黑龍江省

黑龍江省，簡稱「黑」，係全中國最北嘅省，屬於東北地區，省名係以中俄交界嘅黑龍江嚟命名；北面同東面係俄羅斯，南面接住吉林省，西面接住內蒙古。佢嘅省城係哈爾濱市。

全省由西北到東南都係連續嘅山地，包括大興安嶺、小興安嶺、完達山、張廣才嶺等山脈，其中好多係火山。而西南部嘅松嫩平原係主要嘅農業區同人口聚居區域。黑龍江、烏蘇里江同埋松花江交彙嘅地區就係三江平原，入面有大片沼澤濕地，係著名嘅「北大荒」，俾國家開墾成建設兵團。中國邊疆最東點（黑瞎子島），同埋最北點（漠河）都響黑龍江省。

黑龍江省係中國鐵路通車里程最長嘅省，幾乎所有重要城市都有火車接駁；公路、內河航運都好發達；省入面有兩個國際機場，分別係哈爾濱太平國際機場同牡丹江海浪機場，機場航線可以飛去全國重要城市，同埋少數境外城市。

氣候

黑龍江屬中溫帶同寒溫帶之間嘅溫帶季候風氣候，年均溫度-4℃到5℃，從東南部出發，越往西北越凍，東南部同西北部嘅年均溫差近10℃。一月氣溫係-32℃到-17℃，七月氣溫係16℃到23℃。一年當中好天較多，有90日到120日係無霜期。年均降雨量400到700毫米。春天嗰時松嫩平原同三江平原有豐富嘅風能。