足球

足球

足球（Football，或者叫association football、soccer），係一種由兩隊人互攻嘅波類運動。以英式十一人足球比賽為例，每隊波最多會有十位球員同一個守門員比賽，目標就係要將個波踢入對方龍門，每入一球就得一分，最後邊隊入得多啲就為之贏。踢波特點係只可以用腳踢，唔可以用手掂個波，不過亦有例外，例如守門員就可以喺禁區入面用手，又或者掟界外球都可以用手，其他情況一律唔畀用手。

足球運動係而家世界上最受歡迎嘅運動之一。

足球源頭爭議

足球到底係點樣嚟一直存在爭議，有人認為佢係源於古中國蹴踘嘅運動，史載漢朝將領霍去病就係用蹴踘訓練軍隊。

亦有人認為足球係起源自Harpaston人，喺羅馬帝國統治時期傳到歐洲，嗰陣叫做Harpist。最初係一種好暴力同好危險嘅遊戲，甚至有人會踢波踢死，所以14世紀英國王室曾經頒佈過禁令甚至罰錢，但民間就一直延續呢種活動。

而現代足球就因為英國人嘅提倡而風行全球。

喺16、17世紀，英國嘅足球遊戲並冇一定嘅規律，亦冇正式嘅統籌組織，呢個局面維持咗幾百年歷史。1863年英國足球總會成立，當時有人主張用手，但有另一派主張唔可以用手，而主張用手一派喺後來發展出英式欖球。一直到19世紀中，至開始出現有組織嘅團體。而正式規則亦隨之而確定。

到咗今時今日，四年一度嘅世界盃同各國嘅職業聯賽掀起咗全球嘅足球熱潮，令足球成為最受人歡迎嘅運動項目。

足球賽事嘅內容

足球嘅比賽一路發展落嚟已經有佢自己一套嘅遊戲模式，而為咗維護足球比賽嘅基本意義同埋人民精神，足球運動嘅最高決策機構國際足球協會訂落一系列嘅球賽細則，確保所有正式球賽都會喺同樣嘅準則下進行，亦會不時改進球例嚟配合唔同嘅需要。

足球比賽要有嘅嘢

一場正式嘅足球比賽，首先要有一個足球場用嚟比賽，而規格係要根據國際足球協會所訂嚟設計。

參與嘅人

足球比賽唔一定要有觀眾，但就一定會有落場比賽嘅球員，而正式嘅比賽重會有球證根據國際足球協會所訂嘅規則嚟執法，確保比賽公平公正。

球證

正式比賽嘅足球場內通常會有四位球證，一位主球證會喺場入面近距離跟住個波或者控球嘅球員而走動，睇實佢哋有冇犯規，佢身上會配有一支哨子，用嚟吹響示意比賽開始或結束，吹罰犯規、個波出界或示意換人等等；另外佢身上會袋住一張黃牌同埋一張紅牌，黃牌係用嚟警告球員犯規，表示如果再犯領黃就要趕出場，而紅牌就係畀啲嚴重犯規，或者已經得到一張黃牌而又再犯黃牌嘅球員，每次當球員初犯時見到主球證隻手插入袋要攞牌嘅時候都祈禱希望只係黃牌，因為如果抽出嚟嘅紅牌嘅話，即係表示要趕佢出球場。

除咗主球證之外重有兩位旁證，佢哋唔會企入球場入面而只會分別企喺兩方區域嘅邊線上下游走；佢哋嘅手上會各拎一支旗（多數係黃紅色格仔旗），用嚟傳遞重要訊息畀場內主球證，例如個波係由邊方球員踢出界、進攻球員有冇越位、邊個球員動作過激要吹罰…等，有時主球證睇唔到一啲球員嘅犯規動作，就會同最接近嘅旁證了解事件，跟住先決定判唔判罰。

重有一個第四旁證，一般嚟講係負責場邊換人，檢查吓出場嘅球員身上嘅配備有冇問題，舉燈牌示意換人嘅號碼，而當球賽到咗中場前或者完場前，亦會跟據主球證畀嘅訊號而用燈牌示意嗰場波會補幾多分鐘比賽時間。

球員

每場比賽通常都係由兩隊球隊進行競技，而大場比賽嘅每支球隊都會派出十一名選手落場比賽，另外重會有幾名（五至八名）後備球員負責替補，至於一場正式比賽嘅替補名額係可以換三個人。

落場嘅十一個人，分別會負責唔同嘅崗位，包括企最前負責進攻爭取入波得分嘅前鋒，喺前鋒後面少少嘅係中場，中場又分為進攻中場同埋防守中場兩種，前者主要協助前鋒進攻，而後者就主要協助防守，而喺中場後啲就係主要負責防守嘅後衞；有人話後衞係龍門前嘅最後一道防線，係因為闊7.3米嘅龍門前面只有一個守門員，雖然話守門員係可以用手掂波，但其實如果後衞有咩閃失而令對方形成單刀，守門員一個人好難守得晒成個龍門，咁對方入波得分嘅機會就好大。

出面網頁

• FIFA：足球歷史

維基同享有多媒體嘅嘢：

足球