李小龍

李小龍
藝人
原名	李振藩
羅馬拼音	Lee Siu Lung
英文名	Bruce Lee
生日	1940年11月27號
生地	美國加州三藩市
死	1973年7月20號（32歲）
死地	香港
配偶	Linda Lee Cadwell（1964年－1973年）
職業	演員、導演、武術家
活躍年代	1941年至1973年
網站	Bruce Lee Foundation The Official Website of Bruce Lee

李小龍像

李小龍（Bruce Lee，1940年11月27號—1973年7月20號），原名李振藩，乳名細鳳。國際影星，武打巨星，始創截拳道，係佢將 Chinese Kung Fu 一詞介紹畀全世界。

屋企

李小龍喺三藩市出世。祖籍廣東順德，響家下均安鎮。老豆係粵劇丑角李海泉，阿媽係商人何甘棠個女 Grace 何愛榆 ，亦都係香港人。

李小龍有一仔一女，個仔係李國豪，個女係李香凝。

事業

李小龍響二次大戰後返香港，1949年起先後讀過德信學校、喇沙書院同埋聖芳濟書院。佢喺1946年到1959年做童星，拍咗幾十套粵語片，包括《細路祥》同埋《人海孤鴻》。

李小龍響12歲時拜葉問為師學詠春。除此之外，佢重練過洪拳、白鶴拳、譚腿、少林拳、戳腳、節拳等等。1957年佢奪得香港校際拳擊比賽少年組冠軍。1959年5月去咗美國西雅圖嘅華盛頓大學讀哲學同心理學。響美國嗰陣，佢仍然進修緊武藝，除咗傳統中國武術之外，重研究西洋武術，正式確立咗佢嘅武道哲學「截拳道」。

1964年佢出席咗美國加州長堤國際空手道錦標賽（Long Beach Karate Tournament）。響嗰度佢被電視劇《蝙蝠俠》製作人威廉多茲爾（William Dozier）賞識，邀請試鏡。結果喺1966年4月30日，李小龍同美國廣播公司簽咗30集電視劇《青蜂俠》嘅演出合約，飾演配角「加藤」（Kato），但只能夠播出一季共 26 集。其後佢以加藤角色演出咗三集《蝙蝠俠》，同理喺《無敵鐵探長》（Ironside）同《新娘駕到》（Here Come the Brides）中客串。

由於佢唔願意只係響《青蜂俠》扮特技人，決定返香港拍電影，同著名電影人鄒文懷合作拍攝咗五部電影：《唐山大兄》、《精武門》、《猛龍過江》、《龍爭虎鬥》、《死亡遊戲》。當時香港電影經過咗六十年代最高峰之後，票房一直慘淡，李小龍嘅戲為香港電影重新註入活力，重令到功夫片成為港產片嘅主流。佢嘅戲影響重遍及全球，全球包括香港在內，都掀起咗一陣「李小龍熱」。

== 死 1973年7月20號李小龍喺佢女性朋友屋企死咗。當時李小龍計劃同鄒文懷約見澳洲演員傾談演出《死亡遊戲》嘅事，但到咗晚黑十點，佢俾人發現死喺九龍塘筆架山一個單位入面。

據當時檢驗報告顯示：李小龍全身最有問題嘅部份凈得胃一個。佢嘅胃入面含有好似大麻咁嘅物質，但係分量好少，冇致命性。因此由香港政府發出嘅死亡證上，只係寫住「死因不明」。由於發生得太過突然，香港政府進行咗死因聆訊，最後確定李小龍死因係「服用含有過敏成分嘅止痛藥，而引發咗急性腦水腫」。

但佢嘅死因到而家始終係一個謎。尤其係唔少人猜測李小龍在生嗰陣係咪服食過啲違禁藥物練功。而比較合理嘅講法，就係話李小龍個腦本身有隱性疾病，到佢死嗰陣突然間病發。

影響

李小龍係香港電影史上一個最具影響力嘅人物，尤其係佢以功夫武打片挽救了當時瀕臨玩完嘅港產片，重開創咗華人打入荷里活嘅先河。響呢一點上，華人演員入面，都暫時重未有其他人可以好似李小龍咁，影響全球之外，重瘋魔咗好幾十年。

佢嘅電影使出嘅都係真功夫，而佢所施展嘅就係「截拳道」，係李小龍集各家大成而嚟咁廣泛。

李小龍一生共拍咗五部功夫片。雖然只得五部，但呢五部戲就刺激咗動作片響香港嘅發展。動作片響港產片全盛期係最賣座嘅一類，捧紅咗唔少動作巨星，好似有成龍、洪金寶、李連杰、甄子丹等等。其中成龍重話：「冇李小龍就冇我。」

維基語錄收錄咗同呢篇文相關嘅摘錄：

李小龍

維基同享有多媒體嘅嘢：

李小龍

拎

• 李小龍會
• 《功夫傳奇》李小龍決鬥羅禮士 - 唯美版 (中文)。
• 《藝海星沉》李小龍傳奇長存 (中文)。