南京

出自維基百科,自由嘅百科全書
跳去: 定向搵嘢

座標: 32°03′36.6″N 118°47′49.4″E / 32.060167°N 118.797056°E / 32.060167; 118.797056

中華人民共和國 > 江蘇省 > 南京市
南京
南京市
由頂順時針方向:1.南京城、玄武湖、紫金山;2.南朝石刻辟邪;3.鷄鳴寺;4.挹江門同南京城牆;5.夫子廟、秦淮河夜景;6.奧體中心;7.明孝陵神道;8.中山陵
由頂順時針方向:1.南京城、玄武湖紫金山;2.南朝石刻辟邪;3.鷄鳴寺;4.挹江門同南京城牆;5.夫子廟秦淮河夜景;6.奧體中心;7.明孝陵神道;8.中山陵

簡稱:寧
花名:金陵、石城、石頭城
舊名:冶城、越城、石頭城、金陵、秣陵、建業、建鄴、建康、丹陽、揚州、秦淮、上元、昇州、蔣州、白下、江寧、集慶、應天、南都、京師、天京、首都[1]
南京位置圖
南京位置圖
經緯度 北緯32°02′38″東經118°46′43″
中華人民共和國 中華人民共和國
江蘇
地級政區 副省級市
轄下一級政區 11區[2]
轄下二級政區 81條街道、19個鎮[2]
創城史 前571年有地方建置[1]
前472年建城[3]
前333年建置[1]
設市年 1927年[1]
市委書記 楊衞澤
市長 繆瑞林
地理
總面積 6587.02[2] km²
水域面積 752.06[5] km² 佔11[6]%
市區面積 693.51[4] km²
城市化率(2012) 80.23[7]%
海拔 4~448.9米[6]
平均8.9米 m
水域面積源於中文維基百科。
人口
總人口(2013) 818.78萬人[8][9]
戶籍人口(2013) 643.09萬人[9]
市區(2010) 510.59萬[7]
人口密度 1239人人/km²
民族 漢族
官方語言 普通話
本地語言 江淮官話洪巢片南京小片南京話
人口密度據中文維基百科。市區人口係市區非農業戶籍人口。
經濟
GDP(2013) 8011.78億元人民幣[9]
人均GDP 98011元人民幣[9]
市區GDP(2013) 8011.78億元人民幣
市區人均GDP 39881元人民幣[9]
時間
時區 中國時區UTC
識別信息
電話區號 +86 (0)25[8]
郵政編碼 210000-211000[8]
車牌 蘇A[8]
象徵
市樹 雪松[8]
市花 梅花[8]

市區GDP、最低海拔及平均海拔據中文維基百科。
網站 中國南京

南京粵讀:naam4 ging1普通話拼音Nanjing威式拼音:Nan-ching,傳統英文名:Nanking),簡稱ning4,別名金陵gam1 ling4石(頭)城sek6 tau4 sing4,喺長江下游沿岸,係中華人民共和國江蘇省省會,同時係中華民國名義上嘅首都,自古以來係中國嘅重要都會,素稱「東南門戶、南北咽喉」[3]

南京係中國歷史文化名城,有二千幾年歷史,做過多次國都,係「中國四大古都」之一,有「六朝古都」甚至「十朝都會」之稱,歷史遺存同埋自然景觀令南京成為中國嘅旅遊城市之一。南京係中國15個副省級市之一,即係喺經濟、出臺政策方面享有近乎於省級嘅自主權。南京亦係揚子江下游、長三角經濟區嘅產業城市同經濟中心,江南地區嘅文化(敎育、學術)同政治中心,作為商業中心喺華東僅次於上海[10]。長江、京滬鐵路喺呢處交匯,係華東地區嘅交通樞紐。

南京總面積6587.02 km²[2],總人口818.78萬人(2013年)[9]。2013年南京GDP 8011.78億元人民幣[9],人均GDP 9萬8011元[9],城鎮居民人均可支配收入3萬9881元,農民年人均純收入1萬6531元[9]。城鎮登記失業率2.67%[9]

南京

三國諸葛孔明對南京嘅讚嘆至體現南京喺中國嘅歷史政治地位:

鐘山龍蟠,石頭虎踞,真乃帝王之宅也!

