廣州

出自維基百科，自由嘅百科全書

想搵呢個詞嘅第啲意思，睇下「廣州 (搞清楚)」。

廣州，簡稱穗，又叫羊城，花城同穗城，舊底叫省城，亦簡稱城(讀音 seng2,同“醒”)，行政上叫廣州市，係華南一座大城，係廣東省會，屬副省級，面積7434.4平方公里，喺正珠江口嘅沖積平原上便。廣州係華南嘅政治、經濟、科技、教育同交通中心。以經濟來計，廣州排響中國大陸第三，喺上海同北京之後。

[編輯] 地理同氣候

廣州位於東經 112°57' - 114°3'，北緯 22°26' - 23°56'，響珠江三角洲北部，西江、北江、東江交匯之處。地勢東北高、西南低，北部係森林丘陵區；中部係丘陵盆地，而南部就係沿海沖積平原。珠江連埋佢嘅支流橫穿成個廣州市。氣候屬亞熱帶季風海洋氣候，全年平均氣溫 20 - 22 攝氏度，相對濕度 77%，市區年降雨量約莫 1,720 毫米。

周圍嘅城：佛山、東莞、中山、清遠、惠州

File:Guangzhou map2005.jpg

廣州喺廣東嘅位置

[編輯] 政

[編輯] 大清

大清時廣州府包括周圍14個縣，今日廣州當時係廣東省城、廣州府、番禺縣同埋南海縣官署所在地，所以地圖上同一處寫低廣東、廣州、番禺同南海四個地名。而省城一帶屬番禺同南海。（1790年，即係乾隆五十五年）

今日一般指廣州，大清時嘅省城，或者廣東省城，或者廣州城。範圍只包括白雲山以南嘅珠江兩岸，即係城，同埋城周圍西關、河南等地方。城嚴格來講唔係行政區，只係集中廣東省、廣州府、番禺縣同南海縣嘅官署嘅地方。而當時廣州個名，係講比較大嘅府，包括埋成個珠江三角洲同新安縣。

而大嘅廣州府，隸廣肇羅道。兩廣總督本來駐肇慶，乾隆十一年改駐省城。

[編輯] 民國

去到中華民國時期，先至將省城劃做廣州市，作為一個行政區來管理。

[編輯] 共和國

因為都市急速擴展嘅關係，響中華人民共和國時期，尤其係1980年代之後，將隔籬嘅縣拼埋入去廣州市行政。呢啲縣包括，番禺，花都，增城同埋從化。

[編輯] 家下

家下廣州市轄有10個市轄區，2個縣級市。

市轄區：越秀、海珠、荔灣、天河、白雲、黃埔、南沙、蘿崗、花都、番禺。
縣級市：從化、增城。

注：昔日東山區已併入越秀區成爲而家嘅越秀區，昔日芳村區已併入荔灣區成爲而家嘅荔灣區。

[編輯] 史

廣州有字史約莫2200年(2008年廣州（番禺）建城2222年)，但係早喺4000幾年前，重係新石器時代，呢一帶就經已有百越人喺度住。

公元前九世紀嘅周代，呢度係百越之地，嗰時土人同長江中游嘅楚國人有來往，喺周夷王八年設立楚庭，呢個係廣州呢帶最早嘅名。秦始皇 33年統一嶺南後，建南海郡，郡治為番禺城，即今日嘅廣州城。到咗公元226年，孫權為咗便於統治，又將交州東部分出來作為廣州，廣州由此得名。之不過呢個州係同而家省級一樣，唔係市名。去到大宋，廣州範圍又縮細。而廣州治所就喺番禺。直至1921年 2月15號，民國成立市府廳，先至用廣州來指個城。

廣州又叫做五羊城、羊城同埋穗城。又因為四季花開不敗，又叫花城。羊城之名，係來自一則神話。傳說周代嗰陣，廣州一帶連年災荒，民不聊生。有一日，南海天空飄來五彩祥雲，五仙人騎住五隻羊，各帶住一串穀穗，降臨此處，送穀畀居民，祝福呢度五穀豐登、永無饑荒。之後仙人飄走，留低五隻羊，化成石頭。為咗紀念傳說中嘅五羊，喺越秀公園有五羊石像。

