加拿大
出自維基百科，自由嘅百科全書
| 官方語言 | 法文、英文 |
| 現任總理 | 史提芬·哈珀 |
| 面積 - 水面面積 - 土地面積 |
891,163平方公里 9,984,670平方公里 |
| 人口 - 總人口（2005年） - 人口密度 |
32,270,500 (排第37位) 3.3／平方公里 (排第185位) |
| 排第12位 1.077萬億 排第14位 32800元 |
|
| 貨幣 | 加元(CAD) |
| 時區 夏令時間 |
UTC -3.5到-8 -2.5到-7 |
| 域名 | .ca |
| 長途電話代碼 | +1 |
加拿大（Canada）係世界上第二大國，佔咗北美洲北部嘅大部分，海域東去到大西洋西部，西去到太平洋東部，北去到北冰洋，南部同西北部同美國接壤。
原住民已經響加拿大住咗成千年。喺15世紀尾，英國同法國開始喺度擴張殖民地。後尾喺1763年，法國打輸咗七年戰爭，就割讓咗差唔多成個新法蘭西出嚟。喺1867年，加拿大成為英國喺北美洲嘅屬地之一，叫做加拿大聯邦。之後，啲加拿大人發覺唔可以再俾英國㩒住，於是乎喺1982年簽咗份1982年加拿大法案，同英國分離咗，但係名義上都係英聯邦嘅。
加拿大係行議會制同埋君主立憲制，佢元首係英女皇伊利沙伯二世。聯邦係由加拿大十個省同埋三個地區組成嘅。加拿大行雙語制同埋係一個多元文化主義嘅國家，加拿大英文同加拿大法文係加國嘅官方語言。喺一個咁先進嘅工業化國家，加拿大保持住多元化嘅經濟，喺好大程度上依賴豐富嘅自然資源。加拿大同美國喺貿易上已經有咗好長同深遠嘅關係。
加拿大喺1867年立國，首都係渥太華。不過，而家人口最大，經濟及文化嚟講最重要嘅城市係多倫多。其他較大嘅都市，包括滿地可，溫哥華以及卡加利。
喺二十世紀有好多世界各國嘅人移民到加拿大，中國人都唔例外。而家加拿大華僑嘅人口已經超過一百萬人，大部份集中喺好似多倫多同埋溫哥華咁嘅大城市。
目錄 |
[編輯] 政治
- 內文： 加拿大政治
加拿大行君主立憲制、聯邦制同國會制。元首係女王伊麗莎白二世。女王喺加拿大嘅代表係加拿大總督，由加拿大總理提名、君主任命；佢無任何政治歸屬，負責用君主名義同意法案、宣讀君主講話、簽國家文件、宣佈國會召開或解散、同埋第啲國家職務。君主（通過總督）就叫做首腦，但佢嘅實權保留喺危機時用，好似宣戰權咁。
而家嘅總督係莊美楷。總理一般由執政黨魁做。而家嘅執政黨係聯邦保守黨，果個黨嘅黨領史蒂芬哈珀（Stephen Harper）就係總理。 立法機關係國會。
主要政黨:
- 加拿大自由黨（英語：Liberal Party of Canada，法語：Parti libéral du Canada係個中─右翼，主張自由主義嘅政黨）
- 加拿大保守黨（英語：Conservative Party of Canada，法語：Parti conservateur du Canada係個資本主義，保守主義嘅政黨）
- 加拿大新民主黨（英語：New Democratic Party，法語：Nouveau Parti démocratique係個民主社會主義的政黨）
- 魁人政團（法語：Bloc Québécois係個主張魁北克省脫離加拿大獨立嘅政黨）
- 加拿大綠黨（英語：Green Party of Canada，法語：Parti vert du Canada係個環保主義嘅政黨）
[編輯] 國會架構
加拿大國會係包括君主，參議院同衆議院。加拿大總督代表君主，同根據加拿大總理嘅“推薦”嚟“委任”105位參議院議員。衆議院嘅議員係由聯邦大選選出嚟嘅，而家衆議院有308個議員。
“加拿大皇室”係國會同行政機構嘅一部分。皇室代表係總督。實質上，君主係唔會單方面行使權力，而係會聽總理嘅建議。
加拿大國會衆議院係加拿大國會權力嘅核心。加拿大君主嘅權力只係象徵式，上議院幾乎唔會唔比衆議院嘅法案通過。加拿大總理同内閣嘅任職需要衆議院一半以上成員嘅同意，但係唔需要參議院嘅同意。
[編輯] 個名點嚟
加拿大 Canada 嚟自聖羅倫斯河嘅伊洛魁話，解做「村」。1535年，魁北克城區民用咗呢個字嚟形容斯他達剛拿呢條村畀雅克卡地亞聽 [1] 。卡地亞用呢個字嚟形容嗰時啱啱攞到手呢笪地方，唔淨止用嚟形容條村。1545年，歐洲啲書同地圖開始提及呢笪地方，就叫佢做 Canada 嘞 [2] 。
法屬加拿大即係話沿住條聖羅倫斯河同埋大湖嘅北岸。後尾又分開咗做兩個地方，一個係英國嘅，叫上加拿大，另外嘅叫下加拿大。1841年成立加拿大省。1867年開始，加拿大聯邦或者加拿大就俾人用嚟形容成個國家，1950年代之前都好興叫加拿大自治領。加拿大要求政治自治，聯邦政府開始淨係喺合法條款度叫加拿大。1982年加拿大法案指明加拿大係唯一（英法文都係）一個合法國家名。呢個法案出台嗰日就將自治領日，改咗名叫加拿大日。
[編輯] 參攷
- ↑ Trigger, Bruce G.; Pendergast, James F. (1978). “Saint-Lawrence Iroquoians”, Handbook of North American Indians Volume 15. Washington: Smithsonian Institution, pp. 357–361. OCLC 58762737.
- ↑ Jacques Cartier (1545)。 Relation originale de Jacques Cartier。 Tross (1863 edition)。 喺2007-02-23揾到。
| 北大西洋公約組織 (NATO) |  |
|---|---|
| 比利時 | 保加利亞 | 加拿大 | 捷克 | 丹麥 | 愛沙尼亞 | 法國 | 德國 | 希臘 | 匈牙利 | 冰島 | 意大利 | 拉脫維亞 | 立陶宛 | 盧森堡 | 荷蘭 | 挪威 | 波蘭 | 葡萄牙 | 羅馬尼亞 | 斯洛伐克 | 斯洛文尼亞 | 西班牙 | 土耳其 | 英國 | 美國 | |
