港元

出自維基百科,自由嘅百科全書
跳去: 定向搵嘢
呢篇文章係香港經濟系列之一
就業
農業
漁業
工業
商業
旅遊業
證券交易
上市公司
貨幣 - 外匯基金
金融管理
港口
CEPA
自由行
消費物價
其他香港系列
文化 - 地理
歷史 - 政治 - 教育
香港主題首頁

港元(讀音:gong2 jyun4)(原寫港圓,又叫做港幣或者港紙)係香港嘅法定流通貨幣。1997年7月1號之後,按照香港基本法中英聯合聲明,香港嘅自治權係包埋自己發行貨幣嘅權力。港元正式嘅ISO 4217簡稱係HKD(Hong Kong Dollar);標誌係HK$。港幣單位係「圓」(又叫做「」或者「蚊」),十分一圓就係「毫」(又叫做「毫子」),十分一毫就係「仙」(初時叫做「仙時」或者「仙屎」,五仙亦有人叫「斗零[1]」),而十分一仙就叫做「文」。最初嘅港元係銀圓,之後亦都同價掛鈎,所以港元好多都叫做港銀(銀讀陰上聲)。

港元嘅紙幣絕大部份係喺香港金融管理局監管下由三間發鈔銀行發行嘅(三間發鈔行參看紙幣)。而硬幣就由金融管理局負責發行。由1983年開始,香港建立咗港元發行同美金掛鈎嘅聯繫匯率制度。發鈔行喺發行任何數量嘅港幣時,一定要照7.80港紙兌1美金嘅兌換匯率同金管局交出美元,記落香港外匯基金賬目,攞埋負債證明書之後先至可以印銀紙。咁樣,外匯基金揸住嘅美金就幫港元紙幣嘅穩定提供支持。

雖然港元只係喺香港有法定地位,但係喺澳門中國大陸好多地方都接受港元。而且,喺澳門嘅賭場,港元係澳門元之外唯一接受嘅貨幣。

歷史[編輯]

根據考證,香港係最先將通貨叫做「圓」嘅地方。本來香港成為英國殖民地嘅初期,係採用英國嘅貨幣。但係因為當時同中國大陸嘅貿易主要用嚟做單位,令到各地嘅銀圓:包括墨西哥鷹洋同中國大陸嘅銀圓都喺香港自由流通。後嚟,政府為咗有效管理嗰度嘅通貨,就採用銀圓做基本通貨單位,而銀圓呢個詞亦都由原先嘅形容詞變咗做量詞。1863年香港首次發行官鑄貨幣,亦喺1866年成立鑄幣廠。當時香港生產嘅一圓銀幣,都會印住「香港壹圓」四個字。而呢個通貨嘅叫法亦喺香港傳返去中國大陸、日本韓國,成為度度通貨單位嘅叫法。後嚟鑄幣廠喺1868年關閉,香港改用其他銀圓做法定貨幣。

1935年,因為美國等等嘅地方銀價上升,引起中國同香港嘅白銀外流。香港政府喺1935年11月9日通過貨幣條例,公佈用「港元」做香港貨幣單位,又將港元同英鎊匯率定成16港元兌1英鎊。(中國係喺香港通過用港元做貨幣之前嘅五日,即係11月4日宣佈放棄銀本位,轉用法幣。)喺1937年8月1日,香港終止咗各種銀元嘅流通,淨係用港元做法定貨幣。二次大戰日本佔領香港嗰陣,強行用日本軍用手票嚟代替港元。戰後港元先至恢復法定地位。

港元最初係同英鎊掛鈎,但係戰後英國嘅經濟實力減弱,有段時間更加係咁貶值,影響香港經濟。所以香港政府喺1972年6月對英鎊自由浮動之後,將港元轉做同美元掛鈎。最初匯率係5.65港元兌1美元。喺1973年2月改做5.085港元兌1美元。1974年11月起,轉做自由浮動。直到1983年,因為香港前途問題引起嘅信心危機令到港元匯價勁跌,到咗同年9月一度跌到9.6港元兌1美元。由同年10月17日開始,當時嘅財政司彭勵治宣佈港元匯價同美元掛鈎,定做7.80港元兌1美元,一直維持到而家。2005年,金管局優化聯繫匯率制度,提供雙向兌換保證:強方兌換保證匯率係 7.75,而弱方係 7.85。

銀紙[編輯]

