第一次世界大戰

出自維基百科,自由嘅百科全書
第一次世界大戰
第一次世界大戰戰事情況
第一次世界大戰戰事情況
日期: 1914年7月28號 - 1918年11月11號
地點: 歐洲非洲同埋中東(喺中國同埋太平洋群島都有少少)
結果: 協約國蠃咗。德意志帝國、鄂圖曼帝國、俄羅斯帝國同埋奧匈帝國玩完。多咗好多東歐同埋中歐嘅國家。
參戰方
協約國
俄羅斯帝國 俄羅斯帝國
法國 法國
英國 英國
意大利 意大利
美國 美國
大日本帝國
等等
同盟國
奧匈帝國 奧匈帝國
德意志帝國 德意志帝國
鄂圖曼帝國 鄂圖曼帝國
保加利亞 保加利亞
指揮官同領導者
俄羅斯 尼古拉二世
俄羅斯 亞歷山大·奇倫斯基
法國 佐治·克里孟梭
法國 費迪南·福煦
英國 赫伯特·亨利·阿斯奎斯
英國 勞萊佐治
英國 Douglas Haig
英國 John Jellicoe
英國 佐治五世
意大利 Victor Emmanuel III
意大利 Luigi Cadorna
意大利 Armando Diaz
美國 伍德羅威爾遜
美國 John Pershing
日本 嘉仁
奧匈帝國 法蘭茲約瑟夫一世
奧匈帝國 Conrad von Hötzendorf
德意志帝國 威廉二世
德意志帝國 Erich von Falkenhayn
德意志帝國 興登堡
德意志帝國 Reinhard Scheer
德意志帝國 埃里希·魯登道夫
鄂圖曼帝國 穆罕默德五世
鄂圖曼帝國 恩維爾帕夏
鄂圖曼帝國 凱末爾
保加利亞 斐迪南一世
傷亡同損失
戰死士兵:
5,525,000
受傷士兵:12,831,500
失蹤士兵:4,121,000[1]
戰死士兵:
4,386,000
受傷士兵:8,388,000
失蹤士兵:3,629,000[1]

第一次世界大戰粵拼dai6 jat1 ci3 sai3 gaai3 daai6 zin3,World War I),亦有人叫佢做大戰(Great War)、一戰,同埋完所有仗嘅仗(The War To End All Wars),係一個全球性嘅武裝衝突,主要喺1914年至到1918年歐洲打。由於主要戰場響歐洲,所以又叫「歐戰」。超過九百萬士兵同埋平民死咗。當時世界上大多數國家都捲入咗呢場戰爭,呢場仗對於二十世紀嘅歷史有決定性嘅影響,據估計損失咗1700億美元(當時幣值)。

協約國包括法國、俄羅斯帝國、英國,同埋(由1917年開始,因為德國打沉美國商船)美國。中國響1917年8月14號對德、奧宣戰。佢哋打敗咗同盟國,包括奧匈帝國、德國、鄂圖曼帝國、同埋保加利亞。意大利喺1915年入咗協約國,而俄羅斯就喺1918年3月退出唔打。

戰爭嘅導火線係1914年6月薩拉熱窩事件,戰線主要分做東線(俄國對德奧作戰)、西線(英法對德作戰)同南線(又叫巴爾幹戰線)(塞爾維亞對奧匈作戰),其中西線最慘烈。西線打嘅地方有一系列嘅壕溝同埋堡疊,中間有度叫無人地帶(No man's land)嘅地方隔開。呢啲堡疊由北海一直去到瑞士。呢種用靜態壕溝嚟打嘅仗,對於好多人嚟講界定咗呢場仗。喺東線,嗰度嘅大平原同埋有限嘅鐵路網絡阻止咗壕溝戰對峙嘅發生,但都係打到咁激。中東同埋意大利嗰邊都打得相當激嘅。海上面都有得打,甚至第一次喺天空有得打仗。

呢場仗使到四個帝國瓦解,包括奧匈、鄂圖曼、德意志同埋俄羅斯。德國冇晒佢啲殖民地,啲例如捷克斯洛伐克、愛沙尼亞、芬蘭、拉脫維亞、波蘭同埋南斯拉夫等等嘅國家獨立。呢場戰爭嘅開支為大英帝國嘅瓦解搭好咗舞台,亦都使到法國爛成代。

第一次世界大戰代表咗由拿破崙時代開始嘅舊世界秩序結束。呢場仗嘅結果係第二次世界大戰爆發嘅一個重要因素。

時序[編輯]

戰前各國結盟情況,意大利雖然喺戰前加入三國同盟,但係開戰之後冇出兵幫德國同奧匈帝國

1914年[編輯]