意思就話鐘山(紫金山)畀長江呢條巨龍蟠住,而座山似隻虎踞伏,有龍虎相守,係個有帝王之象嘅地方,定做國都啱曬。所以歷代中原王朝南渡,都揀南京做首都,不過有個歷史現象幾得意,定親南京做首都嘅王朝,基本上都唔長久,而且風雨飄搖。於是又有人話南京風水差,至於點差,無人知,有傳聞話秦始皇有日見到南方有紫氣昇(紫金山嘅名又一種講法),啲人話嗰度會出帝王,秦皇自然唔想有人搶佢位,於是挖崩啲山、挖咗條秦淮河,秦淮河彎彎曲曲,係金粉胭脂地,就話紅顏禍水禍君王,藉此搞衰南京風水[11][12]。不過,呢個只係民間笑談[3]。雖則有噉嘅傳聞,南京依然係受歡迎嘅都城選址,孫中山喺《建國方略》就讚:「……其位置乃在一關善之地區,其地有高山,有深水,有平原,此三種天工,鍾毓一處,在世界中之大都市誠難覓如此佳景也。」[3]

因為南京喺民國係國都,喺日本侵華時專登喺南京大屠殺,30萬人畀日軍殘殺,係人道災難同侮辱國格。

[編輯]

「南京」嘅字面意思就係「南面嘅京師」,「京」講明佢曾經貴爲首都,而「南」係相對於中原嘅洛京而言,因為自古以來洛陽視爲「天地之中」,係中原嘅中心地帶,稱爲「神都」,中國首都本來應該定喺中原,而而家方位有所偏差,於是就喺前面加個方位來表示。類似嘅有北京,以及曾經嗌過做「西京」嘅西安

重有遞種講法認為南京喺明朝時原本係全國首都,後來遷都北京,南京變成留都,結果就有南北兩京嘅講法,譬如明朝時將漢地概括爲「兩京十三省」。

此外佢重有好多個名:六朝古都luk6 ciu4 gu2 dou1係話佢係東吳東晉南朝;而十朝都會sap6 ciu4 dou1 wui6則係喺六朝嘅基礎上加埋南唐明朝太平天國民國[3]。實際上佢重係楊吳嘅西都、南宋嘅行都。

「金陵」呢個名係南京有名嘅雅稱,佢嘅出處有三種講法:帝王埋金、金壇、因山立號。詳情可睇呢度。而「石(頭)城」出自於南京城第一次建置喺石頭山;而簡稱「寧」出自於清代時呢度所屬政區江寧府。

而其他主要嘅名:秣陵mut6 ling4出自於秦始皇對呢度嘅貶低[13]建業gin3 jip6出自孫權祈求創立一番帝業嘅青雲志,而同音嘅建鄴gin3 jip6則係晉朝滅吳後要改呢個故都嘅名;建康gin3 hong1係因爲要避忌司馬鄴嘅名;江寧gong1 ning4出自晉武帝對呢度嘅感嘆:「外江無事,寧靜於此」;應天jing3 tin1出自「順人應天」,呢個名係用來讚頌新立嘅明朝[14]

[編輯]

南京歷史豐富,同長安洛陽燕京並列爲中國四大古都,其中南京喺中國史度有特殊地位、價値,朱偰話:「此四都之中,文學之昌盛,人物之俊彥,山川之靈秀,氣象之宏偉,以及與民族患難相共,休戚相關之密切,尤以金陵爲最」[1]。噉係因爲南京嘅地理位置、風水特別,喺中原畀異族佔領、唐人就來滅種之際,南京就成爲休養生息繼而北伐、恢復中華嘅基地,畀人睇做係唐人嘅復興之地[1]。大明、民國嘅北伐贏咗,東晉、蕭梁、劉宋嘅北伐亦功敗垂成;南宋啱起時群臣都想定都呢度來矢志收復中原,不過宋高宗唔想搞就定都去杭州,不過亦迫於輿論定南京爲行都[1]

商周時期,秦淮一帶就有密集嘅村,稱爲湖熟文化,到春秋戰國時呢啲村開始發育爲城市;3100年前,南京地方係西周周章嘅封地。周靈王元年(前517年),楚國喺今日六合設棠邑,置大夫,南京開始建置政區。前495年左右吳王夫差喺冶城山(今日朝天宮一帶)築冶城,開辦鍊銅作坊。周元王四年(前472年)越國滅吳後,范蠡喺今日中華門外秦淮河南築越城,一般將呢年定爲南京正式建城年,距今已過2500年[3][15]。周顯王三十六年(前333年),楚國征服越國,楚威王熊商喺石頭山(相傳係今日嘅清涼山)築金陵邑,所以南京又叫「金陵」「石頭城」。秦始皇三十七年(前210年),秦皇南巡,將金陵邑改名秣陵縣(秣讀抹),併從金陵地區開始修築穿過江蘇東南同浙江東北嘅馳道。傳說秦皇之所以改名,係因為聽到「金陵王氣」嘅傳言,嬲嬲哋就將「金」改成「秣」,「秣」嘅意思係「餵馬嘅草料」[13]來貶低呢度。

