YouTube

出自維基百科,自由嘅百科全書
跳去: 定向搵嘢

YouTube係一個互聯網網站,係一個可以畀網民將短片上載畀人睇同分享嘅網站,而家已經係同類型網站嘅翹楚,重造就咗多位網上名人同埋激發網上創作。

YouTube唔係非牟利組織,佢有多種方法搵錢,包括貼廣告同埋出埋YouTube頻道

YouTube而家係Google嘅子公司。

歷史[編輯]

YouTube喺2005年2月成立,由3個PayPal前僱員查德·賀利陳士駿(Steve Chen)同埋賈德·卡林姆創辦。原本只係諗住方便朋友之間分享錄影片段,點知之後變咗做網民嘅回憶儲存庫同埋發佈作品嘅地方。

YouTube採用Macromedia Flash技術提供內容,包括影片電視節目片段,音樂錄影帶同家居錄影等。YouTube嘅片段可以好容易放入個人嘅Blog或其他網站入面。不過就唔畀上載有版權內容嘅短片同鹹嘢。

有研究話YouTube嘅網站流量需求好勁,甚至每個月需要畀大約100萬美金嘅費用,所以喺2006年3月,YouTube開始喺網站賣廣告。

2006年4月至5月,由香港網民拍嘅短片巴士阿叔》令YouTube喺香港聲名大噪,嗰段片唔單止吸引咗好多香港網民進行二次創作,重吸引到本地同外國傳媒嘅報導同埋注意,就係咁,香港網民就開始鐘意上傳各種各類嘅短片上YouTube。

直到2006年YouTube已經有4000萬條短片,每日吸引600萬人睇嘢,喺成立後嘅短短15個月,已經超越MSN VideoGoogle Video等嘅競爭對手,成為呢個世紀最多人瀏覽嘅網站[1]

2006年10月9日,Google公司用十六點五億美元收購咗YouTube網站,重同環球唱片SonyBMG華納音樂哥倫比亞廣播公司達成內容授權同保護協議,解除市場對內容供應商可能追究侵權內容而提高法律行動嘅疑慮。

影響同評價[編輯]

互聯網革命:網民變資訊提供者[編輯]

科技發達、寬頻同埋攝影器材嘅普及令短片資訊大行其道。網民由傳統嘅資訊接收者,變成資訊發佈者,而且重可以成立自已嘅私人影院、影片發佈站、新聞站,取代傳統嘅傳播媒體。好似一位年青人拍低嘅《巴士阿叔》短片竟然會帶嚟咁大嘅回響同點擊率,所以令唔少香港創作人意識到互聯網世界對傳統媒體嘅衝擊。 Getdemocracy.com發言人穆爾咁話:「電視同影像嘅傳播途徑,由原本從上而下嘅模式,變為由下而上。人人都可創立自己嘅新聞頻道,或者上載家庭生活短片,而隨住愈嚟愈多人欣賞網上短片,電視嘅收視亦會逐漸轉移去電腦螢幕[2]。」

網上社群[編輯]

唔少網民借自拍短片分享個人珍藏同埋心得,好似一位嚟自古巴嘅美國移民 埃利亞斯 咁,佢對男人美腿有特殊喜好,然後喺 YouTube分享佢嘅評足心得。之後佢發現喺Youtube有唔少志同道合嘅人,於是成立「男人腳同好」會,3個月入面已收到超過460個會員[3]亦有英國人透過短片教美國人食以色列雅法橙蛋糕嘅方法,每日接到成200幾個電郵[4]

喺香港,亦都有唔少網民透過上傳短片嚟結集志同道合者,好似六四事件七一遊行嘅短片。亦有以迷戀新聞女主持見稱嘅網民發佈自己嘅女主持影片珍藏。

揭發風氣[編輯]

巴士阿叔事件後,YouTube多咗好多香港網民,佢哋用手機拍低喺巴士、小巴、地鐵乘客眾生相嘅影片。所以YouTube呢種網站除咗對短片拍攝者,甚至影響到一般喺公眾場所活動嘅市民。

