糖水，北方話叫甜湯，係指液態嘅中式甜品，種類好多，華南地區嘅糖水煮得比較杰，所以會叫做「食糖水」而唔係「飲糖水」。
糖水一般響晚餐後，或者響宵夜嗰陣享用。
糖水可熱食或者凍食，款式按時令而變，譬如夏天食綠豆沙清熱，冬天就食芝麻糊。
廣東較流行嘅糖水傳統上包括紅豆沙、綠豆沙、芝麻糊、花生糊、杏仁糊、合桃糊、雪蛤膏、燉奶、燉蛋、腐竹糖水、清補涼、番薯糖水同雞蛋糖水等。新派嘅有各種生果西米露、西米撈同埋楊枝甘露等等。
