法文
法文（法文：le français。讀音：[lœ fʁɑ̃sɛ] ，魁北克法文讀音：[lœ fʁãsɛ] ），或者叫法語，喺羅曼語族裏面，以講嘅人數嚟講，排第三。講得流利嘅，有成六千五百萬人，另外識講嘅，有一億九千萬人。羅曼語族排名，喺西班牙話同葡文後面。法文亦係廿九國嘅法定語言。
法文喺法國、比利時、瑞士、摩納哥同埋加拿大等國通行。其中法式法文同魁北克法文上有唔少分別，但係都可以筆談。
法文係好多國際機構嘅官方話，好似歐盟、國際奧林匹克委員會、世界貿易組織、北大西洋公約組織、國際足協、聯合國、萬國郵政聯盟、國際刑警等等。法國語言嘅地位，十八、十九世紀到顛峯，係外交嘅共通話。之後就俾英文取代，雖然係咁，法文重係有佢獨特地位。
法國係出版業大國，每年出版圖書大概兩、三萬本。家陣，全世界法文教師大概有二十五萬，大約有八千幾萬人學緊法文。
史 [編輯]
雖然好多法國人，認為佢哋係高盧人（法文：les Gaulois）嘅後裔，但係今日法文，留有凱爾特話嘅特徵，可以話鳳毛麟角。多數字，都係嚟自拉丁文或者日耳曼語言。
公元四世紀，羅馬帝國統治今日法國一帶，拉丁話開始喺法國流行。到公元五世紀，拉丁話已成爲當地通行話，取代當地原先嘅凱爾特文。喺高盧境內，羅馬移民日多，高盧人同佢哋用嘅通用拉丁話，融合成為大眾拉丁文（法文：le latin vulgaire），與此同時，上層文人用嘅書面拉丁文，亦漸見衰退。公元五世紀，民族大遷徙，外族入高盧，講日耳曼文嘅法蘭克人，同原先高盧境內講拉丁話嘅居民，兩話融合。法文開始冇咗非重音音節。六七世紀，大眾話變成種混合性語言（法文：un langage composite）。公元八世紀，查理曼帝國開始規範法文。到公元九世紀，拉丁話同日耳曼話，最終融合成羅曼文。由一五三九年開始，法文成為法國唯一嘅官方語言。
一零六六年，征服者威廉將法文帶去英格蘭，影響英文（例如牛肉嘅英文嘅 beef 係由法文嘅 bœuf 轉成嘅；dictionary 字典，嚟自法文嘅 dictionnaire）。英文字當中一萬個，都係源自法文。另一方面，十八世紀歐洲各國貴族，欣賞法國嘅生活方式，法文亦成為宮廷嘅語言。直到二十世界二十年代，法文係歐洲外交場合嘅共同語言。
二次大戰後，英文對法文的影響都唔少，例如原先啲法國人講 fin de semaine（週末），而家佢哋講 week-end，又好似家陣啲法國人講 football、drugstore 等等。但同時，加拿大英文亦有受法文影響。
文法 [編輯]
喺法文入面，名詞有分男女（genre），例如table（枱）係女性嘅，train（火車）同埋ordinateur（電腦）係男性嘅，重有動詞變位。
簡單嘅法文說話 [編輯]
- 您好 ／ Bonjour ／ /bɔ̃ʒuʁ/
- 您好嗎？／ Comment ça va ? ／ /kɔmɑ̃ sa va/ ／ [kɔmã sa vɔ]（魁北克發音）
- 多謝 ／ Merci ／ /mɛʁsi/
- 我唔知。／ Je (ne) sais pas. ／ /ʒə (nə) sɛ pɑ/ ／ [ʒə se pɔ]
（魁北克發音）
- 您識唔識講法文呀?／ Parlez-vous français ? ／ /paʁle vu fʁɑ̃sɛ/
- 生日快樂 ／ Bon anniversaire ／ /bɔn‿anivɛʁsɛʁ/
- 生日快樂 ／ Bonne fête（魁北克法文）／ [bɔn faɛ̯t]
（魁北克發音）
