廣府話

廣府話，又叫廣東話、廣州話、省城話、白話。佢個名就講明佢係嚟自廣東省城廣州。因為佢係廣東省城（廣府），政治經濟都有特殊地位，所以啲粵語專家都會認為佢係粵語嘅標準音。廣府話流行廣州、佛山、中山、香港、澳門，呢啲珠三角地區，廣西、海外都有好多人係講廣府話。因為佢響廣東有特殊地位，唔少人直情叫佢做粵語、廣東話。之不過，「廣東話」呢個叫法同學術上嘅「粵語」定義唔同，廣東重有人講潮州話、客家話。廣東話呢個詞學術上未有定義。粵語方言有好多片，好似臺山話、南寧白話咁，有啲可以同廣州話互通，有啲就好難互通。

不過唔係成個廣州地方講嘅話都係廣府話，以前淨係省城部份係講標準嘅廣府話，出咗城就有差異。後尾英國人響香港起城，香港同廣州有好多商貿來往，廣府話就慢慢代替咗當地粵語分支。而自鴉片戰爭之後，有好多珠江三角洲嘅人來回廣州、香港做嘢。因為咁，廣府話以佢嘅影響力，佢個範圍就擴大好多。另外，廣府地區（粵語粵海片）、韶關、清遠、粵語非廣府地區（粵西）有啲後生仔都識講廣州話，有啲甚至攞廣府話嚟代替自己原有嘅方言作為母語。香港電視，流行曲呢類廣府話流行文化亦加速廣府話擴散。而家講的廣州話同香港粵語其實係同一種語言，只不過表達上因地方唔同，所以會有啲分別，但完全可以理解。

標準口音

廣州音

廣州話係語言學上粵語嘅代表/標準音。用喺標準音係指被認為係標準粵語嘅粵語口音。所有嘅粵語標準音都以粵語廣府音為標準。

普式粵語

隨住喺廣東省嘅學校大力推行普通話，強制用普通話做授課語言，學生好難再喺學校度學到傳統嘅粵語字，尤其喺廣州出面，學生對屋企用嘅方言同埋粵語詞彙有種唔標準嘅感覺，於是就算發音係廣府音，詞彙重淨係靠書面語（普通話詞彙）發音。咁就導致啲後生同啲老人家雞同鴨講。

香港粵語

粵語流通香港。香港人來自五湖四海，口音唔定；而家啲後生仔女鼻音會輕啲，有人講嘢時會夾個英文音，有時本來係ng音會變咗其他音，「恆生銀行」會變咗「痕身un韓」（例如地鐵嘅通告）。香港變咗「heun趕」。

出面網頁

• 廣府話在線語音朗讀（簡體中文）