肇慶

肇慶，家下係中國廣東嘅地級市，叫肇慶市。響廣州西北，治所響端州，管四縣二區二縣級市。肇慶響秦時經已有。肇慶最出名係端硯。肇慶裹蒸糭亦都係好出名。

肇慶大明大清嗰時叫肇慶府，轄地比家下大好多，南便去到海濱陽江縣同恩平縣。

地理

家下肇慶市政區，東接清遠市，南接佛山市，西南接雲浮市。而西便係廣西壯族自治區，接梧州市同賀州市。

史

大清1790年乾隆嗰陣嘅肇慶府，比家下肇慶市大好多，包埋今日江門市，同埋陽江市嘅部份地方。

古時肇慶一帶係百越聚居之地，公元前214年，秦國南征百越嗰陣，置南海郡同桂林郡。家下肇慶地方，就響南海郡四會縣同郡林郡裏便。公元前111年，大漢元鼎六年，境內開八縣，分屬三郡，全部響交州。南海郡有四會，蒼梧有廣信、謝沐、高要、封陽同端溪，而合浦郡就有高凉、臨允。

去到三國時代，226年，吳黃武五年，拆開廣州出交州，家下懷集一帶，就歸荊州臨賀郡。

隋朝時叫端州。公元1118年重和元年，大宋徽宗趙佶，覺得端州靈氣令佢做得成皇帝，就改名做肇慶，即係吉慶之始咁解。

大明同大清時，肇慶好多年來都係兩廣總督駐地。大明嗰陣，1583年，天主敎傳敎士利瑪竇來到肇慶，肇慶府官留佢響度。1584年，利瑪竇就做咗第一張中文世界地圖。1589年佢俾新官趕走。

大明嗰陣，肇慶府有一州十一縣。一州指德慶州，九縣係高要、四會、新興、高明、廣寧、封川、開建、陽江、陽春同埋恩平。

大清嗰時，隸廣肇羅道。順治六年，新興縣開平屯，加埋新會、恩平兩縣分出來嘅地，開咗開平縣。雍正九年，劃廣州府新會縣大官田，再加開平縣分出來嘅地，開咗鶴山縣。同治九年，陽江升做直隸廳，脫離肇慶府。光緒卅二年，陽江又升做直隸州，肇慶府陽春同恩平劃畀陽江。

民國嗰陣，廢州府，廣東省。

政區

家下肇慶市中心係端州區同鼎湖區，另管廣寧縣、封開縣同德慶縣、懷集縣，亦代管高要市同四會市。