1914年6月28號,奧匈帝國皇儲斐迪南大公同夫人喺薩拉熱窩畀波斯尼亞塞爾維亞人普林西普刺殺身亡

7月23號,奧匈帝國向塞爾維亞王國發出最後通牒塞爾維亞同意大部分要求。7月28號,奧匈向塞爾維亞宣戰。7月31號,德國向俄國發出最後通牒,要求俄國喺12個鐘頭之內取消總動員,俄國冇理佢。

8月1號,德國向俄國宣戰,又向法國發出最後通牒,要求法國保持中立,法國冇回覆佢。8月2號,德國向比利時發出最後通牒,要求比利時畀德軍過境。8月3號,德國向法國宣戰。8月4號,德軍入侵比利時,英國向德國宣戰。

8月4號至16號,列日戰役,德軍攻佔比利時列日

8月6號,奧匈向俄國宣戰。8月12號,英國向奧匈宣戰。

8月23號,日本向德國宣戰。

8月23號至9月11號,加利西亞戰役,俄軍打贏奧匈軍,佔領咗利沃夫

8月26號至30號,坦能堡戰役,德軍打贏俄軍。

9月5號至12號,第一次馬恩河戰役,德軍對巴黎嘅攻勢畀協約國擋住。

9月28號至10月10號,安特衛普圍城戰,德軍佔領比利時嘅安特衛普

11月1號,俄國向鄂圖曼宣戰。11月5號,英法向鄂圖曼宣戰。

11月7號,青島嘅德軍向日軍投降。

12月1號,奧匈軍佔領貝爾格萊德,但係好快畀塞爾維亞軍收復。

12月22號至1915年1月17號,薩利卡米什戰役,俄軍贏咗鄂圖曼軍。

1915年[編輯]

1915年2月19號至1916年1月9號,加里波利之戰,協約國想打通博斯普魯斯海峽但係失敗咗。

1915年5月7號,盧西塔尼亞號客輪畀德軍潛艇擊沉。

5月23號,意大利向奧匈宣戰。

6月23號至7月7號,第一次伊松佐河之役,奧匈軍打贏意軍。

8月5號,德軍佔領華沙

10月14號,保加利亞向塞爾維亞宣戰。

1916年[編輯]

1916年2月21號至12月18號,凡爾登戰役,法軍擊退德軍進攻。

5月31號至6月1號,日德蘭海戰,德國海軍突破唔到英國海軍嘅封鎖。

6月4號,俄軍發起布魯西洛夫攻勢

8月27號,羅馬尼亞向奧匈宣戰。

12月6號,德軍進入布加勒斯特

1917年[編輯]

1917年9月高加索戰場形勢圖,黃色係俄軍佔領嘅鄂圖曼領土

1917年2月1號,德國恢復無限制潛艇戰

3月1號,美國公開德國外相詹默曼傳畀德國駐墨西哥大使嘅詹默曼電報。3月3號,詹默曼喺記者會承認詹默曼電報係真嘅。

3月11號,英軍進入巴格達

4月6號,美國向德國宣戰。

11月7號至8號,俄國發生十月革命

12月3號,新成立嘅蘇俄政府同德國宣佈暫時停火同準備停戰談判。12月9號,羅馬尼亞同同盟國簽署停戰協議。

12月11號,英軍佔領耶路撒冷

1918年[編輯]

1918年東線形勢

1918年1月8號,美國總統伍德羅威爾遜發表《十四點和平原則》。

3月3號,同盟國同蘇俄簽署《布列斯特-立陶夫斯克條約》。

7月15號至8月6號,第二次馬恩河戰役,德軍進攻畀協約國擊退。呢次係德軍響西線最後一次大規模進攻。

8月8號,協約國喺西線開始「百日攻勢」。8月8號至12號,亞眠戰役,德軍輸咗。

9月29號,保加利亞同協約國簽署《薩羅尼卡停戰協定》。

10月24號至11月3號,維托里奧威尼托戰役,以意軍為主嘅協約國軍打贏奧匈軍。10月28號,捷克斯洛伐克宣佈獨立,奧匈帝國開始解體。10月30號,鄂圖曼同協約國簽署《穆茲羅斯停戰協定》。

11月3號,奧匈帝國同協約國達成停火協議。11月9號,德國首相馬克西米利安親王宣佈德皇威廉二世退位。11月11號,德國同協約國簽署《康邊停戰協定》。

[編輯]

  1. 1.0 1.1 Evans, David. Teach yourself, the First World War, Hodder Arnold, 2004.p.188

睇埋[編輯]