直到三國之前,南京祇係普通嘅縣。211年,孫權移治所去秣陵,遞年改名建業,以求帝業興旺。229年孫權稱帝,東吳都城從武昌搬去「鐘山龍盤,石頭虎踞」嘅建業,南京自此由縣蛻變成都城。後來晉滅東吳,太康三年(282年)建業嘅業字改成「鄴」(鄴讀業)做建鄴,後來因為要避晉愍帝司馬鄴嘅名諱,建興元年(313年)建鄴改叫建康永嘉喪亂之後,晉室南渡,瑯琊王司馬睿喺呢度中興基業,定都建康,入南北朝時代。期間南京一直係中華正朔所在,保住正宗中華文化,人稱「江左風流」。之後嘅宋齊梁陳都定都呢道,同東吳、東晉合稱六朝,所以南京有名嗌「六朝古都」。

六朝時南京好繁華,係南京第一個黃金時代,謝朓嘅詩句「江南佳麗地,金陵帝王州」就係經典概括[3]。六朝嘅建康係當時世上最大嘅城市[1],人口過百萬,係世界上第一個人口達百萬級嘅都會[1]。六朝嘅南京同羅馬並列爲「世界古典文明兩大中心」[1]

當時建康文化繁榮,劉義慶世說新語》、鍾嶸詩品》、昭明太子文選》、范曄後漢書》、裴松之三國誌註》、沈約宋書》、蕭子顯南齊書》等等重要嘅文史著作喺建康寫成。當時建康紙醉金迷,佛教大興,居民28萬戶左右,而僧尼達10萬餘,梁武帝先後四次喺同泰寺捨身出家,當時建康佛寺好宏麗,規模大嘅號稱「騎馬關山門」,因此唐人杜牧寫詩嘆「南朝四百八十寺,多少樓臺煙雨中」。589年2月,隋軍南征,攻入臺城,喺景陽樓嘅井度活捉陳後主同佢嘅兩個妃子,之後隋文帝落令城邑、宮殿通通毀壞,變曬做田,僅喺石頭城設蔣州,屬江寧縣,南京第一次繁華結束。因為南朝介乎漢唐,同時中國經濟文化重心南移,南京作為中心承前啟後,喺四大古都別具特色。

隋唐兩代,中原朝廷刻意打壓金陵故都,喺唐朝時有130年貶爲潤州屬縣,不過隋朝開掘嘅大運河令長江對面嘅揚州成爲貨物集散地,帶挈起金陵,於是六朝嘅繁華再現,金陵依然係南方一個經濟、文化中心,李白、劉禹錫、杜牧、李商隱呢啲文豪都住過、遊過呢度。唐初設金陵郡,後升爲昇州,所屬嘅縣先後改名爲金陵縣白下縣上元縣

五代時中原諸雄相爭、戰亂唔停,江南安定過北方,從楊吳開始有70幾年無戰亂,於是楊吳時改設金陵府,拓築金陵城。之後金陵成為十國之中最強嘅南唐嘅首都,改名江寧府。當時金陵經濟繁榮,秦淮河一帶商賈雲集,買賣興旺,隨之文化發達,詩詞、書畫都開咗一代新風,南唐皇帝李璟李煜都係有名詞人,諸如「細雨夢回鷄塞遠,小樓吹徹玉笙寒」(李璟)、「問君能有幾多愁,恰似一江春水向東流」(李煜)呢啲金句都係金陵城中誕生。

北宋滅南唐後,重置昇州,無耐又叫江寧府。南宋建炎三年改爲建康府,元朝改為集慶路。宋元時期南京嘅城市規模保持住南唐嘅水平,由始至終係江南經濟重鎮。北宋時王安石三次以宰相之位擔任江寧知府,重定居、終老於此;南宋時岳飛係城南嘅牛首山大敗金兵;宋高宗三次駐蹕建康府,達一年半;元代時城內設東、西織染局,大量生產絲綢,專業工匠六千幾戶。宋代時金陵城其實係有機會做首都嘅,喺靖康亂之後,康王趙構就喺呢度登基爲宋高宗,不過之後金兵南下,宗澤嘅部下杜充無能、失地千里,喺完顏宗弼攻過長江後向金軍投降,最後金陵陷落,宋軍失咗呢座江南大城,雖然話建炎四年(1130年)岳家軍收復建康城,不過自此南宋就唔敢定都建康而偏安於臨安

