粵語

出自維基百科，自由嘅百科全書

跳去: 定向, 搵嘢
Unbalanced scales.svg
 呢篇文嘅中立性有得拗；佢嘅內容、語氣可能太過主觀、側埋一邊，或者地方色彩太重。
請喺編輯之前睇下討論版。
喺拗掂數之前，唔好拎走呢通告示。
Ambox content.png
 呢篇文可能有原創嘅嘢或者未查明嘅字句。請改好呢篇文，加參攷資料。睇埋個討論頁。
粵語、廣東話、廣府話
流行喺: 廣東、廣西、香港、澳門、新加坡、印尼、馬來西亞北婆羅洲（沙巴）山打根、吉隆坡、加拿大、美國、英國、澳洲、新西蘭、越南、泰國同埋其他華人移民地。
用嘅人數: 約莫6千6百萬至1億2千萬[1] 
排名: 16 [1]
語系: 漢藏語系
漢語
粵語、廣東話、廣府話 
官方地位
用來做官方語言嘅國: 香港、澳門
管理機構: 無官方機構
話代碼
ISO 639-1: zh
ISO 639-2: chi (B)
ISO 639-3: yue 
注意: 呢頁包含 統一碼嘅萬國音標
中國大陸用粵語嘅人主要分佈喺廣東嘅中西部同埋廣西嘅中南部。

粵語，又叫廣東話、廣州／廣府話、白話，英文叫Cantonese，係廣東（簡稱「粵」）加埋部份廣西、香港、澳門講嘅話，喺東南亞地區同埋一啲粵人移民地方都有人講。

語言學入邊，粵語係種聲調語言，屬漢藏語系漢語族。粵語有四大片：粵海片、四邑片、桂南片、高陽片。廣東地區係粵語發源[未記出處或冇根據]，粵海片一般被當做標準粵語嘅基礎。

人口方面，舊時統計有6600萬人講各種口音嘅粵語，全球排十六位；亦有啲統計數字話粵語使用人口有1億2千萬1。雖然粵語響中國大陸冇法律地位，之但係廣東地區開放歷史有幾百年，經濟發展先過內陸，加上有香港經濟同文化發達，令粵語有好大影響力，成為香港文化同粵文化嘅根基。由18世紀開始，因為大量講粵語嘅人移民行出國，令粵語成為海外華人之中比較多人講嘅語言。

嶺南地區，粵語沿珠江各支流散佈，可以分做六個區：西江/珠江、潯江/郁江、北流江/南流江、南江/鑒江、漠陽江、潭江。前便四個水路交頻繁，可以互通；後便兩個因為水系分隔，互通較為困難[2]。

廣州由於係粵語發源，所以廣州嘅粵語可以算係粵語標準嘅基礎，而由於香港所用嘅語言一樣係廣州話，加上香港對外交流頻繁，同係講廣州話嘅香港，通過大量粵語流行曲，電視劇，電影，對粵語發展同弘揚有好大嘅影響。

目錄

[編輯] 簡史

內文： 粵語史

粵語嘅發展史同嶺南史息息相關。而歷史可以追到公元前，秦國南攻百越嗰陣。秦始王先後兩次平定百越，好多中原漢人移民到嶺南，漢越雜處之下，古粵語就開始形成，之後一路喺幾個朝代都有人喺中原南下，嚟到嶺南，而且仲好多都係名門望族，或者係文人雅士，古粵語就係咁樣影響之下，慢慢咁就變成而家嘅粵語。

[編輯] 唐宋

喺唐朝鼎盛時期，嶺南地區漢人嘅人口進一步增加，原本嘅南方原居民就開始被漢化，講話亦開始有轉變。有部分喺山區居住嘅百越部族，免受漢人影響而繼續保持自己嘅語言文化。唐朝建立之後，粵語再進一步受到唐代中原漢語影響，形成一種又可以應付中古漢語並且又有自身獨立詞彙同文法結構嘅語言。由唐朝滅亡之後到宋朝，北方多次落入外族手上，令中原人逃亡到嶺南地區。呢個係中國歷史上中原人口南遷嘅第二次高峰期，亦都係最後一次減少粵語同中原漢語之間差別嘅時期。而家嘅漢語仍然有能力去應付宋朝早年官方修定嘅《廣韻》發音，但係就難去對應元朝或再之後嘅中原漢語發音。不過《廣韻》仍然只係有平上去入四聲，只因為字太多令到平聲分上下兩卷，同現代粵語並唔係完全一樣。

