日本

日本 にっぽん／にほん
旗仔 徽章
國歌：君之代（君が代）
屬地 （實轄）
京城	東京（とうきょう）
大埠	東京
幅員 國土：377,915平方公里（世界第61名） 水域：0.8%
海岸線長	29,751公里
時區	UTC+9
國民
官府語言	日文
人數 人數：127,960,000（2011年估）（世界第10名） 擠逼指數：337.1/km2（世界第36名）
民族	主要係大和族，重有少數嘅阿伊努族、漢族、朝鮮族等
政制
政制	君主立憲制、議會民主制
總統： 國家元首：天皇：明仁天皇 政府首腦：內閣總理大臣：安倍晉三
國家組織形式：
經濟
GDP	4.338兆美金（2010年估計數字）
中央銀行	日本銀行
貨幣	円（Japanese Yen，JPY）
資訊
國家象徵	國花 — 無法定國花（一般默認為櫻花或者日本皇家家紋上面既菊花）；國鳥 — 綠雉；國石 — 小晶
國家代碼	JPN
國家同地區頂級域	.jp
國際電話區號	81
編輯

日本，全名日本國，係東北亞一個島國，地處太平洋，毗鄰中國、朝鮮半島、俄羅斯等，領土由北海道、本州、四國、九州同六千幾個小島組成。第二次世界大戰後頒布嘅日本國憲法規定日本司法、行政、立法三權分立，天皇只有象徵意義，國家大權由首長同國會掌握。

日本經濟規模排世界第三，比美、中國細，但人均收入係先進國家水平。舊時佢學咗中國唔少嘢，明治維新後轉而向西方取經，喺亞洲以至世界政治、經濟同文化上，都有唔少影響力。

一般資料

• 國旗：日之丸（白色底，中間有個紅色圓形，代表無光芒嘅太陽），由於外觀好似一貼膏藥咁，所以又叫「膏藥旗」。
• 電壓：100V，50Hz（東部）／60Hz（西部）

名

由於日本響中國嘅東面，而太陽就響東面升起，所以古人就認為太陽係來自呢個東面嘅地方。日本人叫自己嘅國家做「日本」，係「太陽嘅根」嘅意思。日本有好多種古稱或者異稱，好似自稱嘅葦原中國（《古事記》、《日本書紀》）、水穗國（《古事記》）、瑞穗國（《日本書紀》）、大八洲國（《日本書紀》）、磯輪上秀真國、細矛千足國、玉垣內國（《神皇正統記》）、浦安國、藤根國（《詞林采葉抄》）、日出處、大和國、和州、大日本帝國等。中國亦都用過倭國、大倭國、倭奴國、倭人國、扶桑、蓬萊、東海姬氏國、東海女國、君子國、若木國、日東、日下、烏卯國、阿母鄉、東瀛、東洋等叫法。

因為日文成日㗎㗎聲，香港有啲人會用個「㗎」字（家牙切）代表日本。例如「㗎仔」（日本男人）、「㗎妹」（日本後生女）同「㗎文」（日文）。亦有人叫日本人做日本仔或者蘿蔔頭。

歷史

歷史分期

內文： 日本史

• 繩文時代
• 彌生時代（約公元前300─約300)
• 古墳時代（大和時代）（約300─710）
• 奈良時代（710─794）
• 平安時代（794─1185）
• 鎌倉時代（1192－1334）
• 南北朝時代（1335－1392）
• 室町時代（1393－1575）
• 戰國時代（1467－1575）
• 安土桃山時代（織豐時代）（1576－1600）
• 江戶時代（1604－1867）
• 明治時代（1868－1911）
• 大正時代（1912－1925）
• 昭和時代（1926－1989）
• 平成時代（1989－）

鄰國關係

秦朝秦始皇派徐福搵長生不老藥，據野史所講佢就係帶咗啲童男童女去到日本。

日本嘅最早記載係響中國三國時代，當時叫做倭國，推斷大概係九州地方北部或者近畿地方。

隋唐時代，日本向中國派送大批遣隋使同埋遣唐使。嗰段時間係日本學中國文化嘅一個高潮。

元朝忽必烈想侵略倭國，傳聞因為蒙古人不諳水性，好衰唔衰又撞着打風，終於無功而退。

明朝開始，倭國人同中國沿海走私商人勾結，開始響中國沿海地區做賊，俾人叫做倭寇。

1894年，日本武力侵佔朝鮮，強逼朝鮮國王后「請求」皇軍將清國勢力趕出朝鮮半島。8月1日，日本向清國宣戰，正式揭開中日甲午戰爭戰幔。1895年2月殲滅清國嘅北洋艦隊，4月17日同清政府晌日本馬關簽訂《中日馬關條約》。

1900年日本派遣2.5萬軍隊侵華，係組成八國聯軍其中一份子。嗰年8月14日，八國聯軍攻陷北京。

1904年參與日俄戰爭。

1916年8月13日，非法進駐鄭家屯，同奉天廿八師衝突，史稱鄭家屯事件。

1928年，日本進攻中國濟南。皇軍晌濟南姦淫擄掠，屠殺中國軍民5000幾人，是為「濟南慘案」。

1931年9月18日，關東軍炸咗瀋陽郊外柳條湖嘅「南滿」鐵路，老屈係中國做嘅，起勢咁進攻附近嘅北大營同瀋陽城，是為九一八事變。

1932年1月28日，日本進攻上海閘北，挑起一二八事變（又叫上海事變）。駐守上海嘅十九路軍奮起反擊，展開淞滬抗戰。日軍受到沉重打擊，死傷萬幾人，四度更換司令。

1932年3月9日，日本捧返滿清皇帝愛新覺羅溥儀出返嚟做傀儡皇帝，晌長春成立偽滿州國，年號大同。1934年，滿洲國改稱滿洲帝國，改年號康德。

1937年7月7日，日本發動蘆溝橋事變（又叫七七事變），日本借口唔見咗個士兵，砲轟蘆溝橋，展開咗中國八年抗戰。嗰年12月，日軍佔領南京，隨即展開大屠殺，有啲士兵以比賽殺死中國人多為樂，據中國政府估計，共殺咗30萬人，史稱南京大屠殺，不過日本政府認為證據唔夠確鑿，依然死口唔認。