1356年,朱元璋攻佔集慶,改名應天府。1368年朱元璋開創明朝,以應天爲京師,用21年修築號稱96里長嘅城牆(實長35.267公里,係世界第一大城垣[1]),南京第一次成為全中國嘅首都,成個明朝係佢嘅第二個黃金時代,當時南京係世界上最大嘅都城[1],鷄籠山邊嘅國子監學生達萬人,重有日本、朝鮮嘅留學生添。朱棣奪得帝位後,1421年遷都順天府(北京),而應天府成為留都,自此有南北二京嘅講法。當時啲人對遷都好大意見,所以到佢嘅仔明仁宗登基時直接返南京,但因爲佢登基一年之後就駕崩,結果京師遷唔返去,北京確定爲國都,但開國皇帝嘅皇陵(明孝陵)喺南京,兼且佢係先皇開國登基之地,所以南京獲得留都嘅地位,設南直隸,由南京六部(留守政府)管轄。作為留都,南京嘅設置配套同北京相當,比如原本位於而家明故宮遺址公園一帶嘅南京紫禁城,就係而家北京紫禁城嘅藍本。雖則話遷咗都,南京作爲當時中國經濟文化中心嘅地位無變,比如鄭和去西洋嘅船隊就係呢度出發,江南貢院江寧織造府呢啲重要文敎、經濟機構喺呢度。

1645年清軍攻陷南京,降格爲江寧府,不過民間習慣叫南京。期間南京嘅經濟地位依然好重要,康熙乾隆曾六次遊南京。雖然因爲係大明故都而遭受貶抑,清代時嘅南京依然係重要嘅文化中心,四大名著之首嘅《紅樓夢》,入面諸多情節、人物、景觀、習俗、話,都係源出南京;江南貢院喺光緒年間有兩萬幾間號舍,規模全國第一[3]。1842年鴉片戰爭清朝失敗,喺南京下關江面嘅英國軍艦康華麗號簽江寧條約(南京條約)。1835年太平天國定都南京,改名天京,在此建都11年。因為動亂,南京一度蕭條,後來鐵路通車,南京先恢復返。據1858年《天津條約》、1860年《北京條約》,南京成爲通商口岸。晚清,喺呢度先後任南洋大臣兼兩江總督嘅曾國藩李鴻章左宗棠沈葆楨張之洞劉坤一端方等重臣都係洋務運動嘅領軍,因此當時南京係洋務新政嘅實踐地,發展咗近代文教、交通、工業,到1910年,城內有名嘅公立、教會興辦嘅新式學堂達48間。

1912年中華民國喺南京成立,孫中山做臨時大總統,江寧府改爲南京府,南京再一次成為首都。1927年4月18號南京成立國民政府,之後南京府正式建市,爲南京市(1927年2月18號設南京特別市、1929年6月1號安葬孫中山後設首都特別市,1930年改爲直轄市),係民國十二直轄市同六大都會之一。1927年到1937年稱為南京十年,南京城市發展迅速,成為現代都會。

1937年日本全面侵華,12月13號南京淪陷之後,日軍對平民、戰俘屠殺咗六個星期,30萬人遇難,是為南京大屠殺。1946年民國政府從重慶還都南京,1949年解放軍攻佔南京,成為家下嘅南京市。喺共和國初期,南京係13個直轄市之一;1952年9月蘇南、蘇北兩個行政區合併爲江蘇省,喺11月15號南京市由直轄市改爲江蘇嘅省轄市,1953年1月1號成爲江蘇省城。1994年2月南京昇爲副省級市

轄下變動年表[編輯]

南京市(直轄市,1949年到1953年)[編輯]