[編輯] 元明清初

喺元朝，蒙古人遷都於燕雲十六州內嘅大都（之前叫燕京，之後改名叫北京），並將當地話作為官方語言，當期時嘅中原漢語同中古漢語同粵語嘅差別就不斷變大：當時嘅中原漢語已急劇傾向北京官話方嘅語音，北京官話嘅入聲韻尾迅速消失（即係-p/-t/-k韻尾消失，同「入日北」三字喺中古漢語同現代粵語都有唔同嘅入聲韻尾），蒙古統治時期出現元曲同蒙古音譯名詞，亦都顯示咗「兒」化韻尾已經形成，又出現咗唔屬於「平上去入」傳統四聲嘅輕聲；然而，已經定型嘅粵語就冇受到元朝嘅影響而繼續獨立發展。

明朝至到清朝中期，中原嘅官話韻尾進一步消失（現代官話僅存-n/-ng韻尾，-m尾與-n尾合併）。又有連接i/ü韻母的g/k/h聲母被顎音化成咗j/q/x聲母（例如「吉其兮」三字喺中古漢語和現代粵語都帶有g/k/h聲母，喺現代官話就被顎音化而混合成j/q/x聲母）；另外而言，粵語就比較穩定同緩慢咁演變成現代粵語，照住粵語韻母長短將陰入聲派入分為上下兩種陰入聲（譬如「色錫」兩個陰入聲字各自帶有短同長的韻母，前者-「色」-被納入尖銳嘅上陰入聲，後者-「錫」-就被納入近似陽入聲咁樣低沉嘅下陰入聲），西洋學者喺清朝中後期見證住粵語唔同中原官方話咁，將z/c/s聲母同j/q/x聲母混合（現時香港帶有sh/ch嘅粵語譯音英文名詞都可以被視為活化石，因為當期時sh/ch未有同s/ts混埋一齊，例如沙田的沙-sha）。

[編輯] 清朝中末

因為清朝閉關自守，只開放廣州同其他國家進行貿易。所以有部分外國人嚟到中國之後掌握嘅漢語係粵語但唔係官話，唔少京官為咗同外國人經商議事亦經常接觸粵語，令到粵語第一次掉轉頭傳播返到中原。喺呢個時期又有大量嘅粵人移居到美洲、澳洲同東南亞等各地工作生活，粵語就開始傳播到世界各地，普及起嚟。

[編輯] 主要特點

[編輯] 古漢語嘅元素

粵語喺語音、辭彙、語法有好多古中文嘅成分。

[編輯] 音調

廣州話保有好多原音，例如「我」同埋「餓」兩字嘅脷根鼻音聲母「ng-」保留咗中古疑母嘅原始發音。

聲調方面，標準粵語完整保留咗中古漢語中，平、上、去、入各分陰陽嘅調類格局，而且仲喺陰入之中衍生出一個中入調，係完整保留古漢語入聲嘅話（喺諸閩語中，仲有混合入聲，睇閩南語），有利研究中國古文學。標準粵語包含 -p、-t、-k、-n、-m、-ng 六種韻尾，冇北方話所有嘅捲舌音、兒化、輕聲呢啲現象（呢啲北方話特徵都係喺中古之後出現嘅）。

