聖誕節

出自維基百科,自由嘅百科全書
跳去: 定向搵嘢
聖誕節嘅第啲用法,睇聖誕 (搞清楚)
聖經嘅東方三博士嚟朝見耶穌。

聖誕節基督敎紀念耶穌出世嘅日子,響12月25號。雖然一直有人誤會呢一日係耶穌生日,但係近年查實,係敎會將西方原本冬至之後嘅各地風土宗敎慶祝活動,變為基督敎節日。雖然呢個係宗敎節日,但係因為呢個節日主張去祝福人,送嘢畀人,祥和,開心同家庭團聚,所以就算唔多信徒嘅地方都好重視。有人話其實耶穌係響6月出世嘅,而且唔係響公元1年,而係公元前6年

響20世紀後期,個節日配合商業活動同好多非基督徒慶祝,宗敎氣氛已經大為轉淡。

聖誕節前一晚,即係12月24號晚叫平安夜。而之後嗰日,12月26號拆禮物日(Boxing Day)。

東正敎呢一支嘅聖誕節都係12月25號,不過就係儒畧曆嘅。所以用額我畧曆計返,就係1月7號

個名點嚟[編輯]

聖誕個「聖」字有啲以基督敎中心,所以有啲地方用中文寫做耶誕節

英文嘅Christmas 係 Christ's mass 簡寫,即係基督彌撒。亦有啲西方地方用新生來寫聖誕,好似法文嘅Noël咁。而簡寫 Xmas 嘅X其實係希臘字母 Χ(chi),係希臘文 Χριστός(基督)第一個字母。所以X係代表基督。

雜錦[編輯]

雖然對西人來講,聖誕節係一個陪屋企人嘅節日,但香港人就成日都當佢係拍拖嘅日子,即係同情人節差唔多,所以好多人都會覺得聖誕節冇拖拍係好慘嘅。

聖誕節對流行文化都好大影響,例如好多香港嘅流行曲都同聖誕有關,咁就可以應下節,增加首歌嘅播放率。出名啲嘅「聖誕流行曲」有吳浩康嘅「又到聖誕」(2005年),古巨基嘅 "Santa Claus"(1997年),Cookies嘅 "Merry Christmas"(2002年12月23號),鄭伊健嘅「夜還未深」(1994年)等。