直到而家，日本同中國、俄羅斯、南韓等等國家都重有領土爭議，例子：釣魚台。

第二次世界大戰

第二次世界大戰嗰陣，日本係「軸心國」之一，目的係要喺東亞建立「大東亞共榮圈」。

1941年12月8號，首相、內閣總理大臣兼內務大臣、陸軍大臣東條英機發動偷襲夏威夷珍珠港嘅軍事暴行。9號，令原本表示中立嘅美國正式向日本宣戰。

1945年8月，美國掟咗兩粒原子彈落日本嘅廣島同長崎，15號，日本宣佈無條件投降，16號，裕仁天皇發放停戰詔書。9月2號，日本嘅外交同軍方代表喺投降書上面簽字，第二次世界大戰正式結束。之後，日本制訂和平憲法，入面嘅第九條就規定咗日本唔可以擁有軍隊。但喺1950年代日本嘅警察部隊逐步發展成一支專守防衛嘅自衛隊。

日軍喺第二次世界大戰嗰陣嘅暴行，令被日本侵略嘅東亞各國對日本有個好壞嘅印象。

地理

地圖

內文： 日本地理

地理上，日本位於北太平洋同日本海之間，中國東北面、朝鮮半島東面、俄羅斯東南面、台灣北面，主要包括本州、北海道、九州、四國四大島域，再加上三千幾個小島組成，全國面積細過美國嘅加州少少。

工業

日本係世界上主要嘅生產國，生產技術先進，生產規模亦好廣，工業範疇主要包括汽車、電子儀器、機械、鋼鐵、造船、化工、成衣、食品同埋演藝（譬如動漫同成人電影）。

宗教

日本人信奉好多宗教，重要嘅有本土嘅神道敎，崇拜自然，山又拜得一餐，石又拜得一餐，重有經海路傳入嘅佛敎，呢兩個宗教共佔84%。基督敎曾經有過相當信徒，因為葡萄牙嘅天主敎傳敎士喺16世紀嚟到日本，主要響九州一帶宣道。不過經過鎮壓，而家敎徒唔夠三百萬。當代最大嘅日本新宗敎團體係創價學會。

名勝名城

• 北海道
  • 札幌、函館、知床、富良野、新雪谷（二世古）
• 東京
  • 東京鐵塔、芝公園
  • 澁谷、原宿、銀座、池袋、新宿、六本木、秋葉原（東京嘅購物中心）
  • 臺場、富士電視台、彩虹大橋
• 千葉
  • 東京迪士尼樂園
• 神奈川
  • 橫濱、箱根、熱海、鎌倉
• 栃木
  • 日光
• 靜岡
  • 富士山（全國最高嘅睡火山，海拔3776米）
• 愛知
  • 名古屋
• 京都
• 大阪
• 奈良
• 兵庫
  • 神戸、姬路城
• 廣島
• 福岡
• 熊本
• 長崎
• 沖繩
• 縱橫交錯嘅鐵路系統（日文：鉄道）

運動

1964年東京舉行夏季奧林匹克運動會，係奧運會第一次喺亞洲舉行。

1972年札幌舉行冬季奧林匹克運動會，亦都係第一次喺亞洲舉行嘅冬季奧運會。除咗之外，1998年長野又舉行冬季奧運會。

2002年日本同南韓一齊主辦世界盃，係世界盃第一次喺亞洲舉行，亦係第一次由兩個國家合辦。

日本職業足球聯賽（J-League）自從1993年5月開始啟動，分J1、J2兩級，參賽球會包括鹿島鹿角、名古屋八鯨、F.C.東京、磐田山葉、橫濱水手、清水心跳、浦和紅鑽、大阪櫻花等等，由於歷年嚟吸引咗唔少國腳級嘅球員效力，歷史短短但係已經發展成為東亞地區較為成功嘅職業足球聯賽之一。

而本身起源於日本嘅體育活動包括相撲、柔道、劍道同空手道等等。國內比較受歡迎嘅體育活動就包括足球、棒球、馬拉松等等。

特色嘢食

壽司

日式拉麵

• 壽司（鮨、鮓、すし）
• 生魚片（魚生/刺身/沙西米）（さしみ）
• 麵食，包括日式拉麵、日式炒麵、蕎麥麵、烏冬麵、素麵、沖繩麵等等
• 火鍋，包括斯蓋瓦蓋、力士火鍋、砂煲砂煲、石狩鍋、湯豆腐等等
• 京風料理，包括懷石料理、有職料理、精進料理等等
• 日式串燒、爐端燒
• 天麩羅
• 炸豬扒、炸肉串、炸大蝦等
• 鐵板燒
• 日式餃子
• 街頭小食，包括關東煮、御好燒、燒八爪魚丸、團子、糯米粢等等
• 綠茶、玄米茶等

主要天然災害

• 地震
  • 1730年北海道地震
  • 1896年三陸地震
  • 1923年關東地震
  • 1994年八戶地震
  • 1995年阪神地震
  • 2007年能登半島地震、新潟縣中越沖地震
  • 2011年日本東北地震
• 海嘯
• 颱風
• 雪害

出面網頁

• 紀念日本戰敗六十週年
• 日本國際觀光振興機構（日本政府官方旅遊網頁）