  • 1949年10月1號,成立中華人民共和國直轄市南京市,按數字設從一區到十三區外加郊區(14區)
  • 1950年1月,上個月南京所得嘅縣全數退返原先嘅地區(14區)
    • 6月,南京重新劃市區,又按數字設從一區到十一區外加中山陵園區大廠鎮(12區1鎮)
  • 1953年6月,八區畀咗部分去江蘇省揚州專區六合;九區、十區、十一區各有一部分去咗江蘇省鎮江專區江寧;十一區淨落部分同鎮江專區嘅江寧、句容兩縣各出嘅部分併到九區;六合畀咗部分去大廠鎮(11區1鎮)
    • 10月,九區退咗部分去句容(11區1鎮)
    • 12月17號,南京由直轄市降爲江蘇嘅省轄市。

南京市(省轄市,1953年至1966年)[編輯]

  • 1955年11月15號,一區改名玄武區、二區改名白下區、三區改名秦淮區、四區改名建鄴區、五區改名鼓樓區、六區改名下關區、七區改名浦口區、八區改名燕子磯區、九區改名棲霞區、十區改名雨花臺區(11區1鎮)
    • 12月13號,鎮江專區嘅江寧畀咗部分分畀雨花臺、中山陵園、棲霞;句容畀咗部分去棲霞;揚州專區嘅六合畀咗部分分畀燕子磯、大廠鎮、浦口;江浦畀咗部分去浦口(11區1鎮)
  • 1956年2月22號,江寧再畀部分去雨花臺;六合再畀部分去大廠鎮;浦口退咗部分去江浦(11區1鎮)
    • 5月21號,江寧畀咗部分去秦淮(11區1鎮)
  • 1957年5月16號,句容再畀部分去棲霞(11區1鎮)
  • 1958年7月6號,揚州專區嘅六合、江浦同埋鎮江專區嘅江寧再次劃歸南京(11區1鎮3縣)
    • 9月20號,江寧畀咗部分去安徽省蕪湖專區嘅馬鞍山市(11區1鎮3縣)
    • 11月5號,大廠鎮併入浦口;雨花臺、中山陵園以及燕子磯、棲霞兩區各出部分合併爲郊區;燕子磯同棲霞淨低部分併入下關(8區3縣)
  • 1960年4月21號,六合畀咗部分去浦口(8區3縣)
    • 9月19號,郊區解散,分入玄武、白下、秦淮、建鄴、鼓樓、下關(7區3縣)
  • 1962年7月,下關畀咗部分去鼓樓(7區3縣)
    • 9月25號,江寧退返鎮江專區、六合同江浦退返揚州專區(7區)
  • 1963年4月17號,下關、鼓樓各出部分恢復燕子磯;鼓樓、玄武各出部分恢復棲霞;玄武、白下、秦淮各出部分成立陵園區;秦淮、建鄴各出部分成立雨花區;鼓樓、建鄴各出部分成立江東區(12區)
    • 7月,陵園區改名中山陵園區、雨花區改名雨花臺區(12區)
  • 1965年5月19號,燕子磯併入棲霞;中山陵園、江東併入雨花臺;鼓樓畀咗部分去棲霞(9區)

南京市、六合專區(1966年到1970年)[編輯]

  • 1966年3月5號,劃揚州專區嘅六合縣、儀徵縣、江浦縣、金湖縣淮陰專區盱眙縣成立六合專區(專區5縣)
  • 1967年3月20號,玄武區改名爲要武區、白下區改名爲朝陽區、秦淮區改名爲遵義區、建鄴區改名爲紅衞區、鼓樓區改名爲延安區、下關區改名爲東方紅區(市9區)

南京市、六合地區(1970年到1971年)[編輯]

  • 1970年,六合專區改名爲六合地區(地區5縣)
    • 1月28號,要武、雨花臺、棲霞各出一部分成立鐘山特區(市10區)
  • 1971年2月22號,六合地區嘅江浦、鎮江地區嘅江寧畀咗南京(市10區2縣);另外六合地區解散,除咗江浦畀南京,盱眙、金湖畀咗淮陰地區,六合、儀徵畀咗揚州地區

南京市(1971年至今)[編輯]