[編輯] 英文名

廣州嘅英文名本來係 Canton，重有用國語威妥瑪拼音拼寫嘅英文名Kwangchow，但而家多數人改咗用普通話拼音GuangZhou，剩低廣州友誼商店環市東總店嘅門上舊招牌重用 Canton呢個名。呢幾年，廣州民間建議叫返廣州做 Canton；例如廣交會英文叫 Canton Fair。

爾家有唔少人以為Canton係指廣東省而唔係廣州。實際上西方語言中Canton一詞最早係葡萄牙人喺十六世紀嗰陣音譯嘅。嗰時省城重未叫做“廣州”，所以西方人就直接用省名來指代省城。但係正如權威嘅西文字典對於Canton嘅記載，呢個詞傳統上就係廣州市嘅同義詞。

Canton嘅派生詞 Cantonese 最原始嘅意思係指廣東省城人同省城話。但後來呢個詞嘅意思擴大咗，可以用來表示同省城話有親緣關係嘅一組漢語方言，亦即係粵語；又可以表示省城之外嘅粵人。

[編輯] 秦漢

秦始皇三十三年廣州係南海郡治同番禺縣治。之後，廣州城開始逐步發展。漢初趙佗據有嶺南，成為第一代南越王，響番禺（家下廣州城）定都。漢武帝元鼎六年設返南海郡，番禺為郡治。元封五年番禺屬交州。建安二十二年交州廣信（而家嘅廣東封開）移治到番禺，為州、郡、縣同治。

[編輯] 三國至隋唐

三國吳黃武五年，將交州合浦以北地段分出設置廣州。晉朝設廣州南海郡，一直持續到南北朝。隋文帝廢南海郡，設廣州總管府。仁壽元年因避太子楊廣之諱而改為番州。大業三年設返南海郡，屬番州。唐武德四年復置廣州，起初係總管府，後來改為都督府。貞觀元年設嶺南道，治所喺廣州番禺。天寶元年，廣州改為南海郡；乾元元年又叫返廣州。咸通三年嶺南分東、西二道，廣州係嶺南東道嘅治所。

[編輯] 五代至宋元

五代為南漢國都，改稱興王府，並廢南海縣改設咸甯、常康二縣。宋太祖開寶四年滅南漢，廢興王府同咸甯、常康兩縣，叫返廣州，轄南海、番禺、增城、清遠、懷集、信安、新會、東莞八縣，屬嶺南道。宋至道三年設廣南東路，廣州番禺係治所。大觀元年升為帥府，祥興元年改為翔龍府。元至元十五年係江西行中書省轄下嘅廣東道同廣州路嘅治所。

[編輯] 明清至今

明洪武元年設廣州府，廣東布政使司、廣州府及番禺與南海縣治。清朝時係廣東省會、廣州府同番禺與南海縣治。民國元年廢廣州府。1918年設廣州市政公所。1921年立市政廳，係廣州建市嘅開始，仍然係省會。1930年改設特別市，同年改省轄市。1938年 10月21日至1945年 8月15日，俾日軍佔領。1947年恢復為國民政府行政院院轄市。

1949年 10月14日，由陳賡將軍率領嘅中國人民解放軍擊敗咗守衛廣州嘅國民革命軍，佔領廣州城。之後廣州成為中華人民共和國中央人民政府直轄市、廣東省人民政府駐地。1954年改省轄市至今。1984年 10月，劃為國家計畫單列城市。

[編輯] 對外貿易史

廣州係古代中西交流史上著名嘅海上絲綢之路嘅始發港，作為中國最早對外開放並從未關閉過嘅貿易通商口岸。清朝閉關時期嘅廣州十三行更係全國唯一嘅對外通商口岸，「一口通商」使當時嘅廣州（歐洲商人稱 Canton）得以獨攬全國外貿，國際知名度迅速提高，成為廣州歷史上最輝煌嘅時期之一。而家，廣州每年兩屆嘅廣交會仍然係中國對外貿易嘅重要渠道。

[編輯] 近代革命

廣州係中國近代革命之源。1841年三元里抗英、1911年黃花崗起義都喺廣州發生。1924年，孫文喺廣州黃埔開黃埔軍校，幫國民革命軍培養軍事人才。佢死後，國民革命軍將廣州作為北伐嘅大本營。同時期，毛澤東、彭湃班人喺度開農民運動講習所，培養中國共產黨骨幹。1927年，張太雷、葉挺、葉劍英等人喺度起義（又叫「紅花崗起義」，「廣州暴動」）。魯迅、郭沫若、郁達夫等都喺廣州講過新思想。

