太陽動力號

「太陽衝動計劃」一號機（HB-SIA）喺德國奪修多夫第一次試飛。

太陽衝動計劃（英文：Solar Impulse）係瑞士洛桑聯邦理工學院嘅一項太陽能飛機計劃。呢項計劃嘅最終目的係研製出一款可以環球飛行嘅太陽能固定翼飛機。呢項計劃嘅負責人係瑞士心理醫生同飛行專家伯特朗·皮卡（法文：Bertrand Piccard），同埋瑞士商人安德烈·博舒伯（德文：André Borschberg）。

一號機

計劃製造嘅第一部試驗機（簡稱「一號機」）係一架單座單翼機，最長滯空時間達到三十六個鐘。一號機嘅瑞士註冊編號HB-SIA。二零零九年十二月三號，一號機喺德國奪修多夫（德文：Düsseldorf）第一次試飛成功。二零一零年七月七號到八號，一號機第一次全日試飛成功，由瑞士披耶納（法文：Payerne）起飛，夜航長達九個鐘，最後成功返到披耶納。二零一一年，一號機喺巴黎航展亮相。二零一二年，一號機先後成功由瑞士飛到西班牙同埋摩洛哥。二零一三年，一號機由美國三藩市出發，途經鳳凰城、達拉斯、聖路易、辛辛那提、華盛頓特區，最後抵達紐約甘迺迪國際機場，完成飛越美國嘅壯舉。