孟買血

出自維基百科,自由嘅百科全書
跳去: 定向搵嘢

孟買血係人類其中一個血型。血型屬於罕見嘅孟買表現型嘅人,因為紅血球上冇H蛋白物質,所以冇A或B抗原。但佢哋嘅血清會產生對抗H物質嘅抗體,而H物質係孟買表現型以外,所有血型嘅紅血球都有嘅。所以,孟買表現型嘅人只可以接受相同血型嘅血。

由於孟買型血型非常罕有,而佢哋又唔可以接受其他血型,所以急需輸血嘅孟買型血型人好可能搵唔到捐血者。

表現血型係O型嘅人,有可能其實係孟買型血型。佢哋本來從第九對染色體遺傳到嘅A、B、O或AB其中一種ABO血型,但表現出嚟就係冇A或B抗原,就似係O型。噉係因為佢哋響另一個基因:第十九對染色體上嘅H基因裏面遺傳咗嘅一對隱性嘅等位基因(hh),所以唔會產生H蛋白。而當冇H蛋白,就A或B抗原都唔可以出現。

孟買型血型寫做Oh。雖然被寫成O,但呢個其實唔係真正嘅O型嘅一種。最初1952年孟買發現呢種血型嗰陣,係因為並唔係A,B或者AB型,先響檢測嗰陣搞錯咗,被誤以為係O型。響孟買型最多嘅孟買,呢類血型嘅出現頻率先至約莫係一萬分之一。華人出現孟買型嘅機會更少。