[編輯] 古蹟

六榕寺入便嘅六榕花塔

廣州市內嘅國家級、省級、市級文物保護單位總共有 219 個。其中國家重點保護單位 19 個，省級文物保護單位 41 個，市級文物保護單位 159 個。城區中山四路一帶先後發掘出秦漢造船遺址同西漢南越國宮署遺址，其中南越國宮署遺址兩次被評為中國大陸「全國十大考古新發現」。

廣州主要嘅歷史遺產包括：

2007年，南越國宮署遺址、南越王墓、南越國水閘遺址等三個南越國史跡聯合申報聯合國世界遺產。

[編輯] 人口

2008年底，全市常住人口1018.20萬人，戶籍人口773.48萬人（2007年），市區常住人口874.73萬人（2007年），戶籍人口636.77萬人（2007年）^[1]。

廣州係廣東嘅中心，中國最大城市之一。廣州人有句俗語：東南西北中，搵食去廣東，再加上北京、上海同埋深圳已經開始對外地人實施管理，搞到大量外地人湧入廣州搵嘢做。但係廣州人同外地人關係唔好，所以造成好多社會問題。因為廣州嘅面積同工作都好難融入咁多喺中國嚟嘅外地人，所以好多人搵唔到嘢做，導致治安發生好多問題，例如搶劫、入屋爆竊等等。調查表明犯法嘅多數都係外地人同埋發生喺啲外地人多嘅地方。不過外地人亦對廣州建設同發展作出咗好多貢獻，好多現代化建築同城市地標嘅建立都離唔開外地人嘅努力。

[編輯] 經濟

1970年代尾中國大陸開放後，廣州經濟發展好快，2008年全市地區生產總值為8215.82億元人民幣，比2007年增長12.3%，經濟總量喺全國主要城市中位居第三；全市人均GDP為81233元人民幣，按常住人口平均數計，折11696美元。

File:新上下九.jpg

廣州商業

[編輯] 文化

[編輯] 飲食文化

睇埋：飲茶

廣州飲食出名，有講『食在廣州』。

飲食業發達。全市有食肆幾萬間，絕大多數都開『三茶兩飯一宵夜』（即早茶、下午茶、夜茶同午飯、晚飯、宵夜），幾乎冇停。

用料多。廣東人（尤其是廣州人）有講：「背脊向天，人皆可食。」「天上飛嘅除咗飛機，水入便遊嘅除咗潛水艇，地上行嘅除咗坦克，都食得。」支持者認為噉樣反映咗廣州飲食文化嘅博大同開放，批評者就認為咁做威脅好多珍稀物種，重帶來衞生問題（如SARS）。

風格多。除粵菜，世界各地嘅嘢喺廣州都食到。

全市每年餐飲總額成幾千億，係中國大陸各市之首。每年開「美食節」，促進飲食業。

[編輯] 語言文化

廣州講廣州話（粵語）（增城、從化粵語客家話都講）。中國語言排名第三位。家下全世界粵語人大概 8千萬，分佈好闊，流通海外唐人社區，有好強影響同生命力。廣州話（粵海片）係粵語最流通嘅音，以粵語為載體嘅藝術包括粵劇、粵曲、南音、咸水歌。

1980年代以後，廣州外來人口大增，同時中國大陸勁推普，所以而家廣州嘅廣州話人口跌緊。但好多後生仔女都重係講廣東話。

[編輯] 宗教

基督教：河南堂、東山堂、光孝堂、錫安堂、救主堂、十甫堂、沙面會堂、芳村堂、沙河堂
佛教：光孝寺、六榕寺、大佛寺、無著庵、華林寺、海幢寺
道教：三元宮、五仙觀、仁威廟、純陽觀、玉虛宮
天主教：石室聖心教堂、沙面露德聖母堂、寶崗堂、龍洞堂
伊斯蘭教：懷聖寺（光塔寺）

