岸田文雄
| 岸田文雄 | |
|---|---|
 | |
 日本第100任內閣總理大臣 | |
現任 | |
| 就任日期 2021年10月4號 | |
| 君主 | 德仁 |
| 前任 | 菅義偉 |
| 日本第16任防衛大臣 | |
| 任期 2017年7月28號－2017年8月3號 | |
| 總理 | 安倍晉三 |
| 前任 | 稻田朋美 |
| 繼任 | 小野寺五典 |
| 日本第148-149任外務大臣 | |
| 任期 2012年12月26號－2017年8月3號 | |
| 總理 | 安倍晉三 |
| 前任 | 玄葉光一郎 |
| 繼任 | 河野太郎 |
| 日本第9-10任內閣府特命擔當大臣（沖繩北方對策） | |
| 任期 2007年8月27號－2008年8月2號 | |
| 總理 | 安倍晉三 福田康夫 |
| 前任 | 高市早苗 |
| 繼任 | 林幹雄 |
| 日本第7、8任內閣府特命擔當大臣（科技政策） | |
| 任期 2007年8月27號－2008年8月2號 | |
| 總理 | 安倍晉三 福田康夫 |
| 前任 | 高市早苗 |
| 繼任 | 野田聖子 |
| 日本第10、11任內閣府特命擔當大臣（規制改革） | |
| 任期 2007年8月27號－2008年8月2號 | |
| 總理 | 安倍晉三 福田康夫 |
| 前任 | 渡邊喜美 |
| 繼任 | 與謝野馨 |
| 日本第1、2任內閣府特命擔當大臣（國民生活） | |
| 任期 2007年8月27號－2008年8月2號 | |
| 總理 | 安倍晉三 福田康夫 |
| 前任 | 新創職位 |
| 繼任 | 職位廢除 |
| 日本第1任內閣府特命擔當大臣（再次挑戰） | |
| 任期 2007年8月27號－2007年9月26號 | |
| 總理 | 安倍晉三 |
| 前任 | 新創職位 |
| 繼任 | 職位廢除 |
 自由民主黨第27任總裁 | |
現任 | |
| 就任日期 2021年9月29號 | |
| 副總裁 | 麻生太郎 |
| 前任 | 菅義偉 |
| 日本眾議院議員 | |
現任 | |
| 就任日期 1993年7月19號 | |
| 前任 | 新設選區 |
| 選區 | |
| 個人資料 | |
| 出世 | 1957年7月29號 日本東京都澀谷區 |
| 籍貫 | 日本廣島縣廣島市 |
| 政黨 | 自由民主黨 |
| 配偶 | 岸田裕子 |
| 仔女 | 岸田翔太郎（大仔） |
| 父母 | 岸田文武（父） |
| 親屬 | 岸田幾太郎（太爺） 岸田正記（阿爺） 井口良二（阿公） 岸田正次郎（叔公） 小田勝（父系舅公） 宮澤弘（姑丈） 宮澤洋一（表哥） 可部哲生（妹夫） |
| 母校 | 早稻田大學法學部 |
| 簽名 |  |
| 網站 | kishida |
岸田文雄（粵拼：ngon6 tin4 man4 hung4，岸田 文雄（きしだ ふみお?），1957年7月29號—），日本政治人。喺2021年10月開始出任內閣總理大臣、自由民主黨總裁，亦係宏池會會長。做過防衛大臣、外務大臣、內閣府特命擔當大臣（包括：沖繩及北方對策擔當、規制改革、國民生活、再次挑戰、科學技術政策）等等職位，由1993年到而家一直係眾議院議員。
生平[編輯]
早年[編輯]
1957年7月29號，岸田文雄喺東京都澀谷區出世，祖籍廣島縣。岸田家族係當地嘅一個名門望族，阿爺岸田正紀做生意、之後亦加入政壇，老豆岸田文武當時係通商産業省官僚。出於屋企人嘅教育方針，佢自細係響東京大。
1963年，當時6歲嘅佢跟住加入政界嘅老豆前往美國紐約市，響當地渡過三年小學生涯。1966年返日本，到千代田區立永田町小學校插班。之後升讀千代田區立麹町中學校、開成高等學校。響高中畢業之後，佢為咗入到東京大學而過左兩年浪人生涯，但係入唔到東京大學，最終響1978年入讀早稻田大學法學部。1982年大學畢業後入日本長期信用銀行打工，響長銀做咗五年。
政治生涯[編輯]
1987年，岸田出任佢老豆岸田文武嘅秘書，正式加入政界。
1993年，佢喺廣島縣第 1 區當選眾議院議員，[1]之後就連續九屆當選，一直做到依家。佢同老豆一樣都係屬於宏池會成員。響1997年，佢出任自民黨青年局局長。