香港最初嘅紙幣係由1845年喺香港成立嘅東藩匯理銀行發行。喺1935年政府通過貨幣條例之前,好多銀行都有發行銀紙,但係呢啲銀紙主要用做商業上嘅交易。政府只係接受部份特許銀行嘅銀紙做合法通貨。1935年之後,政府授權香港上海滙豐銀行有利銀行(後嚟畀香港上海滙豐銀行收購咗)同埋印度新金山中國匯理銀行(後嚟輾轉改叫做渣打銀行)發行5蚊以上嘅港元紙幣。而面額1蚊同之下嘅港元紙幣就由香港政府發行。香港政府喺1976年發行5蚊硬幣(一般叫做「銀」)之後,5蚊紙就停止發行。由1993年開始,政府發行10蚊銀,滙豐銀行就從此冇再發行10蚊紙,渣打銀行雖然繼續發行10蚊銀紙,但係喺1995年之後就唔再出10蚊銀紙。後嚟,1994年中國銀行亦都做咗香港一間發鈔銀行。

政府原本嘅意思係用10蚊硬幣嚟代替10蚊銀紙,但係市面上好多人都需要用10蚊銀紙:一嚟因為10蚊硬幣好重,二嚟每逢過農曆新年嗰陣,唔少人都鍾意用新銀紙嚟封利是,而為咗唔好畀人覺得寒酸,好多人都只係會喺利是封放銀紙而不放硬幣。不過,自從亞洲金融風暴以嚟,香港經濟越嚟越差,所以唔少人都叫政府出番10蚊銀紙。另外,又因為10蚊硬幣好容易偽造,喺發行之後幾年嚟政府同銀行都收到唔少假銀,中間重有幾多單大量生產嘅畸士。所以政府喺2002年開始,再次由金融管理局出10蚊銀紙,但係另一方面,滙豐銀行同渣打銀行唔再發行10蚊銀紙之後,開始大量發行20蚊銀紙。而家用紙幣編號嚟計,20蚊紙發行量最多,其次係100蚊紙。

政府喺1995年之前曾經發行1仙嘅銀紙,係為咗方便找錢同埋用嚟交公共服務賬單嘅仙額。呢啲銀紙喺1995年10月1日之後就唔再被接受做合法貨幣。

而家香港紙幣嘅發鈔銀行有3間,分別係:

另外有啲新款十蚊紙,係由香港金融管理局發行。2007年,當時財政司司長唐英年公佈嗰年7月9日將發行十蚊膠銀紙,係香港第一次發行塑膠銀紙;第一批發行嘅有五千萬張。膠銀紙任搣、任扯都唔會爛,可以放入洗衣機;印製嘅成本雖然高過紙幣四成,但係壽命就比紙幣長三倍,兼可以循環再造,唔使好似紙幣咁要送去堆填區。膠銀紙更加耐用和乾淨;票面係光面嘅,塵、污垢等微粒都冇疔匿。

香港所有銀紙嘅式樣都有版權。所以,咩嘢人喺未攞到版權持有人嘅許可之前,都唔可以亂咁抄銀紙嘅式樣。多年以嚟,喺香港有幾間機構因為未攞到銀紙版權持有銀行嘅批准,而喺廣告上面抄銀紙嘅式樣,結果被判要畀鉅額罰款。

銀仔[編輯]

1997年香港主權移交之前,市面流通銀仔(1毫、2毫、5毫、1圓、2圓、5圓)上鑄有英女皇頭像,有一排成為咗收藏對象。由1993年開始,政府逐漸收返舊硬幣,用背面鑄有香港市花洋紫荊嘅新硬幣嚟代替,又推出俗稱「金銀閏」嘅10蚊硬幣(只係喺1994年1995年發行)。但係英女皇頭硬幣仍然係合法貨幣,同新硬幣同時流通。

幣值有:

