基督教

出自維基百科,自由嘅百科全書
跳去: 定向搵嘢

呢篇文章講嘅係廣義嘅基督宗教。想搵狹義嘅基督教,睇下【基督新教

宗教系列
基督宗教
Christian cross.svg
基督教史
基督教發展時序
耶穌基督
耶穌十二門徒
大公會議
大分裂
十字軍東征
宗教改革與更正教
中國基督教
中國基督教史
三位一體
聖父
聖子 (神學)
聖靈
基督教神學
基督教會
禮拜
聖恩 · 救贖
山上寶訓
十誡
聖經
舊約
新約
正典
次經
偽經
基督教派
天主敎
東正教
聖公宗
新教

基督教運動

基督教粵拼gei¹ duk¹ gaau³)係一神論宗教。佢係以福音所以記載嘅耶穌生活同教導為依歸。基督徒相信耶穌係救主,亦都叫佢做耶穌基督。響2001年,估計有成信眾二十億人,即係佢係世界第二大宗教。[1][2]

簡歷[編輯]

早期基督教響一世紀時係一個猶太人支派,所以有好多宗教文獻都係同猶太教一樣。因為都信舊約聖經嘅緣故,猶太教回教、基督教都係亞巴郎(亞伯拉罕)宗教。

1054年,基督教發生大分裂,東部教會自稱為正教(即東正教),西部教會稱為公教(即天主教)。16世紀又從天主教中分裂出新教,以及其它好多小教派。


基本信仰[編輯]

由於基督教有唔同嘅教派,所以唔同教派嘅教義會有唔同,但主要教派响信仰上嘅共同性比差異多好多,下面嘅教義儘量涵蓋個個教派都話啱嘅基本信仰。

神學教義[編輯]

  • 獨一(或者唯一天主獨一上帝):宇宙入面有一個獨一嘅至高神,係之前有、依家有、永遠都有嘅全能者,叫做耶和華[3]/雅威/耶和威(英文God,喺基督公教入面中文成日譯做「天主[4]。喺基督新教入面中文成日譯做「神」或者「上帝」[5])。
  • 三位一體:獨一神有聖父聖子聖靈(又譯做聖神)三個位格,聖父係萬有之源,聖子係耶穌基督,聖神係神嘅靈。三者同質、同能、同永恆,聖父係神,聖子係神,聖靈係神,但只係一個神,而唔係三個神。阿塔拿修信經對三位一體做咗比較得到公認嘅解釋,但呢個仍然係比較難理解嘅一個概念。聖經入面無「三位一體」呢個詞,所以呢個係基督教嘅基本教義入面比較受爭議嘅一項,但都畀好多信三位一體嘅基督徒睇做係最緊要嘅一個教義。否認三位一體嘅理論入面有一位一體論(只有一個神,亦都係父)、三位三體論(父子靈都係三個神)、形態論等等。由於源自猶太教思想嘅基督教,亦一樣堅持「一神」論,因此三位一體同唔係三位一體論嘅爭論焦點通常係耶穌基督嘅地位問題。
  • 創造:神創造咗天地萬物,最後照自己聖潔良善嘅形象造人,亦係造男造女,名叫亞當夏娃
  • :基督教嘅“罪”原文嘅字面意思係「唔中靶心」,「罪」指一切唔符合神嘅聖潔良善嘅行為、思想。人嘅始祖亞當同夏娃犯罪,帶來咗死。從此,罪同死入咗世界,世人生而有罪(罪性),一定會犯罪(罪行)。如果冇神嘅救贖,都要走上滅亡之路,唔單止肉體要死,靈魂都要永遠咁死,而靈魂嘅死,唔係永遠嘅消失,而係永遠受火湖折磨。
  • 基督救贖:耶穌基督本身係神個仔,與神同在,佢就係神。耶穌基督為咗將世人從罪惡入面救出嚟而降世為人,從三十歲開始傳道,响十字架上面被人釘死,佢嘅無罪之身成為贖罪嘅祭,贖咗世人嘅罪。佢第三日復活,升到天上,同父同在,佢畀父差下聖靈住喺信佢嘅人心入面,同佢哋同在。佢重生存,佢重努力咁做嘢。佢遲啲會再嚟,審判一切嘅活人死人,徹底咁消滅罪,成就新天新地。
  • 復活同永生:耶穌基督將會再嚟,所有嘅人都要復活,接受最後嘅審判。信耶穌基督嘅人罪得赦免,得到永生,同神和好。罪不得赦免嘅最後會因罪而落地獄,同神永遠隔絕。(聖經對末世嘅啟示唔係好清楚,基督教嘅末世論响細節上面可以好複雜,唔同嘅意見都比較多。)
  • 榮耀:全部畀神,使人真正咁謙卑落嚟,做「榮神益人」連結人嘅枝子。

