周藝強

周藝強係香港生意人，從事過玩具業，傳奇影業及娛樂集團負責人，因為同無綫電視之間嘅事蹟，得到香港人一啲關注。

事跡

2017年公開提出收購無線電視

喺2017年初，無線電視曾經公佈有意耗資大約42億元，以每股30.5元嘅價錢回購1.38億股公司股份，但突然間周藝強提出以每股35.075元嘅價錢收購TVB嘅29.9%股權（耗資約46億元），好似有意成為TVB嘅大股東。不過，電視廣播並唔接受呢個收購提議，佢哋認為對方冇足夠誠意，同埋質疑周藝強嘅傳奇影業及娛樂集團無資金嚟完成交易。TVB隨即反擊，宣布將回購股份嘅數目由原本嘅1.38億股調低至1.2億股，每股回購價由30.5港元大幅調高15%至35.075元，總代價維持喺42.09億元水平。有人認為TVB係為防止周藝強敵意收購。當時周藝強回應表示，佢哋收購TVB嘅股權並非敵意，同時指傳奇影業資金充足並有投資者參與交易。佢對於TVB當時打算用發債所得嘅資金回購股份而唔係擴展業務表示唔贊同，佢覺得對於小股東嚟講唔係一個理想方案，之後TLG同周藝強一方決定撤回收購嘅提議。

對無線電視作出公開批評、建議同埋舉報

自2022年起，佢因為組成「大台小股東大聯盟」批評無線電視各項企業管治問題，得到香港公眾一啲關注。

關於「埋堆堆」嘅指控

其中一項指控，係關於OTT平台APP「埋堆堆」嘅控股權同合法性問題。

2023年4月佢收到中國廣電總局嘅官方回覆，證實「埋堆堆」APP嘅開發者同供應商「廣州埋堆堆科技有限公司」冇擁有《信息網絡傳播視聽節目許可證》，而且「埋堆堆」APP亦冇喺全國網絡視聽平台嘅信息管理系統度填報資料。周藝強認為呢個證明TVB同附屬公司TVBC同埋廣州埋堆堆科技喺冇獲得牌照嘅情況下，喺國內涉嫌非法經營OTT平台APP「埋堆堆」（網上影音平台）。佢估計呢個APP曾經利用TVB嘅節目版權招收過600多萬個付費會員，訂閱費涉及數以億計。佢話大聯盟決定以實名舉報嘅形式向內地同香港有關執法部門舉報呢個事，同時寫信俾特首李家超，希望特首能敦促有關部門調查呢個事。

無線電視回應

無線電視回應傳媒嘅時候，堅定否認聯盟昨對公司同董事會嘅指控，話呢啲係誹謗。主席許濤指出公司一向重視股東意見，亦已經設立好完善嘅機制同渠道嚟收集意見。