2000年，時任首相森喜朗因為多次講錯嘢而民望大跌，宏池會會長加藤紘一同埋山崎拓聯同在野黨提出「不信任動議」，希望籍住反對或者缺席而令議案獲得通過，又叫「加藤之亂」。當時屬於宏池會嘅岸田有份參加支持加藤嘅血判狀，但響投票時冇出席。之後佢加入反加藤嘅內派。
2001年，佢響第一次小泉內閣出任文部科學副大臣。2007年，響第一次安倍改造內閣出任內閣府特命擔當大臣（沖繩及北方對策、國民生活、再次挑戰、科學技術政策、規制改革擔當），係岸田第一次入閣。
之後響福田康夫內閣獲得留任，出任內閣府特命擔當大臣（沖繩及北方對策、國民生活、科學技術政策、規制改革擔當）。2008年改任消費者行政推進擔當、宇宙開發擔當。響同年8月嘅福田康夫內閣 (改造)唔撈，之後出任自民黨消費者問題調査會長・道路調査會副會長兼事務局長、團體總局長。
2011年9月，響谷垣禎一出任自民黨總裁期間，岸田畀人任命為自民黨國會對策委員長。2012年接替宣佈退出政壇嘅古賀誠，做咗宏池會阿頭，係宏池會第9任會長。
外相[編輯]
.jpg){kind=spacer}
同年畀人任命為第二次安倍內閣嘅外務大臣，之後就響五次內閣都獲得留任。任內曾經將端島列入文化財，韓國認為端島發生過「forced to work（強制勞動）」所以非常唔妥岸田嘅做法。
2015年12月岸田帶頭同韓國時任外交部長尹炳世就慰安婦問題而見面傾，最後傾成咗，日本以十億嚟得到韓國政府原諒，而且簽埋慰安婦協議。當然呢單嘢梗係響韓國內部激嬲好多幫慰安婦嘅人（文在寅上台之後就單方面毀約）[2]。
2016年4月底至5月開頭，岸田曾經到北京同外交部長王毅、國務委員楊潔篪、國務院總理李克強三個人見面，係自2012年以嚟第一位外相訪問中國[3]。
2016年，當時身為外相嘅岸田有份出席第42屆七國集團會議，帶住其他國家嘅外交部長一齊訪問廣島和平紀念公園。同年5月，美國總統奧巴馬訪問日本，岸田於是跟住安倍一齊帶佢同廣島和平紀念館參觀。
2017年7月28號，時任防衛大臣稻田朋美唔撈，由外相岸田上位，所以岸田身兼兩職。
8月3號，安倍改組內閣，岸田調任黨內嘅政務調査會長，係當時日本有記錄以嚟，在任時間第二長嘅外相。
外相唔撈後[編輯]
2018年9月，響第25屆自民黨總裁選舉，岸田曾經諗過參選，但響面對派內後生嘅「主戰」同埋舊人嘅「慎重」爭持之下，佢最終決定唔參選，而係宣佈支持安倍晉三連任，而佢就繼續做返政調會長。
2018年10月、自民黨總裁轄下嘅直屬機關入面廢除咗『道州制推進本部』、『日本経済再生本部』、『外交戦略会議』、『農林水産業・地域の活力創造本部』、『歴史を学び未来を考える本部』五部，目的就係為咗加強政調協會嘅權力。
2020年8月安倍宣佈唔撈首相同埋黨總裁，岸田響9月1號參加自民黨總裁選舉，對手有菅義偉同石破茂。最終佢輸咗畀獲得安倍支持嘅菅義偉，之後佢就唔撈政調會長。
2021年3月，佢畀人任命為自民黨廣島縣連會長，係第三次出任呢個位。
同年5月25號，佢同幹事長、志帥會現任阿頭二階俊博見面。由於響2019年參議院選舉，廣島選舉區時任議員係屬於宏池會嘅溝手顯正。不過響安倍同菅義偉嘅領導下，叫嚟河井克行老婆河井案里參選，由於河井兩公婆同屬志帥會，因而畀人睇成係岸田同二階爭地盤。最終當選人係河井案里，溝手輸咗。之後河井案里傳出響選舉期間畀咗超過法例規定嘅報酬，惹嚟公安調查。之後畀人爆出原來河井克行響選舉期間向廣島地方議員派錢、叫佢哋支持老婆，引起社會重視。之後有傳媒響2020年1月爆話，當時自民黨本部一共畀咗河井兩公婆一億五千萬日圓。最終河井案里畀人判有罪、同埋當選無效。呢件事成為岸田同二階兩人嘅鬥爭。岸田要求黨向公眾作出解釋，解除公眾嘅疑慮。
2021年8月26號，黨內宣佈會搞自民黨總裁選舉，同日岸田即刻宣佈參選。而時任菅義偉話自己唔會連任首相，所以佢嘅對手有河野太郎、高市早苗、野田聖子三個人。
首相時代[編輯]
2021年9月29號，總裁選舉正式投票。響第一輪，佢同另一對手河野太郎分別攞到256同255票，因而進入第二輪；而岸田響第二輪以257票打低只有170票嘅河野，接替菅義偉出任第27任自由民主黨總裁。佢喺10月4號正式成為第一百任內閣總理大臣[4]。佢隨即喺10月14號解散眾議院，定喺10月31號投票，係二戰之後最早解散眾議院嘅日本首相。[5]結果自民黨攞到275席，雖然比上屆少，但始終保住第一大黨嘅地位。。
