廣州地鐵

廣州地鐵係中國廣州市嘅集體運輸系統，由廣州市地下鐵道總公司負責營運同埋管理，現時有一號綫（西朗至廣州東站）、二號綫（三元里至萬勝圍）、三號線（廣州東站至體育西路／天河客運站至番禺廣場）、四號線（萬勝圍至金洲）同五號線（滘口至文沖）正式營運，但係始終應付唔到交通需求。為咗解決交通擠塞嘅問題，廣州地鐵仍然喺度進行大規模嘅擴建。由2004年開始，廣州地鐵每年平均會開通35公里，預計到咗2010年，四號綫（奧林匹克中心至萬勝圍／黃閣至金洲）、五號綫、六號綫、八號綫會全部開通，總長度大概係200公里，而廣州地鐵最終嘅規劃長度係600公里。

唔計香港同臺灣，廣州係繼北京、天津、上海之後，第四個有地鐵系統嘅中國城市。

[編輯] 一號線

一號線喺1993年12月28號開始動工，到咗1997年6月28號起開始試車，第一段開通嘅係西朗至黃沙，而全線就喺1998年12月28號完成，到咗1999年6月28號正式通車，服務時間係由朝早6:00到夜晚22:55，大概每3至7分鐘有一班車。

一號線全線有16個車站，分別係：廣州東站（接駁三號線）、體育中心、體育西路（接駁三號線）、楊箕、東山口、烈士陵園、農講所、公園前（接駁二號線）、西門口、陳家祠、長壽路、黃沙、芳村、花地灣、坑口、西朗

一號線全長大概18.48公里，其中西朗同埋坑口嘅車站都係位於地面，而其他車站就喺地底。

二號線第一期（三元里至曉港）喺2002年12月29號開通，而全線（三元里至琶洲）就喺2003年6月28號開始營運，服務時間由係由朝早6:00～夜晚22:53，大概每2～4分鐘有一班車。

二號線用咗好多國內最先進嘅技術，而且重係全世界第一條「一開通就已經安裝咗屏蔽門嘅地鐵路線」之一，咁啲人等車嗰陣就會安全好多喇。

二號線暫時有17個車站，分別係：三元里、廣州火車站、越秀公園、紀念堂、公園前（接駁一號線），海珠廣場，市二宮，江南西，曉港，中大，鷺江，客村（接駁三號線），赤崗，磨碟沙，新港東，琶洲，萬勝圍（接駁四號線），所有車站都喺地底。

三號線係南北走向，包括一條主線同埋一條支線，係中國第一條Ｙ形運行模式嘅地鐵線，亦係第一條最高時速去到120公里嘅地鐵線，總投資達到人民幣159.05億元。

主線係廣州東站到番禺廣場，全長28.78公里，有13座車站：廣州東站（接駁一號線）、林和西、體育西路（支線交匯點）、珠江新城、赤崗塔、客村（接駁二號線）、大塘、瀝滘、廈滘、大石、漢溪長隆、市橋、番禺廣場。

支線係天河客運站、五山、華師、崗頂、石牌橋、體育西路一共6個車站，全長7.5公里。

廣州東站到客村段喺2005年12月26號開通，剩底個啲就喺2006年12月30號正式開通。服務時間係由6:00到22:00，大約每8分鐘有一班車。

四號線喺2003年1月29號開工，其中萬勝圍到新造（大學城專線）喺2005年12月26號開通；新造到黃閣喺2006年12月30號開通；黃閣到金洲喺2007年6月28號開通，全線長68.96公里（地底個段有29.11公里），服務時間係由6:00到21:00，大約每12分鐘有一班車。

另外四號線嘅列車有全自動駕駛功能，亦係世界上第一條中、大運載量嘅直線電機線路，亦係中國第一條採用直線電機車輛技術嘅地鐵線。