斑馬

出自維基百科,自由嘅百科全書
跳去: 定向搵嘢
en:Wikipedia:How to read a taxoboxHow to read a taxobox
斑馬
平原斑馬 (Equus quagga)
平原斑馬 (Equus quagga)
物種分類
界 (Regnum): 動物界
門 (Phylum): 脊索動物門
綱 (Classis): 哺乳綱
目 (ordo): 奇蹄目
科 (familia): 馬科
屬 (genus): 馬屬
亞屬 (Subgenus): 斑馬亞屬
斑驢亞屬

山斑馬Equus zebra
平原斑馬Equus quagga
細紋斑馬Equus grevyi

斑馬(Zebra),舊時廣東話叫虎斑馬,係非洲馬科動物,周身係黑白紋。隻隻斑馬嘅紋都唔同。一般嚟講斑馬係社會性動物,群體生活,群細嘅有一隻公帶幾隻,大嘅去到幾百隻一群。成年斑馬一般都有 2.3 高,企著膊頭高1.25到1.5米,大概 600 重倒,有啲重重過 820 斤。除咗斑紋之外,斑馬重有釘起嘅鬃毛。同佢哋嘅近親唔同,斑馬重未有真正馴養。

而家有三種斑馬:平原斑馬細紋斑馬同埋山斑馬。平原斑馬同山斑馬都係斑馬亞屬嘅動物,而細紋斑馬係斑驢亞屬嘅動物。細紋斑馬同驢屬有啲似;而平原斑馬同山斑馬就似馬多啲。之但係,DNA同分子生物學嘅數據就顯示,斑馬自己有自己嘅獨立起源。呢三挺斑馬都屬馬科。喺肯雅嘅一啲地區,平原斑馬經常同細紋斑馬喺埋一齊。

斑馬有獨特嘅斑紋同行為習性。各種棲息地,好似草場、熱帶草原、林地、低矮嘅帶刺灌木叢林、山上同埋海邊低山,都可以睇到佢哋。之不過,一啲人為因素,特別係偷獵剝皮同棲息地破壞,好大程度上影響緊斑馬嘅數目。細紋斑馬同山斑馬經已瀕危。得平原斑馬重有健康嘅種群數目。斑驢(又叫做白氏斑馬)經已喺19世紀絕咗種。

分類學同進化[編輯]

斑馬係四百萬年前嘅原馬進化開出嘅第二個叉,驢係第一個。細紋斑馬可能係出現最早嘅斑馬。響美國愛達荷州克文克文化石床國家博物館處發現有史前馬科動物嘅化石。呢挺史前馬叫做「克文馬」,拉丁名叫「Equus simplicidens」。佢體態壯實似斑馬,骨骼短窄似驢[1],成個身形可能較似細紋斑馬。細紋斑馬嘅骨架亦都似驢。克文馬亦都叫做美洲斑馬或者克文斑馬。

[編輯]

波茨華拿嘅斑馬

而家得三挺唔同嘅斑馬,重有啲唔同嘅亞種。斑馬數目變化好大。有幾挺亞種嘅分類學地位間嘅關係幾出名吓。

家下最多最經常睇得到嘅係平原斑馬(拉丁名 Equus quagga,舊名 Equus burchelli)。佢有十二個亞種,喺南非東非都大把。呢挺斑馬,特別係佢嘅亞種,經常畀人叫做「普通斑馬」、「布車氏斑馬(Burchell's Zebra)」(其實布車氏斑馬係平原斑馬嘅一挺亞種嚟嘅)、「輯文氏斑馬(Chapman's Zebra)」、「華北氏斑馬(Wahlberg's Zebra)」、「社路氏斑馬(Selous' Zebra)」、「格蘭特氏斑馬(Grant's Zebra)」、「波暗氏斑馬(Boehm's Zebra)」或者「白氏斑馬(Quagga)」(其實係另外一挺斑馬亞種,拉丁名 Equus quagga quagga)。

南非嘅山斑馬(Equus zebra)有較平原斑馬滑嘅皮,白色嘅肚,較窄嘅紋。呢挺斑馬有兩挺亞種,都係瀕危種。

細紋斑馬(Equus grevyi)係家下身形最大嘅斑馬種。佢哋身長頭窄,有少少似驢。呢挺斑馬響埃塞俄比亞同北部肯雅嘅半乾草原度先至有。細紋斑馬係而家數目最少嘅斑馬,經已瀕危。

呢幾挺唔同種嘅斑馬嘅分布區可能會疊埋一齊,之但係佢哋不溜都唔會自然雜交撈亂晒「種族」。白氏斑馬同平原斑馬車氏亞種響自然狀態一直都喼住噉樣嘅關係。圂埋一齊就唔同喇。圂著嘅平原斑馬同山斑馬會雜交,混血駒下爬冇贅肉,佢哋除咗大大隻嘅耳仔同後半身個樣唔同之外,身款似足平原斑馬。公嘅細紋斑馬同乸嘅山斑馬雜交,流產機會率好大。

種嘅劃分[編輯]

肯雅嘅細紋斑馬
落杉磯動物園嘅斑馬

身體特徵[編輯]

[編輯]

斑馬查實係黑色皮膚嘅動物,啲白紋,重有個肚度嘅白色斑點都係攞嚟扮嘢呃佢哋啲天敵用嘅[2]。有啲斑馬響黑白紋中間重有啡色嘅「陰影紋」。

點解話佢查實係黑皮膚帶白色紋嘅動物而唔係白色皮膚帶黑紋嘅動物呢?一係,白色嘅馬科動物喺非洲平原同森林度好難生存;二,絕咗種嘅斑驢前半身有黑白紋,而成個後半身都係黑色嘅;三,斑馬皮膚色素帶中間嘅地方闊過頭嘅話,細嘅紋就會出現,好似抑制弱化咗噉[3]。有啲斑馬成個肚同四隻腳都係純白色嘅,不過唔可以攞呢啲斑馬嚟做證據話斑馬係白皮帶黑紋嘅動物。因為好多唔同顏色嘅動物都有白色或者淺色嘅肚同腳。

