城市

出自維基百科,自由嘅百科全書
世界有名嘅大都市日本東京都
格陵蘭努克

城市粵拼sing4 si5)又嗌都市dou1 si5)、粵拼seng4*2白讀sing4文讀),係聚落一種,係人類活動如政治、經濟、社會等最活躍嘅舞臺,因爲人口集中,所以城市地方人口多、人口密度高。

「城市」或者「都市」可以拆字來理解:「城」、「都」意味住城市有好大嘅社會、行政影響;「市」就有經濟意味。所以城市同鄉村市鎮嘅區別往往在於大細[註 1]人口密度[註 2]、緊要程度[註 3]法定地位

喺活動上,城市人口比較多從事第二產業第三產業。喺形態上,中心機能集中嘅地方嗌做市區(再發達啲,就會喺市中心形成核心商業區),市區之外嘅週邊嗌做郊外。而家有城市膨脹現象,即係城市從市區蔓延到郊區,郊區急劇城市化,成個城市無序擴張。

概要[編輯]

從社會學嘅角度來講,城市係一個大範圍嘅人群共同體,喺呢個共同體入面,多數人嘅社會活動都受成個共同體綜合調整,呢種綜合調整遠遠超出個人日常活動嘅限界。換言之,城市嘅社會活動頻密過鄉下,而「市民意識」亦係城市社會唔同於鄉下社會嘅地方之一。而從行政嘅角度來講,城市係一類政區。現當代可以講係城市時代,而家城市人口都急劇增加緊,城市嘅影響力亦好強,就連唔住城市嘅人都會受城市影響。

喺前3000年左右,城市人口佔世界人口嘅比率近乎於零,喺西曆100年時呢個比率未夠1%,1800年時約5%,不過到咗1965年城市人口就佔全球人口三分二,表明近世以來急劇城市化,而個比率有繼續增大嘅趨勢。呢種急劇城市化主要源於大規模工業化、同埋現代國家嘅形成。雖然城市係工商業發展嘅產物,不過一般定義城市還須睇佢嘅社會發展成果──亦即形成市民共同體,喺呢個共同體入面,個人同社會息息相關,人參與社會,而唔係田園牧歌式嘅逍遙世外。

不過對行政來講,定義城市始終要啲量化得嘅基準。由於人口密度高、聚居規模大係城市同農村嘅顯著唔同之處,所以通常來講呢啲基準會係常住人口、人口密度、居住密度、職業構成比等等[1]。而呢啲基準具體如何、唔同國有唔同。喺中國大陸,行政上分出咗「鄉村」同「城鎮」,而「城鎮」又再分爲「城區」同「鎮區」。所謂「城鎮」係要喺政區建制嘅基礎上、按規定劃出嘅地頭,而「城區」嘅政區基礎係市轄區同唔設區嘅市,而個規定係「街道辦事處所轄嘅居民委員會地域、以及城市公共設施、居住設施等連得到嘅其他居委會、村委會地域」,而「鎮區」嘅政區基礎係建制鎮,而個規定係「鎮所轄嘅居民委員會地域、以及鎮嘅公共設施、居住設施等連得到嘅其他村委會地域」。此外「鎮區」重可以係「常住人口三千人以上嘅獨立工礦區、開發區、科研單位、大專院校、農場、林場等特殊區域」[2]

而各國嘅城市定義,據有無明確人口下限分成兩種[3]。無明確嘅有85國,其中有20國淨以首都爲城市,有27國以行政指定城市,有38國以重要程度來決定[3]。實際上,有好多國家可以從法定地位睇出係咪城市地域,比如喺韓國,基本上市部屬於城市、郡部屬於農村。而有明確人口下限嘅國有81個,個下限大概喺兩千到一萬之間,當中以兩千同五千下限嘅最多,分別有23國同19國[3]。以美國做例,唔同州嘅城市人口下限唔同,比如麻省嘅下限係萬二人,而馬利蘭州嘅下限係三百人[4],而總體上以2500人爲限[3][5];法國以2000人爲限[3][5];日本以5萬人爲限[5][1]。各國之中,下限最低係烏干達,爲200人,最高係中華人民共和國,爲10萬人[5]

聚落形態[編輯]

世界大部份地方,差唔多所有城市都有一個市中心。響一啲好大嘅城市,佢週邊都係市郊,帶有鄉村特色,有時都會叫埋做城市,所以,有時會介定城市爲「市中心」嗰部分。一般嚟講,城市都係由住宅區工業區、同商業區組成嘅行政單位,有時可能佔好大面積。一個城市好大部份係嚟,唔同部分由基建連埋,好似馬路地下鐵,同埋有唔同嘅交通路綫穿梭。城市未發展嘅地方,好可能只係淨返。城市研究一般都係人文地理嘅範疇。

城市同市鎮嘅分別[編輯]

城市同市鎮,唔同地方有唔同理解。有一啲會以某一個人口大小作分野。有一啲係用法定地位去分。有一啲係一個市鎮係會管幾個市鎮,佢嘅經濟同行政地位喺佢嗰區係最大嘅。雖然城市係包括好多個市郊市鎮,但係唔係用來形容幾個城市連埋嘅地區。

相關嘅電子遊戲類[編輯]

內文:起城市遊戲

起城市遊戲呢種電子遊戲類型,就係玩模擬建造城市。

[編輯]

  1. 城市嘅規模往往大啲,不過要幾大先爲之「城市」,各國定義唔同,所以同等規模,可能呢國屬市鎮,嗰國變城市。
  2. 呢個係一般情況而言。一啲大村、鎮照樣可以有好高嘅人口密度。
  3. 一般情況而言,城市嘅社會、政治、經濟影響力大啲。不過呢個「緊要程度」亦可以係其他意義,比如打仗時,兵家必爭嘅鎮仔就會顯得好緊要。

[編輯]

  1. 1.0 1.1 中國社區建設展示中心:城市社區的主要特徵[失咗效嘅鏈]
  2. 據2006年3月10號中國國家統計局發佈嘅《關於統計上劃分城鄉的暫行規定》
  3. 3.0 3.1 3.2 3.3 3.4 中國評論學術出版社:世界各國城市化水平對比問題
  4. "Census BureauPlaces" (PDF). 原著 (PDF)喺2014年10月31號歸檔. 喺2014年6月17號搵到.
  5. 5.0 5.1 5.2 5.3 東方早報:理性看待和實施「撤縣設市」[失咗效嘅鏈]