珠江

出自維基百科，自由嘅百科全書

有關珠江、西江、北江同東江整個水系，睇珠江水系。

珠江，舊時叫粵江，係廣州同番禺之間嘅河，流到東莞同南沙之間嘅珠江口出海。中間經黃埔、羅崗、虎門等地方。佢中途有東江水注入。

珠江亦有其他睇法，其一，珠江因為間接受西江、北江水、直接受東江水，所以亦有指係中國第三長河，主要流經廣東，長2400公里；其二，珠江凡珠江三角洲裏便各條河，都當係珠江。

[編輯] 水文

珠江係由省城西南開始。上游有北江喺蘆包，西南潭叉支流，加流溪水，黃洞水等，幾路前後注入石門山側邊嘅石門水。石門水，向南，屈向東就係珠江。

石門水一出，就畀長洲，一個大沙洲一分為二，北便近城就叫珠江，南便近黃埔一段，因為有波羅廟，就叫波羅江。兩條江會合出獅子洋。以前獅子洋係海面，因為周圍沙積成地，就變成珠江一部份，呢段會流向東後，屈向南準備出海。

東江喺獅子洋西便入珠江。而西江亦叉出條支流，由順德出沙灣水，過番禺市橋入埋獅子洋。

東江喺東莞叉一分支，叫到涌水，又係匯入珠江。

珠江到尾，過秀山、虎門，再向南，西便見龍穴島積沙，東面見沙角，就係珠江口，水入南中國海。