[編輯] 辭彙

粵語保留多啲古詞古義，而且好多詞語，包括助語詞，都可以直接喺古漢語嘅典籍裏面搵到來源。喺漢語北方話中，呢啲古詞已經被廢咗唔用或者好少用。

好似粵語講「黐」唔似北方人用「粘」，用「差人」或「差佬」/「差婆」嚟講「警員」咁；又好似粵語成日喺句尾嘅語氣助詞「忌」（而家成日寫做「嘅」），《詩經．國風．鄭風．大叔於田》有「叔善射忌，又良禦忌」；再例如打甂爐（北方話嘅食火鍋），「甂爐」係種古炊具；「崖广」（通常寫做「牙煙」）即係危險，古文中原意為「懸崖邊嘅屋仔」，其中，「广」同埋「廣」係兩個字）；「濿淅」（讀「濕懠」，即係有麻煩；來自古書中形容濕衫水中行嘅聲）咁嘅詞；廣州話中「行」就行，走就走，同古中文，唔同北話「行」「走」相通。但近年好多外省人來到廣東，北方話越來越流通，好多廣州話古字已經用少咗。

[編輯] 語法

粵語形容詞可以擺喺名詞後面，有時講法會同北方話相反。「雞公」即係北話嘅「公雞」，「緊要」即係北話嘅「要緊」，「奇離」即係北話嘅「離奇」，「吟沉」即北話「沉吟」，「菜乾」即北話「乾菜」，「匙羹」即北話「羹匙」。；「唔怪之得」或者「怪唔之得」即北方話「怪不得」；「我走先」即北話嘅「我先走了」。呢啲都源自古中文。

[編輯] 古百越話元素

古代南遷到嶺南地區嘅漢人同埋百越土著長期雜居，彼此間語言、文化、習俗等各方面唔覺意就相互滲透。粵語既有古漢語成分，又有古代南越語成分，係兩個民族相互融合嘅結果。現代粵語裏面仍然有好多古代南越語嘅成分，主要表現喺辭彙方面。

[編輯] 外文詞

粵語嘅應用一直係充滿活力，外文豐富咗粵語嘅辭彙，喺商業為重嘅香港，睇到用辭嘅演變，好似以前啲美容廣告用「減肥」做標題，跟住變做「瘦身」、「纖體」。有啲公司管理人員甚至用「瘦身」一詞來代替「裁員」。

粵語好多詞來自英文。香港人講嘢時成日用英文單詞，好似快勞（file，讀做「fai-lo」）即係公文夾；鋪頭仔叫「士多」(音似英文:store)；男警員或男先生叫「阿 Sir」；女警叫「Madam」、女先生叫「Miss」，開工加班叫「開OT」（Overtime）等等。雖然通常英文發音會用中文字代入，但香港人有時會直接用英文字，如「感覺」叫 feel，亦冇用中文字，但跟粵語讀音習慣，feel 一般讀做 few，無 L 尾音，fax 讀成 「fak-si」加重尾音，而且影響埋廣東粵語區。

由1980年代開始，香港、珠三角等粵語區同埋中國大陸其他地方交流多咗，唔少粵詞入埋北方話，例如 巴士（bus）、「貼士」（tips）。有時，呢啲詞喺北方話會變身，例如粵語「搭的士」，「飛的」（即係「搭開得好快嘅的士」，「飛」有「飛咁快」嘅意思，簡稱「飛的」）喺北方話變咗做「打的」。

[編輯] 同北方話比較

內文： [[粵語固有辭彙與漢語北方話辭彙對照]]

日常用語中粵語同北方話唔同嘅詞彙可多達 50% 以上。喺科學技術領域，兩者唔同嘅詞彙就比較低，細過 10%。有啲詞彙喺北方會倒轉寫，例如「私隱」喺北方話就叫「隱私」。

