西班牙

出自維基百科，自由嘅百科全書

西班牙（España），正式國名叫西班牙王國（Reino de España），係南歐一國，首都係馬德里（Madrid）（由1555年起），人口大約4049萬（2008年 7月估計數字），約莫有94%人信天主教。

西班牙以熱情嘅民族性見稱。西班牙人天性開朗而熱情，鐘意唱歌跳舞，晌國內四圍都感受到呢種熱情洋溢嘅風情。

舊時廣東話西班牙重有個名叫大呂宋，因為西班牙曾經係「呂宋」，即係今日嘅菲律賓嘅宗主國。相反，菲律賓亦都有個名叫「小西班牙」。

[編輯] 簡史

西班牙曾經畀好多個民族統治過。由公元前10世紀左右開始，利古勒人（Ligures）、巴斯克人（Basque）、塔提蘇人（Tartesian）、伊比利人（Iberian）先後進入伊伯利亞半島（Iberian Peninsula）。

公元前6世紀，塞爾特人（Celtic）唻到咗呢片土地，帶唻咗先進嘅鐵器製造技術，從而增加咗農產量同埋提高咗戰鬥力；塞爾特人又發展咗採礦技術，引唻咗好似腓尼基人（Phoenician）、希臘人（Greek）同埋伽太基人（Carthaginian）等等唻到伊伯利亞半島嘅東南部做買賣。

隨後到咗公元前3世紀，西班牙畀羅馬人（Roman）征服，變咗做三個行省 Tarraconense、Betica 同埋 Lusitania，統治咗超過七個世紀。羅馬人為西班牙帶唻咗賦稅制度、貨幣制度，又起咗好完善嘅交通網絡。

5世紀初，阿拉諾人（Alanos）、汪達爾人（Vândalos）同埋斯維匯人（Suevos）短暫噉入侵過西班牙，後來畀日耳曼族嘅西哥德人（Visigoth）打敗。西哥德人以托萊多（Toledo）做中心，建立王國。維持咗300年，到711年，信回教嘅北非洲摩爾人（Moors）入侵西班牙，消滅咗西哥德王國，建立「倭馬亞王朝」（Umayyad Dynasty），首都設响科爾多瓦（Córdoba），伊比利亞半島進入回教徒統治時期。西班牙人逃亡咗去北部建立基督教政權，繼續驅逐摩爾人嘅戰爭（光復運動）。到1492年，西班牙人終於收復响最南邊嘅格拉納達（Granada），趕走最後一批回教徒，結束穆斯林對西班牙長達782年嘅統治，基本上叫做統一咗成個西班牙。

晌十五到十七世紀，西班牙受到咗葡萄牙成功發展航海事業嘅刺激，加上想開採黃金同埋傳教，於是招攬各國嘅航海精英，其中以熱那亞（Genoa）人哥倫布（Christopher Columbus）同埋葡萄牙人麥哲倫（Ferdinand Magellan）嘅表現最突出，由1492年到1609年，係史學家所謂嘅「黃金時代」。西班牙用暴力手段攻打同佔領咗大片土地，西班牙嘅殖民地遍及中美洲（墨西哥、古巴、巴拿馬等等）、南美洲（阿根廷等等）、非洲（阿爾及爾、的黎波里、突尼斯等等）、亞洲（菲律賓群島等等）同大洋洲（關島、密克羅尼西亞聯邦、帛琉、北馬里亞納群島等等）。直到工業革命爆發，英國、法國、德國等國迅速崛起，西班牙晌世界上經濟同政治嘅影響力先至日漸式微。

1898年，西班牙同美國打海戰，史稱「美西戰爭」，結果西班牙輸咗。根據《巴黎和約》，西班牙要以2000萬美元嘅代價割讓菲律賓、關島、安娜塔西亞島同埋波多黎各等殖民地畀美國，又要畀古巴獨立。呢場仗再加上自由主義嘅興起，影響中南美洲好多西班牙嘅殖民地一個二個宣佈獨立。

到咗20世紀，西班牙晌第一、第二次世界大戰都保持中立，不過都仲係走唔甩打仗嘅命運。1936年7月，佛朗哥將軍（Generalísimo Francisco Franco）發動軍事政變，引發激烈內戰，傷亡成百萬人。直到1939年，佛朗哥攻陷馬德里，內戰結束，佛朗哥開始長達36年嘅獨裁統治，直到佢1975年 11月過身。佛朗哥將軍主政期間，科技人才、知識分子同埋藝術家唔係外流就係畀人暗殺，工運、學運、暴動連年，恐怖活動盛行，係西班牙史上嘅一幕悲劇。

[編輯] 地理

西班牙佔有大部份伊比利亞半島，西接葡萄牙，北面係法國同安道爾，南接直布羅陀海峽（Strait of Gibraltar）。東面地中海水域佢佔有巴利阿里羣島（Illes Balears），西面大西洋有加拿利羣島（Islas Canarias）。

