」搞到中英兩國開始咗差唔多廿年嘅爭拗。
喺1980年代初時，英國曾經提出過分拆香港嘅「主權」同「治權」，前者畀返中國，不過英國人就留住治權。唔少香港傳統上流社會嘅政治同商界精英，開始嗰陣都支持有關嘅建議。傳統英國資金嘅商業機構，好似滙豐銀行、怡和洋行，都有幫手遊說。
嗰陣時商界年輕領袖李鵬飛帶埋其他香港工商界精英，成立咗個「年青才俊團」上去北京交流，重得到嗰陣時嘅領導人鄧小平接見。當佢哋提出分拆主權同治權嘅建議時，畀鄧小平「好惡咁鬧」，結果遊說就失敗咗喇。中國嗰陣堅持一定要「收回」香港，不過香港人重可以享有「高度自治、港人治港」，呢樣變成中英兩國談判時嘅唯一框框。
[編輯] 政治
- 內文： 香港政治
香港嘅政治係由1841年開埠後開始計起，最初係由英國人發展同埋管理，後來先慢慢開始有華人參與。香港嘅主權歸屬問題喺20世紀尾受到國際關注，中華人民共和國同埋英國經過近20年磋商，最後決定喺1997年進行主權移交，結束咗香港近二百年嘅殖民地歷史。主權移交後，香港成為中華人民共和國嘅特別行政區，以一國兩制形式平衡兩地之間政治同社會上嘅差異。主權移交後嘅政治爭議，多數涉及憲制性文件《基本法》嘅架構下，香港民主發展嘅步伐。
[編輯] 地理
- 內文： 香港地理
香港範圍，約莫響南北北緯22度9分到33分之間，東西東經113度50分到114度26分之間。
香港係珠江口東南面嘅一部分，位於澳門以東60公里（37英里），香港大致上有香港島、大嶼山、九龍同埋新界呢幾部份。九龍半島北面黐住新界，新界隔住條深圳河連住中國大陸。有262個島，當中大嶼山最大、香港島最多人、鴨脷洲人口密度最高。全香港最高嘅地方係大帽山，有958米，即係3142呎咁高。低窪地方就主要集中喺香港西北部嘅元朗。
香港呢個名係由今日香港仔嗰頭走出來嘅。而今日香港個港就唔響香港仔，而係隔開港島同九龍嘅維多利亞港，係全世界最深[未記出處或冇根據]嘅港口之一。
香港大部分土地都係未開發嘅。呢啲地多數係山地，山坡好斜。香港總面積1104平方千米[1]，當中開發咗嘅唔夠百分之廿五。其餘嘅地多數都係綠色嘅，包括總共佔咗香港四成土地咁多嘅郊野公園[2]。香港大部分已建區喺九龍同港島北部。新界有散落嘅已開發地區。
香港有條水蛇春咁款嘅海岸綫，又長、又攣，無厘規律。就係因為有條咁嘅海岸綫，香港有好多海灣、河流同埋沙灘。雖然香港又多樹又近海，但係香港係全世界空氣污染數一數二咁嚴重嘅地方。不過，呢啲污染物多數都係珠江三角洲吹過來嘅。
[編輯] 生態
- 內文： 香港生態
香港雖然面積細，但物種豐富程度絕對可以同鄰近嘅海南島同台灣相比。
受到地形所礙，香港有大概75%土地屬郊區，未曾開發成市鎮 [3]。由於受香港城市擴張嘅影響，郊區同城市嘅距離非常之近，市民同埋旅客可以喺短時間內前往郊區。2005年，前往郊野公園嘅遊人達 1,200 萬人次，進行遠足、燒烤、露營等活動 [3]。郊區內嘅自然生態盎然，有多種香港稀有、獨有品種棲息，同密集嘅市區發展形成強烈嘅對比。呢啲潛在嘅自然生態旅遊資源，獲得政府近年進行評估發展 [4]。
新界西北係香港生態嘅稀有郊區。例如：響新界西北嘅米埔。
政府喺郊區開闢咗 23 個郊野公園同 17 個特別地區，共佔地 416.44 km²，即全港土地約 38 %。呢啲地域受到法例保護，交由漁農自然護理署（漁護署）管理。郊野公園主要係為市民提供郊野康樂設施，而特別地區則主要為保護自然生態環境。除咗郊野公園，香港亦設有4個海岸公園同1個海岸保護區，同樣受到法例保護。海岸公園同保護區面積有 24.30 km²，畀市民欣賞珊瑚等海洋景觀及生物，亦可以進行潛水、獨木舟、風帆及海底攝影等活動 [3]。
政府指定嘅郊野地區受到法例保護，並有漁護署管理，自然生態環境得以維護發展。
[編輯] 氣候
