功夫

出自維基百科,自由嘅百科全書
打功夫

功夫係由打交發展出來嘅運動。功夫同打交唔同之處,就係每一套功夫都好着重搏擊嘅技巧,有一定招式同埋好多技術串連其中,要有攻亦有守,可以見招拆招,呢啲都需要練習先會成功嘅;而打交係完全唔使章法,唔使講技巧,總之你一拳我一腳,打贏打輸就要睇吓邊個夠體力頂得住嘞。

練功夫一定要練基本功,因為功夫講求體力好、馬步穩,起手有勁。作為功夫嘅基礎,基本功係需要經常練習,有咗健全嘅基本功,甚至可以發展出自己嘅一套獨門功夫。

嵩山少林寺被譽為功夫嘅發源地,自古有句說話叫做「天下武功出少林」其實並冇誇張,因為少林主張每種功夫都要由最根本練起,冇根基自然唔會有更高更深嘅武學。佢哋除咗提倡修身之外,修心養性亦都係練武之人要學嘅好重要一環,所謂招由心生,仁者出手留三分,惡者出手不留人,以武救人,或者以武害人,就要睇練武人嘅心性係點囉。

更高層次嘅功夫嚟講,除咗馬步起手之外,好多時重要講求眼明、耳聰、手快、步靈,甚至要以心感招;而功夫重會分好多唔同嘅打法,關於用手腳嘅有拳法、爪法、腿法,重有借助外物嘅好似劍法、刀法、棍法、槍法……等;每套功夫都有佢嘅長處,都有佢剋敵嘅利害,所以功夫呢門學問其實真係好博大精深。

今日練功夫嘅人旨在用嚟強身健體同埋自衞用,絕對唔主張撩事鬥非,門派與門派之間亦唔會再有門戶之見,開心見誠咁論武;而且間唔中重會有國際性嘅武術比賽畀一眾嘅練武人聚首一堂,展演所學嘅武藝。