協助破案[編輯]

喺香港鴨寮街影音店入面嘅一個閉路電視影到有人偷嘢,事後條片俾人噏撈咗上 YouTube 畀人睇,有警察發覺片入面嘅主角可能係自己伙記,結果嗰位就快退休嘅警察伯伯俾人拉咗,案件交由深水埗區重案組調查[5]

英國都有憑 YouTube 協助破案嘅實例,有個男仔喺街上搶咗其他人嘅眼鏡,成個過程畀人錄低咗,重放埋上 YouTube,嗰度嘅警察憑住條短片入面影到嘅嘢,就拉咗涉案個男仔[6]

侵犯版權[編輯]

YouTube自成立以嚟,入面嘅短片曾被唔少機構同埋公司批評係侵犯版權,好似Saturday Night Live broadcast、NBC Universal、Family Guy videos owners、Turner Media、Sunrise等。被指侵權嘅短片喺版權持有人要求下,YouTube都會刪除。

影片白癡主義[編輯]

PC Magazine發言人咁話:「沉迷短片好浪費時間。一旦迷上,就會變成iVideots(影片白癡)。呢個可以話係影片白癡主義……YouTube就好似食爆谷咁,一食就食極唔停。」[7]

鼓吹社會歪風[編輯]

2006年6月1號,英國獨立電視台(ITV)批評YouTube同近似嘅網站鼓吹暴力,因為呢啲網站上傳咗由手機拍攝嘅打鬥影片。雖然YouTube禁止過份暴力同埋色情嘅影片,但ITV指與呢些網站溝通時有一定困難。

2006年8月11至19號,英國右派團體喺YouTube張貼數段恐嚇影片,模仿伊斯蘭教激進份子「殉道烈士」錄影帶,每段影片嘅長度係二至三分鐘。影片內容係一群白人男性荷槍實彈,手持刀刃棍棒,仿效恐怖份子蒙面裝扮,警告所有穆斯林馬上離開英國。影片中,一名操威爾斯口音嘅男子警告英國穆斯林若不「回家」就會被活活燒死,並說全英國已有許多「同志」受夠咗穆斯林。英國伊斯蘭人權委員會執行長Massoud Shadjareh說,呢些影片嘅出現相當令佢憂心。英國反法西斯主義雜誌《探照燈》發行人Gerry Gable譴責YouTube容許呢類提倡恐怖主義嘅影片存在。

保存同分享文化資訊[編輯]

用戶手上可能有唔少有文化、歷史參考價值嘅舊短片,自己揸嚮手冇意思,放出Youtube公諸同好,有助資源共享,研究世界文化遺產。好似幾廿年前嘅默片,Youtube都有,反映當年歷史、風土人情,文化資料。[8]

惡搞創作[編輯]

YouTube作者有類上載貢獻,係將兩件官方嘅作品加埋一齊,成為惡搞嘢,時有佳作。例如《崖上的波兒、成龍、霸王洗髮液,添加片段,字幕版》[9]

[編輯]

  1. 《YouTube掀全球短片熱 本世紀最旺網站 「巴士阿叔」熱爆香江》,原載《明報》,2006年5月31日
  2. 《YouTube掀全球短片熱 本世紀最旺網站 「巴士阿叔」熱爆香江》,原載《明報》,2006年5月31日。
  3. 《戀腳癖教欣賞男人美腿》,原載《明報》,2006年5月31日。
  4. 《YouTube用家心聲﹕少女教吃橙味蛋糕》,原載《明報》,2006年5月31日。
  5. 《鴨記啊叔偷野實錄》,《東方日報》,2006年8月30號]
  6. "YouTube 助捉賊朋友上載短片「靠害」",《明報》,2006年10月29號
  7. 《YouTube掀全球短片熱 本世紀最旺網站 「巴士阿叔」熱爆香江》,原載《明報》,2006年5月31號
  8. Hong Kong, Gateway to China, 1938 - 中國的大門,香港在1938年
  9. 惡搞 - 崖上的波兒、成龍、霸王洗髮液

出面網頁[編輯]