2022年8月10號，岸田改組內閣。雖然岸田率領嘅自民黨響七月嘅參議院選舉大勝，但選前因前首相安倍晉三同統一教嘅關係，統一教以朝鮮日治時期日本響韓國犯下嘅罪行要求日本信徒畀好多錢，令自民黨聲譽受損，加上肺炎令物價上漲，日元瘋狂貶值，岸田嘅支持率開始下降，迫使岸田改組內閣以挽回民望[6]，並且響8月5號下令徹查黨員同統一教嘅關係，查出6位黨員同統一教關係密切，有文部科學大臣末松信介、內閣府特命擔當大臣（經濟再生）山際大志郎、經濟產業大臣萩生田光一、防衛大臣岸信夫、國家公安委員會委員長二之湯智同內閣官房副長官磯﨑仁彥[6][7][8]。雖然岸田本身同統一教冇直接關連，佢本人亦澄清過，但有7位岸田內閣成員響8月13號先後承認同統一教有關係，除咗先前已經畀人查出嘅山際大志郎外，仲有厚生勞動相加藤勝信、內閣府特命擔當大臣（經濟安全保障）高市早苗、外相林芳正、總務大臣寺田稔、環境大臣西村明宏同內閣府特命擔當大臣（地方創生）岡田直樹[9]。《週刊文春》9月1號再踢爆「岸田文雄後援會」會長中山峰男曾經出任提倡建築日韓海底隧道組織嘅董事，而呢個組織背後係由統一教教祖文鮮明成立[10]。接二連三有黨員爆出同統一教關係緊密令岸田內閣支持率大跌，岸田為咗挽回民望，響10月27號下令調查統一教[11][12]。
2022年9月27號，前首相安倍晉三國葬響日本武道館舉行，岸田以葬禮委員會委員長嘅身份出席並發表追思演說[13]。
2022年10月4號，岸田文雄任命自己大仔岸田翔太郎出任內閣總理大臣秘書官。呢項人事任命惹嚟非議，認為佢「公私不分」，岸田文雄則解釋係「任命合適嘅人出任合適嘅位置」。而「週刊新潮」響2023年1月先後三次爆出岸田翔太郎響陪老豆岸田文雄出國個陣先後坐使館公務車到英國同法國嘅高級百貨公司購物，日本副官房長官木原誠二解釋岸田翔太郎到百貨公司買野個陣並冇坐公務車，而且佢係買嚟送畀內閣官員做伴手禮[14]。但批評岸田「用人唯親」嘅聲浪就越嚟越高。
2023年3月21號，岸田秘密出訪烏克蘭，並同總統澤連斯基會面。
2023年4月15號，岸田文雄前往和歌山市為2023年日本補選和歌山縣第1區自民黨候選人門博文拉票個陣[15]，畀人一名24歲嘅男人木村隆二掟爆彈，岸田未有受傷，不過都係撤離，並改響和歌山車站拉票[16]。
政治主張[編輯]
- 主張建立一套屬於日本嘅資本主義，反對新自由主義。
- 認為安倍經濟學令到貧富懸殊問題更加嚴重，支持分配畀中層人士。
- 支持用田園城市理論嚟振興地方。
- 反對日本擁有核武。
- 認為漫畫同動畫都應該享有言論自由。
- 反對設立女性宮家。
- 反對引入夫婦別姓制度，亦唔支持同性婚姻合法化[17]。
- 認為應該「限制行使」集體自衛權。
屋企[編輯]
岸田家族係廣島當地嘅一個名門望族。阿太岸田幾太郎（1867年 - 1908年）係一位生意人，到過台灣發展，做過好多行職業。阿爺岸田正記（1895年 – 1961年），初時係開雜貨鋪，後嚟轉行做政治人，先後出任海軍政務次官同眾議院議員。太叔公岸田光太郎（1872年 - 不詳）、叔公岸田正次郎（1897年 – 1979年）亦係生意人。
老豆岸田文武（1926年 - 1992年），未玩政治前係通產官僚，後嚟繼承老豆正記嘅飯碗，曾經係眾議院議員。阿媽澄子，係前日東製粉社長井口良二個女。
文雄係大仔，下有一個細佬同兩個妹。細佬岸田武雄係三菱商事勤務；大妹純子嫁咗畀財務官僚木村嘉秀；細妹典子就嫁咗畀前國税廳長官可部哲生。
老婆岸田裕子，係經相睼下結婚，有三個仔，其中大仔岸田翔太郎依家係岸田文雄嘅秘書，據指有意進入政壇[18]。
佢有個姑姐叫玲子，嫁咗畀前廣島縣知事宮澤弘。佢哋有個仔叫宮澤洋一（即係岸田嘅表哥），亦係政治人，依家係參議院議員。
參攷[編輯]
- ↑ "Profiles of key ministers in Abe's new Cabinet". The Asahi Shimbun. 26 December 2012. 原著喺25 January 2013歸檔. 喺27 December 2012搵到.