粵語詞彙同埋漢語北方話詞彙對照舉例
粵語 北方話   粵語 北方話   粵語 北方話   粵語 北方話
着數 便宜 搲著數 拿取便宜
宵夜（宵夜） 夜宵 飲勝 乾杯 心熄 死心 鬼馬 詭計多端
人工 報酬、薪金 火水 煤油 花樽 花瓶
歡喜、鍾意（中意） 喜歡 後生 年輕 專登 特意 雪櫃 電冰箱
夾萬 保險箱 黐線 神經失常、神經病 鹹濕 好色、下流 人客 客人
老竇 爸爸 特登、專登 故意 契弟 王八蛋 吹脹 氣壞、無可奈何
蹺蹊 蹊蹺 蘇孲崽、蘇蝦仔[3] 嬰兒 得意 可愛 點解 爲什麼
直頭 簡直 是但、求其 隨便 得戚 得意忘形、囂張 「儸柚」、屎窟 屁股
同埋 跟 折墮 做孽、遭遇悲慘 橫「掂」 橫豎、橫直、反正 櫃桶 抽屜
屋「企」 家 好彩 幸好 馬「騮」（馬留） 猴子 「諗」 想、考慮
「嘥」 浪費 荷包、銀包 錢包 曱甴，小強 蟑螂 生蘿蔔 長凍瘡
掟煲、甩拖 分手 執生 隨機應變、小心 老「細」（老世），波士（ｂｏｓｓ） 老闆 番梘（鹼） 肥皂
皮「喼」 箱子 淡定 鎮定 縱使、就算 即使 失覺 失敬
火燭 失火 口齒 信用 「省」鏡 可人 唔通 難道
包租婆 房東太太 遊車河 兜風 熟口面 似曾相識 第二啲 其他
唔該 謝謝 犀利、把炮 厲害 巴閉 了不起 大鑊 惹了大麻煩
閉翳（贔屭） 憂愁 抽秤 [動詞]、「奄尖」 [形容詞] 挑剔 傾偈 聊天 鉸剪 剪刀
電掣 電鈕、開關 車轆 車輪 軚盤 方向盤 戇「居」 愚蠢、笨
踩屐 溜旱冰 擁躉、fan屎 (fans) 捧場者、支持者 「瓊」 凝固 喊 哭泣
嬲 生氣 「唞」氣 呼吸 蛤乸 癩蛤蟆 曳 淘氣
嘜頭 商標 「岌岌貢」 搖搖晃晃 發「吽哣」 發呆 蠱惑 狡猾
報「寸」（報串） 告密 「寸」（串） 囂張 轉軚 改變立場 「慳啲」、收皮 叫某人收斂
「訓」覺、瞓覺（睏覺） 睡覺 「冚扮爛」、「冚辦爛」、冚（鹹、合、闔） 全部、所有 低B、低能 弱智 「牙煙」（崖广） 危險
「欄」 滾開 打飛機 打手搶、自瀆、手淫 波 (ball) 球 老「笠」 打劫
劈友 用刀斬人 玩嘢（玩野） 搞小動作 「吔」 吃 爆缸 流血
「聽」日 明日 「琴」日、「噚」日 昨日 開片 武鬥 屙屎，爆石 大便
扯貓尾 串通 扯哮 喘氣、哮喘 「流」 假 屙尿 小便
抵死 活該 火牛 變壓器 抵死 [另一解釋] 妙極 「跳灰」（糶？） 運毒
放水 小便 爆格 爆竊 放水 [另一解釋] 比賽時放軟手腳 老屈、砌生豬肉 誣告、陷害、嫁禍
埋單 結賬 「郁」 動 爆粗 講髒話 搭「嗲」 搭訕
扯火 發脾氣 扮嘢（扮野），扮晒蟹 裝模作樣、裝蒜 死人頭 該死的(人) 「督」背脊 背後告密
賣飛 賣票 飛起 放棄 放飛機 失約 「孭」飛 包辦
「孭」鑊 背黑鍋 咪走 不要跑 契弟 （動詞）做壞事（名詞）損人利益的人 得得地 還可以
過「黎」、過「嚟」、（過蒞） 過來 　

*按：
（ ）入面嘅字詞係粵語本字。
「 」入面嘅字詞係粵音字，同佢嘅原意冇任何關係。

[編輯] 音系

粵語有相當複雜嘅聲調系統，同北方話嘅差好遠。喺粵語中相當完整咁保留咗古漢語嘅入聲，而且仲由陰入、陽入分化出中入。標準粵語有九個聲調，分別係：陰平、陽平、陰上、陽上、陰去、陽去、陰入、中入、陽入。關於粵語嘅發音同埋拼寫，詳見粵語羅馬化方案（粵語拼音或粵語羅馬字）、粵語發音。