幣值 簡介
1文(指1文錢) 等於千分之一蚊。喺1863年1865年期間發行,10文錢等於1仙。
1千 只係喺1866年發行,同1文錢一樣。
1仙 等於百分之一蚊。喺1863年1941年期間發行,戰後畀一仙紙幣取代(1995年停止流通)。
5仙 1863年1979年期間發行,最後嘅5仙硬幣係喺1988年推出,1989年停止流通。港幣5仙俗稱斗零[2]
1毫 等於十分之一蚊。由1863年開始發行到而家,1935年改用鎳鑄造,1948年改用黃銅-鎳合金鑄造,1982年體積縮小,1994年改用黃銅鍍鋼鑄造。
2毫 1866年開始發行,用銀鑄造,到1905年停止發行,直到1975年開始又再鑄造,波浪形設計。
5毫 1866年開始發行,嗰時叫做「半圓」,用銀鑄造,到1905年停止發行,直到1951年開始又再鑄造,用紅銅-鎳合金鑄造,1977年改用黃銅-鎳合金鑄造,1993年改用黃銅鍍鋼鑄造。
1圓 1866年開始發行,用銀鑄造,到1868年停止發行,直到1960年開始又再鑄造,用紅銅-鎳合金鑄造,1978年體積縮細,曾經喺1993年試用紅銅鍍鋼鑄造,但係唔太成功,製成嘅硬幣出現生鏽或者磁化等等問題。1994年重新用紅銅-鎳合金鑄造。
2圓 1975年開始發行,波浪形硬幣,用紅銅-鎳合金鑄造。
5圓 1976年開始發行,用紅銅-鎳合金鑄造,初時係十角形嘅,但係因為容易被偽造,所以喺1980年轉為鑄造圓形而且較厚嘅,又喺硬幣嘅邊沿加上凹坑同刻字。
10圓 外層用紅銅-鎳合金鑄造,內層用黃銅-鎳合金鑄造,所以俗稱「金銀閏」,只係喺1994年1995年發行,但係因為容易被偽造而唔再出。

根據香港《硬幣條例》規定,市民可以唔接受用細過1蚊嘅硬幣,畀超過2蚊嘅錢;或者用1蚊或大過1蚊嘅硬幣,畀超過100蚊嘅錢。不過講到尾,商戶受唔受硬幣做畀某啲商品或者服務嘅費用,純粹係商業決定。

流通貨幣[編輯]

硬幣
最新港元硬幣同紙幣式樣
面值 ($) 質料 外形
一毫($0.10) 黃銅合金 圓形
二毫($0.20) 黃銅合金 波浪形裙邊
五毫($0.50) 黃銅合金 圓形
一圓($1) 白鎳合金 圓形
二圓($2) 白鎳合金 波浪形裙邊
五圓($5) 白鎳合金 圓形,邊沿上面刻住中文字「香港伍圓」同英文字「HONG KONG FIVE DOLLARS」
十圓($10) 外環白鎳合金;黃銅合金圓心 圓形
紙幣
面值 ($) 顏色 反面地標圖案(香港上海滙豐銀行中國銀行渣打銀行
十圓($10) 紫色 政府發行,有發行時財政司司長香港金融管理局主席嘅簽名
二十圓($20) 藍色 太平山頂/凌霄閣/1850年嘅香港
五十圓($50) 綠色 大嶼山鳳凰山/尖沙咀鐘樓香港文化中心/1890年嘅香港
一百圓($100) 紅色 青馬大橋/青馬大橋/1930年嘅香港
五百圓($500) 啡色 香港國際機場/香港國際機場/1970年嘅香港
一千圓($1000) 金色 香港會展/香港會展同維多利亞港/今日嘅香港

花名[編輯]

香港嘅紙幣都有各自嘅花名,但係來源已經無從稽考。下面詳細列咗呢啲花名出嚟:

紙幣面額 花名
10圓 青蟹(青色舊銀紙)/花蟹(新銀紙)
20圓 (唔清楚)
50圓 紫蟹(紫色舊銀紙)
100圓 紅衫魚(因為佢係紅色)
500圓 大牛(因為佢係啡色,用牛嚟比喻面額大)/棉胎(舊時500蚊紙好大張)
1000圓 金牛(因為佢係金黃色,用牛嚟比喻面額大)

港元嘅銀碼都有花名,好似一圓係「一文」(音「蚊」)、「一皮」;十圓係「一草」、「條」或「兜」;一百圓係「一嚿(水)」;一千圓係「叉」;一萬圓又叫「一皮」、「餅」或者「個」;一百萬圓係「球」。

$1(一圓) 一蚊雞
$10(十圓) 一草嘢 或者 一條嘢
$100(一百圓) 一嚿水
$1000(一千圓) 一叉嘢
$10000(一萬圓) 一皮嘢、一餅嘢 或者 一個
$100000(十萬圓) 十皮嘢、十餅嘢 或者 十個
$1000000(一百萬圓) 一球、一百粒
$10000000(一千萬元) 十球

睇埋[編輯]

出面網頁[編輯]

[編輯]

  1. ^ 粵語入面「斗零」係指五分。源自清末張之洞兩廣總督嗰陣喺廣州開鑄嘅「龍洋」銀圓,每壹圓重七錢二分,輔幣「五分」即係重三分六釐。廣州暗語入面以支辰代碼,一至九分別係:支、辰、斗、蘇、馬、零、候、裝、彎。「斗零」即三分六。