香港氣候係亞熱帶氣候。一年裡面半年幾乎係溫帶。一二月，撞到冷峰時會多雲。三四月嘅時候，香港嘅氣候幾令人舒服，雖然有時幾潮濕。五至八月，嗰處又熱又濕，仲間唔中落雨行雷。十一、二月，香港會有風吹下，兼且有陽光同埋溫度唔錯。[5]
七至九月係一年之中香港最易畀熱帶氣旋吹襲，即係打風，嘅時候，不過就算五月甚至十一月有風打都唔出奇。每年北太平洋同埋中國幾個海總共會生大約三十一個熱帶氣旋出來，當中一半會去到颱風嘅級數。打風嘅時候，唔只會大風，而且好多地方會落雨。大雨通常持續幾日，不過大部分嘅破壞其實係大雨之後嘅山泥傾瀉同埋水浸造成。[5]
香港史上錄得最高嘅氣溫係攝氏38度（華氏100度），最低紀錄就係攝氏零下四度（華氏25度）。[6]而香港天文台嘅紀錄就係1900年8月18號到1900年8月19號嘅攝氏36.1度（華氏97.0度）同埋1893年1月18號嘅攝氏零度（華氏32.0度）。值得一提嘅喺，2009年8月2日下午2時，香港天文台於黃大仙錄得攝氏37.1度(華氏98.78度)，創出新高。一年入面，一月通常最凍，平均氣溫係攝氏16.1度（華氏61.0度）；最熱嘅係七月，平均攝氏28.7度（華氏83.7度）。[7]香港位於北回歸線以南，同夏威夷緯度差唔多。冬天嘅時候，北面吹落來嘅強風會整凍個城市；而夏天嘅時候，香港就通常吹西南風，啲風又暖又潮濕。咁嘅天氣，其實夠養一個熱帶雨林。
[編輯] 經濟
- 內文： 香港經濟
香港行緊一個資本主義經濟市場，有自由市場政策、低稅率，政府唔干預市場。香港係全球金融、貿易嘅重要中心，有全亞太區最集中嘅公司總部群。香港嘅人均國民生產總值同埋城市生產總值都係全中國最勁嘅。以購買力平價為來計，香港超越埋歐洲四大經濟體系，即係英國、法國、德國同埋意大利，亦都勁過日本。
殖民地時代嘅香港政府跟英國嘅規矩，將香港呢個經濟體系嘅運作交畀私營機構主導嘅市場經濟。1980年打後，港府通常都打積極不干預呢張牌，無為而治；而香港都成日畀人用來做自由放任政策嘅例子，最出名嘅就係佛利民。由1995年經濟自由度指數出現開始，香港連續13年排頭位。[8][9]香港喺世界報告入面經濟自由一項都排第一。[10]
香港嘅耕地同天然資源比其他國家少，所以好多食物同埋原料都要靠入口。香港係全世界第十一大嘅貿易單位，[11]，入口同埋出口嘅總值大部國民生產總值。有114個國家喺香港有領事館（2006年數字），係全世界最多嘅一個城市。香港嘅大部分出口產品都係轉口產品，即係啲喺境外生產嘅嘢，經過香港轉運去第道，通常係中國大陸。香港回歸之前，香港同大陸之間已經有深入嘅貿易關係。因為香港自治，所以香港可以繼續做一個資金同埋資源流入大陸嘅落腳點。香港亦都係大陸同埋台灣通航之間嘅一個轉機點。
香港用嘅貨幣係港紙。1983年起，聯繫匯率制度將港紙同美金之間嘅匯率限住喺每7.75至7.84蚊港紙兌一蚊美金。
[編輯] 語文
- 內文： 香港語文
香港社會以華人為主，自然講中文最多，不過當仲喺英國殖民地時，英文先係官方語言，中文無憲制地位。1970年之後，中文嘅地位先得到香港法例第5章《法定語文條例》確認，成為官方語言。但法律無講明「中文」係指乜，結果就出現「兩文三語」政策，兩文即係中文同英文，三語即係廣東話、普通話、英文。「兩文三語」都係喺香港最多人講同寫嘅語言。至於中文書寫，傳統以來都係以正體中文為主，但九七回歸後，香港同大陸來往多咗，簡體字亦多人用咗，加上法律對中文字無明確嘅定義，所以簡體字同正體字亦同樣受到官方認可。另外，有好多香港作者同埋傳媒直書廣東話，成為粵語白話文，[未記出處或冇根據] 之後慢慢普及，後尾呢啲字仲畀香港政府正式列入香港增補字符集中嘅粵語漢字，成為正式中文文字之一。