[編輯] 對外交通

[編輯] 火車

廣州係中國大陸鐵路四樞紐之一。京廣（北京至廣州）、廣九（廣州至香港九龍）、廣三（廣州至佛山三水區）、廣梅汕（廣州至梅州及汕頭）等多條鐵路喺度交匯。目前廣州最大嘅火車站係廣州火車站（位於越秀區環市西路）同廣州火車東站（位於天河區天河北路）。而位於番禺佢鍾村鎮石壁村嘅廣州新客運站目前已經動工，建成後將成為規劃中嘅武廣客運專線（武漢至廣州）同廣珠城際軌道交通嘅啟始站。

[編輯] 機場

廣州市喺2004年 8月5日啟用新白雲機場，同時關閉已經有72年歷史嘅老白雲機場。廣州新白雲國際機場喺廣州市北部，白雲區人和鎮同花都區新華鎮交界處，距廣州市中心嘅直線距離約28公里。沿機場高速公路往返市區大約需要20分鐘。新機場係目前中國大陸嘅三大樞紐機場之一。

廣州新白雲國際機場已開通大約120條國內外航線，2004年旅客輸送量2032萬人次。目前新機場2期工程已經啟動，預計到2010年廣州舉辦亞運會時年客運量可能超過4500萬人次。（請睇廣州白雲國際機場）

[編輯] 公路

廣州係華南地區公路網嘅樞紐，同海南以外嘅所有鄰省及廣東省內所有地級市都有高速公路連埋，已建成通車嘅高速公路及快速路分別有廣州環城高速公路、廣深高速公路、廣佛高速公路、機場高速公路、廣清高速公路、廣湛高速公路、廣惠高速公路、南沙港快速路、華南快速幹線、廣園快速路、廣三高速以及廣肇高速公路；起緊嘅有廣梧高速公路，加上渝湛高速公路、粵贛高速公路、京珠高速公路以及汕汾高速公路。105國道、107國道、324國道穿越市區，106國道、321國道就以廣州為終點。

[編輯] 長途大巴

廣州有14座長途大巴客運站分佈市區各處，包括省汽車站、廣州市客運站、天河客運站、芳村客運站、窖口客運站、越秀南客運站、羅沖圍客運站、海珠客運站、黃埔客運站、夏茅客運站、永泰客運站、廣園客運站、天河大廈錦漢客運站及東圃客運站，其中省汽車站及市汽車站嘅路線最集中，每日有幾班城際巴士來往廣東省各地及廣東省周邊省份，其中去佛山、珠海、深圳、東莞等地有直達班次（或中途停1至2個站點）。