- ↑ 歐敬洛 (2021-09-28). 〈自民黨總裁選舉｜韓國專家：誰當選亦難改善日韓關係〉. 《香港01》 (香港中文). 喺2021-10-27搵到.
- ↑ 霧谷晶策 (2021-11-10). 〈日本大選後的美中韓難題：「岸田首相」能否延續「岸田外相」的外交成就？〉. 《The News Lens 關鍵評論網》 (中文). 喺2021-11-10搵到.
- ↑ "Fumio Kishida: Japan's new prime minister takes office". BBC (英文). 2021-10-04. 喺2021-10-22搵到.
- ↑ 〈日本解散眾院訂31日投開票 創3項戰後最短紀錄〉. 《中央通訊社》 (中文). 2021-10-14. 喺2021-10-22搵到.
- ↑ 6.0 6.1 〈亞洲週刊〉. www.yzzk.com. 喺2023-05-13搵到.
- ↑ 鄭仲嵐 (2022-10-29). 〈岸田政權面臨垮台危機：經濟再生大臣因統一教緊急請辭，是否引發黨內「骨牌效應」？〉. 《The News Lens 關鍵評論網》 (中文). 喺2023-05-13搵到.
- ↑ 〈木原副長官、旧統一教会問題の政府見解問われ「コメントは控える」：朝日新聞デジタル〉. 《朝日新聞デジタル》 (日文). 2022-08-01. 喺2023-05-13搵到.
- ↑ 〈第2次岸田改造内閣が発足 「旧統一教会と関係」閣僚に7人〉. 《毎日新聞》 (日文). 喺2023-05-13搵到.
- ↑ 〈崇城大の中山学長、旧統一教会関連団体の「日韓トンネル県民会議」議長を務める 文春報道受け23日付で辞任｜熊本日日新聞社〉. 《熊本日日新聞社》 (日文). 2022-08-24. 喺2023-05-13搵到.
- ↑ 中時新聞網. 〈岸田文雄指示調查統一教 可能剝奪宗教公司地位 - 國際〉. 《中時新聞網》 (中文). 喺2023-05-13搵到.
- ↑ 聯合新聞網. 〈日媒民調：岸田內閣支持率跌至25% 執政以來新低〉. 《聯合新聞網》 (中文). 喺2023-05-13搵到.
- ↑ 〈政府、安倍晋三元首相の国葬を閣議決定 9月27日に日本武道館で〉. 《毎日新聞》 (日文). 喺2023-05-13搵到.
- ↑ 〈岸田長子挨批「靠爸」空降首相秘書 爆出國搭公務車觀光〉. Yahoo News (中文). 喺2023-05-13搵到.
- ↑ 〈日相岸田遇襲處眾院和歌山選區 維新會攻下一席〉. Yahoo News (中文). 喺2023-05-13搵到.
- ↑ 歐敬洛 (2023-04-15). 〈岸田文雄遇襲︱爆炸品為15厘米銀色筒狀物 岸田下午繼續演說〉. 《香港01》 (香港中文). 喺2023-05-13搵到.
- ↑ 〈日本眾議院大選 最大在野黨推人權議題搶攻選民〉. tw.news.yahoo.com (中文). 喺2021-11-12搵到.
- ↑ 〈「気さくな人柄」裕子夫人 地元にファン多く―ファーストレディーはこんな人：時事ドットコム〉. web.archive.org. 2021-10-04. 歸檔時間2021-10-04. 喺2023-05-13搵到.
{{cite web}}: CS1 maint: bot: original URL status unknown (link)
出面網頁[編輯]
 |