  • 1973年9月,浦口分出部分成立大廠區(11區2縣)
    • 11月,要武區復名爲玄武區、朝陽區復名爲白下區、遵義區復名爲秦淮區、紅衞區復名爲建鄴區、延安區復名爲鼓樓區、東方紅區復名爲下關區(11區2縣)
  • 1975年10月4號,大廠重歸浦口、鐘山特區併入棲霞(9區2縣)
    • 11月8號,揚州地區嘅六合畀返南京(9區3縣)
  • 1979年4月20號,安徽省滁縣地區來安縣嘅一部分畀咗浦口(9區3縣)
  • 1980年4月26號,浦口同六合各出部分成立大廠區(10區3縣)
  • 1983年1月18號,鎮江地區嘅高淳縣溧水縣畀咗南京(10區5縣)
    • 10月8號,大廠畀咗部分去六合(10區5縣)
  • 1984年10月13號,棲霞畀咗部分分入玄武、下關;雨花臺畀咗部分分入白下、秦淮、建鄴;建鄴畀咗部分去秦淮;下關、建鄴各畀一部分去鼓樓;鼓樓另畀一部分去建鄴(10區5縣)
  • 1986年11月24號,江寧畀咗部分去棲霞(10區5縣)
  • 1995年4月,鼓樓畀咗部分去玄武;棲霞畀咗部分分入玄武、白下、下關;雨花臺畀咗部分分入白下、秦淮、建鄴、鼓樓、下關;江寧畀咗部分去雨花臺(10區5縣)
  • 2000年12月21號,江寧徹縣改區,做江寧區(11區4縣)
  • 2002年4月3號,江浦縣合併入浦口區;大廠區同六合縣合併爲六合區(11區2縣)
  • 2004年1月15號,雨花臺、鼓樓各有一部分去咗建鄴;建鄴畀咗部分分入白下、鼓樓(11區2縣)
  • 2007年,建鄴畀咗部分去鼓樓(11區2縣)
  • 2011年4月30號,江寧畀咗部分去棲霞(11區2縣)
  • 2013年1月,白下合併到秦淮;下關合併到鼓樓;溧水縣徹縣改區做溧水區;高淳縣徹縣改區做高淳區(11區)

政區[編輯]

家下南京市轄11個

版圖 政區
南京市區
玄武區
秦淮區
建鄴區
鼓樓區
雨花臺區
棲霞區
南京郊區
江寧區
浦口區
六合區
溧水區
高淳區

南京設過呢啲政區:白下區下關區江浦縣、大廠區

上契交好嘅城[編輯]

國際[編輯]

國內[編輯]

合作[編輯]

智利 智利德木哥

[編輯]

  1. 1.00 1.01 1.02 1.03 1.04 1.05 1.06 1.07 1.08 1.09 1.10 1.11 走近南京:歷史沿革
  2. 2.0 2.1 2.2 2.3 走近南京:行政區劃
  3. 3.0 3.1 3.2 3.3 3.4 3.5 3.6 3.7 走近南京:我愛南京
  4. 江蘇省統計局. 2013江蘇統計年鑒. 中國統計出版社. 2013年7月. ISBN 9787503765919. 
  5. 南京市地方志編纂委員會辦公室. 《南京簡志》. 江蘇南京: 江蘇古籍出版社出版. 1986.
  6. 6.0 6.1 走近南京:自然地理
  7. 7.0 7.1 走近南京:人口狀況
  8. 8.0 8.1 8.2 8.3 8.4 8.5 走近南京:總體概況
  9. 9.0 9.1 9.2 9.3 9.4 9.5 9.6 9.7 9.8 9.9 南京市2013年國民經濟和社會發展統計公報
  10. 2013福布斯中國大陸最佳商業城市榜,2013年11月27號
  11. 呢啲民間笑談有好多版本,喺細節上各有出入。喺遞啲版本,就話秦始皇重喺度埋咗金來鎮壓王氣,於是呢度就嗌「金陵」,將「陵」字解爲「埋嘢嘅陵墓」。亦有種講法話,秦始皇並無埋金,而呃啲民眾去掘金掘崩啲山,從而壞曬啲風水。不過呢啲只係民間傳說,喺攷古上無證據佐證。見金陵 (搞清楚)內文。
  12. 出自《建康實錄》:「望氣者云:「五百年後金陵有天子氣。」因鑿鐘阜,斷金陵長隴以通流,至今呼爲秦淮。乃改金陵邑爲秣陵縣。」
  13. 13.0 13.1 有成語「厲兵秣馬」,南京旅遊網:南京歷史 - 秣陵
  14. 順人應天──成語故事
  15. 《丹陽記》「蠡城金陵,居長干古越城中」
  16. 哈爾濱南京締結友好城市,新浪網,2009年4月15號

參考[編輯]

  • 《南京史話》,蔣贊初,南京出版社,ISBN:7806141596
  • 《南京商貿史話》,后文洙,南京出版社,ISBN:7806144617

出面網頁[編輯]

Commons-logo.svg
維基同享有多媒體嘅嘢:
南京