西班牙嘅大城市除咗首都馬德里之外，重有巴塞隆拿（Barcelona）、巴倫西亞（Valencia）、西維爾（Sevilla）、馬拉加（Málaga）同畢爾包（Bilbao）等等。

[編輯] 政治

西班牙晌1982年成為北大西洋公約組織（NATO）成員國之一，又晌1986年成為歐洲聯盟（EU）成員國之一，亦係聯合國（UN）嘅成員。

西班牙實行君主立憲制同埋議會民主制。

[編輯] 現任領導人

國王卡洛斯一世（Juan Carlos I, 1938年 1月5號—）（晌1975年11月22日登基）
首相薩帕特羅（José Luis Rodríguez Zapatero, 1960年 8月4號—）（2004年 4月17日上任至今）

[編輯] 國旗

西班牙國旗

西班牙國旗又叫做「血與金」，由紅黃兩色組成；紅色係鬥牛士嘅鮮血，黃色係鬥牛場嘅泥土嘅顏色。國旗中間嘅黃色部份靠左繪有國徽；國徽入便嘅四個公仔代表咗組成西班牙嘅四個古老王國。

呢支旗最早晌1785年由國王查爾斯三世揀咗唻做打仗嘅軍旗，之後就一路係國家嘅象徵。1977年正式成為國旗。1981年決定用國徽取代本身晌旗面上面嘅一個盾徽公仔。

[編輯] 其他國家象徵

國歌：《皇家進行曲》（Marcha Real）

國花：香石竹

國家格言：Plus Ultra（走得更遠）

[編輯] 國內問題

巴斯克獨立問題
巴塞隆拿獨立問題
治安問題
恐怖主義

[編輯] 經濟

[編輯] 一般經濟數據

西班牙由2003年到2007年每年嘅經濟增長都維持晌平均百分之三以上，對比衰退緊嘅歐洲經濟算係令人滿意。2007年，西班牙嘅人均國內生產總值（GDP）大約係30100美元（估計數字）。

西班牙嘅製造業、旅遊業發達。國內工業方面，西班牙係世界最大嘅造船國之一，又係最大嘅汽車生產國之一。除此之外，紡織業、食品工業、金屬製造、化工業、機械、造鞋業、製藥業都係主要工業。

西班牙近年嘅經濟開放效果好理想，但係失業率就一直居高不下，2007年嘅估計數字係百分之八點三。西班牙實行8年免費義務教育。

[編輯] 證券交易

西班牙晌馬德里有間交易所叫做馬德里證券交易所（Bolsa de Madrid），截至2007年10月底，市值係全球第十大，晌歐洲就僅次於泛歐股票交易所（Euronext）、倫敦證券交易所同法蘭克福證券交易所，排名第四。

[編輯] 貨幣

由1999年 1月1日開始，西班牙引入歐元（Euro）同本身嘅貨幣比塞塔（Peseta）並行而成為法定貨幣。2002年中正式淘汰比塞塔。

匯率：每1歐元兌166.38比塞塔（固定匯率）。

[編輯] 語言同文化

西班牙有幾種主要嘅語言，包括：

西班牙話(Spanish) — 又叫做卡斯提爾語(Castillian)，係世界第三大語言，用嘅人高達3億3千萬，係聯合國六種官方語言之一，亦係非洲聯盟（AU）同埋歐洲聯盟嘅官方語言。
加泰羅尼亞話(Catalan) — 晌加泰隆尼亞(Cataluna)地區通用
巴斯克話(Basque) — 北邊嘅方言
加利西亞話(Calician) — 相當近似葡萄牙語
巴倫西亞話(Valencian) — 東邊嘅方言