[編輯] 港口

黃埔舊港
黃港新港
南沙港口

[編輯] 市內交通

[編輯] 地鐵

內文：廣州地鐵

目前已經有四條線投入營運，總共有38個車站，而家一號線西朗、坑口同四號線石碁、海徬、低涌、東涌、黃閣汽車城、黃閣、蕉門、金州係地上車站，其餘都係地下車站。

一號線：由廣州火車東站至西朗
二號線：由三元里至萬勝圍
三號線：由廣州火車東站至番禺廣場，支線由天河客運站至體育西路
四號線：萬勝圍至金洲

票價由 2 蚊至到 12 蚊；另有 4 條線起緊，預計截至 2010年亞運會開幕時將有 9 條線路投入營運，通車里程超過 200 公里。

[編輯] 公共巴士

目前廣州市嘅巴士、電車總數超過 8000 架，營運線路超過 370 條，係中國大陸公共交通最發達嘅城市之一，但同時由於巴士過多而引起嘅交通堵塞就日益明顯，特別係喺市中心，比如天河體育中心站經常可以見到超過二十部巴士同時入站。廣州巴士絕大多數線路都有冷氣車，祇有極少部分重用緊舊嘅非冷氣車。至於票價就冇統一規定，視線路、車型同埋營運公司而定，市區線多數係冷氣車2蚊，非冷氣車 1 蚊，部分去大學城、過洛溪大橋、琶洲大橋嘅線路係 3 蚊，去花都新華、從化街口、番禺市橋、增城新塘、增城荔城嘅線路要 10－15 蚊。服務時間多數係朝早 6 點至夜晚 10 點；廣州市有多間巴士運營公司，其中經營市區線嘅公司分別有廣州一汽巴士、廣州市第二公共汽車、廣州市第三公共汽車、廣州市電車公司、廣州市新福利巴士、廣州冠忠巴士、珍寶巴士、新穗巴士、白馬巴士、馬會巴士、溢通巴士、興華巴士、榮泰巴士（而喺2008年，廣州市交委對各間巴士公司進行重組，重組後市民祗見到廣州市第一巴士公司、廣州市第二巴士公司同廣州市第三巴士公司）；廣州新世界巴士公司主要經營來往番禺嘅線路。廣州市亦設有夜班冷氣線路，方便市民夜間出行；線路由夜1 －夜41路，共有 41 條線路，收費標準為非冷氣車個半-2個半，冷氣車 3-4 蚊。喺2007年底至2008年，廣州市交委對市內巴士線路進行調整，並且開始營運「4」字頭冧巴嘅小巴線路服務，小巴主要行駛喺偏遠郊區、市內大型巴士入唔到嘅狹窄道路以及作為接駁地鐵站服務之用，但係一度無乜人搭，引來唔少批評。

[編輯] 無軌電車

File:GZNATB.JPG

270px

File:GZATB.JPG

270px

廣州市無軌電車喺1960年通車，第一條無軌電車路線由越秀公園至中山三路大東門，稍後延長至農林下路，即現時嘅東山電車總站，廣州電車發展至今，依然係廣東省內唯一一座有無軌電車系統嘅城市，路線增加至目前嘅 14 條，14 條電車路線分別如下：

101：機場路－海印橋
102：文化公園－東山
103：文化公園－機場路
104：中山八路－海印橋
105：文化公園－機場路
106：文化公園－錦城花園(東風東路)
107：中山八路－東山
108：黃石路－東山
109：中山八路－天平架
110：文化公園－天平架
111：黃石路－天平架
112：南田路－天平架
113：南田路－機場路
114：南田路－羅沖圍
粗字代表嗰條線路幾乎全部用冷氣車

其中112、113、114 係首批過珠江嘅路線，112 路行經江灣大橋，113 路行經解放大橋，114 路行經人民橋，現時廣州電車均為非冷氣車1蚊，冷氣車 2 蚊。

[編輯] 的士

目前廣州市嘅的士車身五顏六色，其中多數為紅、黃、藍、綠四色，唔同嘅車身顏色表示分屬唔同嘅的士公司，規糢唔大嘅公司唔可以揀顔色，但是規糢大嘅公司就可以揀顔色。黃色的士大部分都係由廣州人開，而其他色嘅的士係由唔同城市嘅人去開嘅。唔同嘅公司啲的士價格都一樣，市區內起步價 7蚊（現時需加收燃油附加費 1 蚊），2.3 公里後夏利車（基本被淘汰）每公里 2.2，其他車型每公里 2.6，如路程超過 35 公里就要加收 50% 嘅空駛費。增城、從化兩市嘅的士單價分別係每公里 2 蚊同每公里 1.6。

[編輯] 渡輪

市內渡輪碼頭：

中大碼頭
天字碼頭
黃沙碼頭
芳村碼頭
永興街碼頭
紡織碼頭
海幢碼頭
塹口碼頭
省總碼頭

[編輯] 水上巴士

為緩解陸上交通，政府最近推出水上巴士項目，由原來嘅渡輪擴展而成。首條航綫係:中大碼頭--天字碼頭--西堤碼頭--芳村碼頭，打算重會繼續開拓新綫路。

[編輯] 國際交往

到目前為止，廣州市經已正式同下面 15 個國際城市相互結為友好城市：

1979年5月同日本福岡市
1981年12月同美利堅合眾國洛杉磯市
1982年11月同菲律賓馬尼拉市
1985年3月同加拿大溫哥華市
1986年5月同澳大利亞悉尼市
1986年11月同意大利巴里市
1988年4月同德國法蘭克福市
1988年11月同法國里昂市
1989年2月同新西蘭奧克蘭市
1996年10月同大韓民國光州市
1997年11月同瑞典林雪平市
2000年7月同南非德班市
2001年5月同英國布里斯托爾
2002年7月10日同俄羅斯葉卡捷琳堡市
2004年10月27日同秘魯阿雷基帕市

[編輯] 旅遊

File:DSC02461.JPG

230px

廣州二沙島

File:DSC04316.JPG