金鐘

出自維基百科,自由嘅百科全書
跳去: 定向搵嘢
金鐘道一景。由金鐘道行人天橋影出去。中為電車,左為政府合署,遠見中銀大廈,右僅僅睇到力寶中心

金鐘(英文Admiralty)係香港一地,喺香港島北岸。按四環九約,金鐘查實係中環嘅分區,喺下環側邊,卽係同今日灣仔拍埋,舊時以英軍重地,今日主要係寫字樓商場

歷史[編輯]

金鐘雖然係中環一部份,但係佢自英國1841年得到香港開始,就係英軍軍事重地,三軍司令官邸都係響呢區。威靈頓兵房域多利兵房美利兵房、同金鐘船塢。金鐘呢個名就來自金鐘船塢呢個海軍船塢,因為裏面有個金色銅鐘而來。而英文名Admiralty就係船塢個英文名Admiralty Dock而來。裏面重有香港海平面高低嘅基準。

因為佢響中環同灣仔市區中間,阻住市區發展,亦唔可以響海邊加新路,所以開埠以來,香港政府一直都想佢搬走,不過礙於英軍反對而無結果。1970年代起,軍事模式同百年來已經好唔同,無必要響市區大量駐軍,所以英軍同意逐漸搬走,畀返啲地香港政府。美利樓搬咗去赤柱做古蹟,而1878年就有嘅海軍船塢就填平,喺對出新填地起咗添馬艦海軍基地同威爾斯親王大廈英軍總部,即係今日駐港解放軍總部。淨低嘅旗杆屋,即係前三軍司令官邸,變成茶具文物館。其他嘅地方最尾唔係變成公園,就係寫字樓,或者政府辦公大樓。

1980年,香港地下鐵路通到金鐘,重有個金鐘地鐵站起響呢度,自始呢區有自己個名,叫金鐘或者Admiralty。

大廈[編輯]

呢區有多棟大廈,有力寶中心(舊名奔達大廈)、統一中心遠東金融中心亞太金融中心美利大廈海富中心太古廣場連帶港島香格里拉酒店港麗酒店萬豪酒店等。

政府嘅有高等法院警政大樓堅偉大樓金鐘道政府合署等。後來添馬鑑呢塊地起咗香港政府總部。其中警政大樓亦係中環警察總部。

商場有太古廣場金鐘廊

另外海皮有中信大廈香港紅十字會總部。因為自成一角,唔少人當佢響灣仔。

公園[編輯]

呢區山邊主要有香港公園夏愨公園海富公園。香港公園除咗有上面講過嘅旗桿屋,重有紅棉路婚姻註冊處,係香港結婚勝地。

交通[編輯]

呢區最主要有兩個大道,一條係金鐘道,以前係皇后大道東一部份,有香港電車行過。以往未拉直之前,裏面有一個金鐘道死亡灣角,成日有大單交通意外。另一條係夏愨道,較為近海邊,打通咗灣仔告士打道同中環干諾道中。金鐘廊下面有個好大嘅金鐘巴士總站,而下面金鐘地鐵站係荃灣綫港島綫轉車站,係港島其中一個公共交通輸紐。