人倫道德[編輯]

同基督教嘅神學教義有緊密聯繫嘅係佢嘅人倫道德嘅教導,如果話神學教義側重於人同神嘅關係,咁呢啲道德嘅教導就係側重於人同人嘅關係,但呢兩者之間都無嚴格嘅界限。喺總結基督教信仰嘅時候,呢啲道德似乎成日畀一啲理論家所忽略[6],但其實呢啲道德嘅教訓係聖經同基督教信仰嘅重要組成部分,並且對大眾文化產生咁重要嘅影響。

有好多嘅聖經經文講明「愛」係基督教信仰嘅道德觀嘅最重要嘅一點,神對人最大嘅誡命係要愛神、愛人[7]。另外,基督教都強調認罪、悔改、饒恕、謙卑等等。「十誡」同「登山寶訓」係聖經入面對道德嘅比較集中嘅論述。

基督教信仰入面嘅倫理道德觀雖然同其他宗教、文化嘅倫理道德觀有好多相通嘅地方,但佢個根源、目的、方法、側重又有好多唔同,呢個好關鍵。基督教覺得愛喺神嗰到嚟,做好事嘅目的係為咗榮耀神,做好事要出自真心嘅愛。基督新教咗特別講「因信稱義」,覺得人嘅好行為應該係對神嘅信心嘅結果,唔應該無咗信心而自己一個去強調做好事。

創始起源[編輯]

按照《新約》嘅說法,猶太人耶穌喺約莫30歲(西元30年代)開始喺猶太省嗰到傳道。耶穌話,佢嘅嚟臨唔係要代替咗猶太人之前記載喺《舊約》嘅律法,而係要成全佢。耶穌係真理做見證(約18:37)、教人「愛上帝」同埋「愛人好似愛自己咁」(利19:18,民15:37-41,申6:4-9,11:13-21)、首先求咗天父嘅國同佢嘅義(太6:33)等等嘅道理。

根據基督教福音書嘅記載,耶穌出嚟傳道,講天國福音,勸人悔改,轉離惡行。佢嘅教訓同所做嘅神蹟,响民眾入面得到好大嘅回應。咁令羅馬帝國祭司團受咗好多影響,覺得自己會因為咁得罪咗羅馬政府,猶太公會嘅權利同地位有可能保唔住(當時大祭司嘅任免全部係由帝國政府掌控),所以要將佢快啲剷除(約11:48-50)。後來由於門徒猶大告密,羅馬帝國駐猶太嘅總督彼拉多將耶穌捉咗。耶穌受到好多打罵侮辱,最後畀人釘死。聖經新約對呢個解釋做聖經舊約預言神派嘅救贖主耶穌為咗要救世人嘅罪,自願咁做代罪羔羊,流咗自己嘅血,畀罪人可以赦免。

根據基督教新約嘅記載,根據佢門徒做嘅見證,耶穌死咗之後第三日喺石窟墳墓入面復活。佢嘅墳墓空咗,佢又好多次向滿心疑惑嘅門徒顯現。佢哋漸漸咁信耶穌真係復咗活,係勝過死亡嘅救主。喺耶穌升天超越呢個世界嘅時空之後,佢嘅門徒起身熱心咁傳開耶穌嘅教訓,而且宣傳佢係復活得勝死亡嘅主。信徒佢哋組成彼此相愛、奉基督嘅名敬拜上帝嘅團體,就係教會。

早期基督教[編輯]

早期嘅基督教係作為群眾運動產生嘅。相對於傳統猶太教強調遵循律法,基督教強調耶穌救贖嘅恩典,並覺得只要信耶穌基督就係舊約聖經裏面咗多個先知講嘅救世主,願意接受佢做主,並決意以上帝嘅心意做生活嘅準則,畀耶穌基督為自己承擔所犯嘅過錯,就畀人覺得係悔改咗,可以藉著洗禮,畀教會接納成為一分子。

喺《使徒行傳》入面講一開始教會階段,因應好多歸鄉猶僑唔再返一開始住嘅地方,但係留响耶路撒冷聚集聽道生活,所以曾經實行過財產共有,外界睇佢係一種秘密宗教組織[8]。猶太人睇耶穌外道教會係離經叛道嘅異端,成日响羅馬度告佢哋。羅馬覺得基督教剩係猶太教嘅一支,一開始無點逼啲教會,直到尼祿皇帝(西元54年-68年)在位嗰陣,教會嘅人數已經升到唔可以唔睇嘅程度,响西元60年代羅馬帝國政府嘅正式大規模全國迫害就開始咗。當時教徒唔分種族同社會階層,就連當時嘅奴隸响信主之後都可以即刻接納做弟兄,啱啱開始迫害基督徒都係局部性。