喺香港，好多時都係講廣東話為主，一定要講普通話嘅場合都唔係咁多，所以多數香港人嘅普通話能力都只限於基本溝通。除咗廣東話同普通話之外，有好多嚟自大陸唔同地方嘅新移民都會講返佢哋鄉吓嘅話，好似閩南話、上海話、潮州話、福州話、客家話、四邑話咁，而喺新界一啲圍村地方，重有好多人講一種叫做圍頭話嘅原居民語言，呢啲圍頭話係屬於廣東話嘅一種次方言。除咗中文之外，由於喺英國殖民地嗰陣好多英國人嚟香港做嘢，所以講英文亦好普遍，好多路牌，街招都係中英並重。
中文同英文之外，由於香港人好鐘意請菲律賓女工嚟香港做家務，所以香港有唔少菲律賓人，菲律賓話亦成為一種喺香港好多人講嘅語言，不過就以菲律賓人社群為主。另外又有啲同菲律賓話有相同情況嘅例子，喺香港南亞族裔嘅人亦有唔少，所以好多南亞族裔嘅語言亦有人講，好似印度話、亞拉伯話、尼泊爾話咁。香港亦有好多日本人同韓國人，所以日文、韓文都一樣有人講，雖然呢啲唔係中文嘅話都係喺返呢啲人嘅鄉里之間先曉，但由於呢啲人佔香港人口唔少數目，所以亦好容易喺市區聽到人講。
[編輯] 飲食
- 內文： 香港飲食文化
[編輯] 宗教
- 內文： 香港宗教
香港係一個宗教自由既城市，世界上主要既宗教都可以響香港搵到。香港居民絕大多數係華人，而信徒最多，香火最頂盛既可以話係佛教同道教。而呢個教從來唔注重入教儀式，講究「信則有，不信則無」既慨念，所以信徒數目無法估計。
而其他宗教，因為種類繁多，所以教堂，禮拜堂同寺廟自然都多，例如基督教，回教等。
[編輯] 文化風俗
- 內文： 香港文化風俗
[編輯] 註
- ↑ Geography and Climate, Hong Kong
- ↑ "Hong Kong Hiking Tours", The Hong Kong Tourism Board's Hiking page. Retrieved on 2006-06-18.
- ↑ 3.0 3.1 3.2 香港政府新聞處：《香港便覽》系列，2006年6月更新。
- ↑ 香港政府旅遊事務署：新界北部綠色旅遊發展計劃諮詢分析報告，2005年3月。
- ↑ 5.0 5.1 Climate of Hong Kong。 Hong Kong Observatory (2003-05-04)。 喺2007-08-02揾到。
- ↑ "Extreme Values and Dates of Occurrence of Extremes of Meteorological Elements between 1884–1939 and 1947–2006 for Hong Kong", Hong Kong Observatory. Retrieved on 2006-02-02.
- ↑ "Monthly Meteorological Normals for Hong Kong", Hong Kong Observatory. Retrieved on 2006-02-02.
- ↑ 2007 Index of Economic Freedom。 Heritage Foundation。
- ↑ Summary Economic Freedom Rating 2004 (Economic Freedom of the World - Annual report 2006 on page 13 or 9 of 23) (English)。 The Fraser Institute, Canada。 喺2007-01-08揾到。
- ↑ Economic Freedom of the World: 2006 Annual Report (PDF)。 The Fraser Institute (2006)。 喺2007-06-06揾到。
- ↑ About Hong Kong。 Hong Kong SAR Government Information Centre (April 2006)。 喺2007-04-12揾到。
| 中華人民共和國省級行政區 |  |
||||||||
|
|||||||||
