耶穌

耶穌基督（1580年嘅作品）

耶穌（希臘話：Ιησούς，公元前6年至公元前4年–30年），相傳佢係大衞王嘅後代，阿爸係鬭木佬約瑟，阿媽叫瑪利亞，大約生活喺公元一世紀。佢係基督教教義嘅中心人物。

喺基督教入面，耶穌又叫做耶穌基督（Ιησούς Χριστός / Iēsous Christos），基督徒認為佢係三位一體嘅聖父聖子聖靈之中嘅聖子，又喺救世主。由於佢喺拿撒勒長大，因此亦有人叫佢做拿撒勒人耶穌。

佢稱呼自己為神嘅僕人。最後，為咗人嘅罪而死喺十字架上面，並喺三日之後復活，成為基督徒成日講嘅永生神。

生平

關於耶穌嘅生平，主要嘅資料主要來源係根據《新約聖經》嘅四福音書，不過喺羅馬帝國時代嘅歷史文獻上就只係有零星嘅側面記載，就係因為咁所以存在住好多相關爭議。

降生成為人

內文： 耶穌降生

根據路加福音，天使加百列奉神嘅差遺，去到加利利嘅城市，童貞女馬利亞嗰度，同佢預告耶穌嘅降生。但嗰時佢已經同大衛家族嘅約瑟訂咗婚，根據馬太福音，約瑟曾經因為馬利亞嘅肚而想將佢休咗，但因為主嘅使者勸說先至就咁算數。根據路加福音嘅記載，因應當時嘅人口普查，約瑟帶住懷孕嘅馬利亞去婭伯利恆，並喺馬槽度生咗耶穌。

耶穌降生嗰時係有訪客嘅，路加福音有講過牧羊人嘅拜訪，馬太福音就有講東方嘅博士帶住禮物隨住嚟拜訪。當晚，根據馬太福音，約瑟帶住馬利亞同耶穌逃去埃及，直到大希律王死咗之後先至返去以色列，喺拿撒勒度住；根據路加福音，耶穌同父母一直都住喺以色列，並響八日之後行割禮，冇幾耐就返去拿撒勒定居。

耶穌到咗30歲，就接受施洗約翰嘅施浸，並喺曠野接受四十日嘅試探，之後就開始喺故鄉加利利一帶開始佢嘅傳道工作，並喺信徒當中親自揀咗12個人成為十二門徒。

生平事跡

耶穌主要嘅生平事跡都記載喺四福音書入面。根據福音書入面嘅记载，佢喺大概公元28年或者29年，喺約旦河受咗施洗約翰嘅水浸禮後，就開始喺成個以色列同猶大傳道，主要係宣揚神的國嘅信息，周圍去醫病同驅鬼，喺傳道嘅過程入面佢不斷指責啲猶太嘅宗教領袖同祭司違背《舊約聖經》入面嘅誡命嘅精神，違背神嘅意志，必定受到神嘅懲罰。當中亦都有挑戰猶太嘅傳統，而宣稱自己係神個仔亦無辦法俾當時嘅人所接受。

但係希伯來聖經（《舊約》）曾經預言到有一個默西亞就快嚟到呢個世上，而且好多以色列人都知道耶穌所在嘅时間正係預言應驗嘅時候，佢哋好盼望以色列嘅救世主嚟到，可以令佢哋擺脫羅馬人嘅奴役。因為咁樣耶穌嘅門徒亦都逐步認識到佢係默西亞。耶穌嘅門徒喺書信中認為，耶穌喺傳道嘅過程中對人嘅體恤同關懷正係反映神對人嘅態度，亦為佢嘅門徒作出榜樣。四福音書入面嘅耶穌提出咗好多崇高嘅道德標準，並且指出，佢嘅門徒應該互相愛護，唔互相敵視同殘殺。佢亦警告門徒提防關於分黨結派等現象。

耶穌喺短短嘅3年半左右嘅時間入面主要喺北方嘅加利利海地區傳道。迦百農係佢主要嘅活動城市。