隨著基督教嘅傳播,社會嗰嗰階層愈來愈多人入教會。教會雖然喺第2世紀3世紀遭遇好多次可怕嘅大逼迫,好多主教信徒畀火刑燒死,喺競技場入面畀野獸食咗,但教會依然繼續茁壯,直到313年頒佈嘅米蘭敕令 ,羅馬帝國終於承認基督教嘅合法地位。隨著基督教嘅發展,教會開始將耶穌復活嘅一日成為之後嘅復活節,又定12月25日係耶穌嘅生日,即係聖誕節(耶穌出生嘅具體日期已經知唔到,只可以將原本嘅阿波羅神嘅生日改做耶穌聖誕日)。米蘭敕令係由當時嘅羅馬皇帝頒布嘅,因此基督徒將呢個政績睇做基督教嘅勝利。

歷史上面,第5世紀開始去到9世紀初,可以話係歐洲嘅黑暗時代,自到西元476年西羅馬帝國畀日耳曼人滅咗,羅馬帝國全面崩潰之後,唔少日耳曼人嘅部族,例如法蘭克人,亦開始皈依基督教。由於日耳曼人嘅文化水準比羅馬人低,甚至連自己嘅文都無,所以教會就做咗中世紀嗰陣西歐嘅唯一學術保障;因為當時幾乎剩係得一啲教士修士讀書識字,學者差唔多都係教會嘅人[9]。正因為噉,自從西羅馬帝國被蠻族入侵後,西歐就開始完全陷入一片黑暗嘅迷信時代。

1054年,基督教分做公教(喺中國叫做天主教)同正教(喺中國叫做東正教)。天主教以羅馬教廷做中心,教導權主要响教宗同大公會議;東正教以君士坦丁堡做中心,教會最高權力屬於東羅馬帝國嘅皇帝。1096年-1291年,天主教以維護基督教做口號,搶返畀穆斯林佔咗嘅聖城耶路撒冷,展開咗8次宗教戰爭十字軍東征)。16世紀之後,歐洲各國發生咗宗教改革,分化咗好多支派。之後嘅地理大發現同西方殖民擴張,將基督教傳到全世界。

基督教經典[編輯]

基督教基本係以《舊約全書》同《新約全書》兩部分構成嘅《聖經》為經典。

港澳嘅解讀[編輯]

唔知幾時開始,喺香港基督教等同於新教,香港嘅新教徒自稱「基督徒」。天主教徒亦多以「我係天主教或基督徒」作識別。

[編輯]

  1. Religions by Adherents Adherents.com.
  2. 回教成最大宗教 信眾13億蘋果日報 (香港)》2008年4月1日 A28版
  3. [需要參考資料]耶穌多次用「我係」來描述自己(好似約翰福音8:24,28),呢個「我係」就係耶和華呢個名嘅字源(出埃及記3:13-15)。
  4. 「天主」亦係中文入面從來就有嘅詞,基督公教喺將聖經翻譯做中文嗰陣借用咗呢個詞。呢個係天主教個名嘅來源。
  5. 「神」同「上帝」都係中文入面本身就有嘅詞,基督新教喺將聖經翻譯做中文嗰陣借用咗呢啲詞,但要避免同中國文化入面嘅神或上帝嘅概念簡單咁套用响基督新教上面。喺聖經嘅中文翻譯過程入面,「神」同「上帝」呢兩種翻譯引起過唔少爭議,但依家都得到普遍承認。
  6. 比如奧古斯丁嘅《論基督教教義》,加爾文嘅《基督教要義》,英文維基百科嘅Christianity文章,似乎都側重於神學教義
  7. 聖經(同合本譯文):「耶穌對佢講:『你要盡心、盡性、盡意愛主你的神。這是誡命中的第一,且是最大的。其次也相仿,就是要愛人如己。這兩條誡命是律法和先知一切道理的總綱。』」(馬太福音22:37-40)ESV:And he said to him," You shall love the Load your God with all your heart and with all your soul and with all your mind. This is the great and first commandment. And a second is like it: Your shall love your neighbour as yourself. On these two commandments depend all the Law and the Prophets."(MATTHEW 22:37-40) 「沒有愛心的,就不認識神,因為神就是愛。」(約翰一書4:8)。ESV:"Anyone who doesn't love doesn't know God, because God is love."(1 JOHN 4:8) 「如今常存的有信,有望,有愛這三樣,其中最大的是愛。」(哥林多前書13:13)ESV:"So now faith, hope, and love abide, these three; but the greatest is love."(1 CORINTHIANS 13:13)
  8. 上帝同凱撒之間:基督教二元政治觀同近代自由主義,叢日雲
  9. 《基督教發展史新譯》第六課,改革宗出版社