西班牙係一個多元文化嘅地方，比較特別同受歡迎嘅風俗活動包括鬥牛同埋佛朗明哥舞(Flamenco)。

[編輯] 運動

晌西班牙國內，足球、網球、電單車等等嘅運動項目好受歡迎。

1982年，西班牙舉行咗四年一度嘅世界盃，嗰屆西班牙晌第二輪分組賽出局（負西德，和英格蘭）。

1992年，巴塞隆拿舉行咗四年一度嘅奧林匹克運動會，嗰屆西班牙一共攞到13金7銀2銅一共22面獎牌（其中一面金牌係男子足球），晌獎牌榜排第六。

西班牙甲組足球聯賽

[編輯] 運動員

[編輯] 網球員

粵音譯名	西班牙本名	成就
珊翠絲	Arántxa Sanchez-Vicario	1989年、1994年、1998年３屆法國網球公開賽女子單打冠軍得主 1992年奧林匹克運動會（奧運會）女子單打銅牌得主 1994年美國網球公開賽女子單打冠軍得主 1996年奧運會女子單打銀牌及女子雙打銅牌得主曾經登上WTA世界排名第一
瑪天妮絲	Conchita Martínez	1992年奧運會女子雙打銀牌得主 1994年溫布頓網球公開賽女子單打冠軍得主 1996年奧運會女子雙打銅牌得主 2004年奧運會女子雙打銀牌得主
桑塔納	Manuel Manolo Santana	４個大滿貫單打冠軍
卜季拿	Sergi Bruguera	1993年到1994年連續２屆法國網球公開賽男子單打冠軍得主 1996年奧運會男子單打銀牌得主
莫亞	Carlos Moyá Llompart	1998年法國網球公開賽男子單打冠軍得主曾經登上ATP世界排名第一
哥斯達	Albert Costa Casals	2000年奧運會男子雙打銅牌得主 2002年法國網球公開賽男子單打冠軍得主
費雷羅	Juan Carlos Ferrero	2003年法國網球公開賽男子單打冠軍得主曾經登上ATP世界排名第一
拿度	Rafael Nadal Parera	2005年到2008年連續４屆法國網球公開賽男子單打冠軍得主 2008年溫布頓網球公開賽男子單打冠軍得主 2008年奧運會男子單打金牌得主 2009年澳洲網球公開賽男子單打冠軍得主曾經登上ATP世界排名第一

[編輯] 足球員

希亞路（Fernando Hierro）
魯爾（Raúl）
摩連迪斯（Fernando Morientes）
雷耶斯（José Antonio Reyes）
大衛比利亞（David Villa Sanchez）
費蘭度托利斯（Fernando José Torres Sanz）
路爾斯加西亞（Luis Javier García Sanz）
法比加斯（Francesc "Cesc" Fàbregas Soler）
沙比阿朗素（Xabier Alonso Olano）
卡斯拿斯（Íker Casillas Fernández）
簡尼沙里斯（Santiago Cañizares）

[編輯] 籃球員

加素（Pau Gasol）

[編輯] 一級方程式車手

阿朗素（Fernando Alonso）

[編輯] 著名美食

Tapas 開胃菜
西班牙海鮮飯(Paella)
凍蕃茄湯(Gazpacho)
風乾肉(Jamon)

[編輯] 連出去

歐洲

西歐	：	比利時 \| 法國 \| 愛爾蘭 \| 盧森堡 \| 摩納哥 \| 荷蘭 \| 英國
北歐	：	丹麥 \| 芬蘭 \| 冰島 \| 挪威 \| 瑞典
中歐	：	奧地利 \| 捷克 \| 德國 \| 匈牙利 \| 列支敦士登 \| 波蘭 \| 斯洛伐克 \| 瑞士
東歐	：	白俄羅斯 \| 愛沙尼亞 \| 拉脫維亞 \| 立陶宛 \| 摩爾多瓦 \| 俄羅斯 \| 烏克蘭
南歐	：	阿爾巴尼亞 \| 安道爾 \| 波斯尼亞黑塞哥維那 \| 保加利亞 \| 克羅地亞 \| 塞浦路斯 \| 希臘 \| 意大利 \| 馬其頓共和國 \| 馬耳他 \| 黑山 \| 葡萄牙 \| 羅馬尼亞 \| 聖馬力諾 \| 塞爾維亞 \| 斯洛文尼亞 \| 西班牙 \| 土耳其 \| 梵蒂岡
海外屬地同其他特殊政區	：	塞浦路斯英屬基地區² \| 奧蘭 \| 法羅群島 \| 直布羅陀 \| 格陵蘭³ \| 根息島 \| 揚馬延島 \| 澤西島 \| 萌島 \| 司瓦爾巴特群島
未被承認國家	：	阿布哈茲 \| 納戈爾諾-卡拉巴赫\| 南奧塞梯共和國 \| 德涅斯特河沿岸共和國 \| 北塞浦路斯土耳其共和國

世界地理索引 | 非洲 | 北美洲 | 南美洲 | 亞洲 | 大洋洲

歐盟
奧地利 \| 比利時 \| 保加利亞 \| 塞浦路斯 \| 捷克 \| 丹麥 \| 愛沙尼亞 \| 芬蘭 \| 法國 \| 德國 \| 希臘 \| 匈牙利 \| 意大利 \| 愛爾蘭 \| 拉脫維亞 \| 立陶宛 \| 盧森堡 \| 馬耳他 \| 荷蘭 \| 波蘭 \| 葡萄牙 \| 羅馬尼亞 \| 斯洛伐克 \| 斯洛文尼亞 \| 西班牙 \| 瑞典 \| 英國
承認嘅候選國：克羅地亞 \| 馬其頓共和國 \| 土耳其

西班牙