[編輯] 寫

內文： 粵文

粵語源自古漢語，除咗一啲近年受西方文化影響而創嘅詞語，例如話「去 wet」、「去 hea」，用中文字都寫得出。

清代嘉慶年間已經有人用粵言入詩，啲人將呢啲粵語詩收集埋，出咗套《粵謳》詩歌集。

之後寫粵語嘅人又創咗套「三及第」嘅文體—即係文言、粵文、白話文（國語）夾埋寫，1940、1950年代廣府文人就成日用呢種文體寫嘢，嗰陣好多廣州報紙、小說，都用「三及第」，後來好多廣州寫稿佬到咗香港，帶埋呢種文體去，香港報紙亦開始有人寫[4]，1905年鄭貫一出版嘅《有所謂報》，就係用三及第寫 [5]。

近幾廿年，香港有啲娛樂媒體用晒粵語寫，例如有70年代到90年代好流行嘅香港漫畫，好似《壽星仔》、《玉郎漫畫》咁，入面嘅對白同專欄，都係地道嘅粵語。

到咗電腦時代，好多粵字大五碼系統一開始時無收，寫粵文好唔方便。香港政府早年曾整過套香港增補字元集，收錄咗擴增粵字約5000字左右），如「啲」、「嘅」、「攞」、「摣」、「嘢」、「冚」。喺最新一版嘅增補字元集中，重收埋一啲所謂嘅「粗口字」。用呢套字元集，大部份粵語都寫得出。

因為唔係所有電腦都裝咗廣東話增補字集，有人喺打唔出粵字時，會用英文嘅「o」來代替口字邊，寫「啲」、「嘅」、「嘢」成「o的」、「o既」、「o野」等等。

八十年代開始，好多語言學者考證過粵語本字。但係本字好多太僻，學校亦都唔敎，所以一般大眾都好少會用。

[編輯] 方言片

內文： 粵語嘅方言片

粵語內部由於地理分佈而造成唔同地方有唔同語言特點，主要分4片[6]：

桂南片根據內部一啲異同，又可以細分為四個方言小片﹕廣府片、邕潯片、勾漏片同欽廉片。

[編輯] 影響力

由於中國移民海外嘅人之中，有相當比例來自粵語區，令粵語成為大多數海外華人社區之中，其中一種流行語言。

而喺香港同埋澳門，市民日常交流，到學校教育、工商行業，到政府辦公、立法會選舉；到科學研究、新聞傳媒、大眾娛樂，都係主要用粵語，其次係英語。同時香港大眾媒體同埋娛樂事業嘅繁榮，亦令到粵語嘅文化散佈到全世界。

[編輯] 註

[編輯] 參考

  1. ↑ 統計可以出入，可以睇各話人口一覽。
  2. ↑ 粵語形成於古廣信
  3. ↑ 香港中文大學中國語言及文學系助理教授黃念欣教授喺香港TVB嘅電視節目《最緊要正字》提出，該詞嘅正字應該為“蘇孲崽”。“蘇”有分娩嘅意思；“孲”係赤子、嬰兒嘅意思，以丫丫聲描寫嬰兒嘅哭叫聲；“崽”係由“子”字嘅音演變而成嘅，係古時南方方言，讀作zoi2，其後衍生出“仔”字取代了“崽”字。不過，現代人約定俗成嘅讀音還係“sou1ha1zei2”。
  4. ↑ 「三及第」文體
  5. ↑ 琴台客聚：由「無所謂」到「有所謂」 - 香港文匯報
  6. ↑ 粵方言中國大百科智慧藏

[編輯] 出面網頁


中國方言（斜體表示有爭議）
十大方言：官話 | 晉語 | 湘語 | 吳語 | 徽語 | 贛語 | 客家話 | 粵語 | 平話 | 閩語
官話：東北 | 北京 | 膠遼 | 冀魯 | 中原 | 蘭銀 | 江淮 | 西南
閩語：閩南 | 閩東 | 閩北 | 閩中 | 莆仙 | 邵將 | 瓊文
由 "http://zh-yue.wikipedia.org/wiki/%E7%B2%B5%E8%AA%9E" 收