斑馬皮

啲紋喺頭、頸、前半身,重有第處,都係豎直嘅,後半身同腳嘅紋係橫嘅。「斑馬線」就係因為似斑馬啲黑白紋先至噉樣嗌嘅。

有啲動物學家話斑馬嘅紋係扮嘢呃天敵用嘅,即係話有偽裝作用。首先,豎直嘅紋有助斑馬匿喺草叢入便。斑馬嘅主要天敵,獅子,係色盲嚟嘅。佢哋睇草叢,唔係黑就係白嘅豎直嘅嘢。而斑馬企響度唔喐,佢哋一眼睇落去,冚嘭唥差唔多,幾難睇到係咪有斑馬響度。理論上嚟講,隻斑馬企響草叢入便唔喐,差唔多冚嘭唥嘅獅子都係睇佢哋唔到嘅。重有,啲紋,一大群斑馬係埋一處係噉行係噉喐嗰陣,連埋一齊,睇落去好似係好大隻嘅動物噉,啲獅子好難去攻擊去捉其中一隻斑馬[4]。一大群斑馬四圍散開避過天敵嗰陣,佢哋嘅天敵睇到嘅淨係四面八方好多好多黑白紋係噉喐係噉喐,好難搵到單獨嘅一隻嚟攻擊,雖然而家動物學家重未有發現啲獅子會俾斑馬嘅黑白紋整懵。

啲紋亦可能有吸引異性關注嘅作用。隻隻斑馬嘅紋都有少少唔同,噉樣佢哋就可以識別邊個係邊個。

新啲嘅有實驗支持嘅理論假設話,分開嘅色係有效迷惑吸血採採蠅視覺嘅方法[5]。重有一挺理論話,斑馬嘅紋同紋下底嘅脂肪有溫度調節嘅功能,重有,受過傷嘅斑馬啲紋嘅條理可能會亂,佢哋揀「老公」或者「老婆」嗰陣,睇潛在配偶嘅紋可以判斷對方嘅健康情況。

行緊嘅斑馬

步態[編輯]

馬面特寫

同馬差唔多,斑馬亦都識行,識細步走,識慢走同快速走。速度嚟講慢過馬少少,之但係佢哋耐力犀利,啲想捉佢嚟食嘅猛獸好難追到佢哋。俾第啲動物追趕嗰陣斑馬經常霎時轉彎令到敵手好難捉到佢哋。逼到絕路冇埞去嗰陣佢哋就會猛噉飆起,又踢又咬。

感覺[編輯]

斑馬視力好好。佢哋可以睇到顏色,唔係色盲。同第啲有蹄動物一樣,斑馬嘅眼亦都生係個頭嘅兩側,睇嘢視覺闊。佢哋晚黑重睇到嘢,雖然夜視能力冇啲肉食動物咁犀利。好彩佢哋耳仔聽嘢都幾犀利吓,可以補償對眼嘅夜視弱點,唔會喺晚黑咁易俾啲肉食動物捉到。

斑馬耳仔聽嘢能力都好犀利。佢哋耳仔大過馬,環繞聽覺亦都勁過馬好多。同第啲有蹄動物一樣樣,佢哋對耳仔可以轉向任意方向。除咗視力同聽覺,佢哋嘅味覺同嗅覺亦都非常之好。

生態同行為[編輯]

一公多乸[編輯]

坦桑尼亞嘅斑馬

斑馬係高度社群性嘅動物。唔同嘅種社會構成亦唔同。平原斑馬同山斑馬有「家庭」結構,每「一家」都有一隻公嘅「種馬」,幾隻乸(至多六隻),重有佢哋嘅仔女,一齊生活。啲「獨身」嘅「男仔」唔係自己單獨生活,就係同第啲同佢一樣嘅「佬」一齊,直到佢哋大個咗,有能力去挑戰嗰啲有「家室」嘅種馬,搶幾隻乸過嚟做「老婆」。「一家」斑馬俾好多土狼或者野狗攻擊嗰陣,啲成年斑馬會四圍圍個圈,啲「細路」圍響中間,而當家嘅種馬會試圖保護佢啲「老婆仔女」。

細紋斑馬唔同第啲斑馬,佢哋冇固定嘅社會關係。呢挺斑馬好少係埋一齊超過幾個月。成年嘅「佬」自己獨居,而「細路」就跟著佢哋「媽咪」。不過同上便講嘅嗰兩挺斑馬一樣,啲獨身「佬」亦都會組織「家庭」,不過關係冇咁固定。

斑馬企住瞓。同第啲斑馬企埋一齊,有第啲斑馬「睇水」,佢哋先至會瞓安樂覺。馬都係噉樣嘅。

聯絡[編輯]

斑馬用高音嘅吠聲同嘶聲嚟聯絡。細紋斑馬嘅叫聲好似驢。睇佢哋嘅耳仔就知佢哋嘅心情。心情平靜、緊張亦或溫和友善嗰陣,佢哋耳仔直起。驚嗰陣耳仔向前,嬲就向後。睇緊四圍有冇天敵嗰陣,佢哋企個款似乎要發警報,耳仔直起,頭顎高,對眼係噉睇著四圍。緊張嘅話佢哋個鼻亦會噴氣。睇到有天敵,佢哋就會大聲叫(吠或者嘶)。

達拉斯動物園Dallas Zoo嘅斑馬

食物同飼料[編輯]

係人都知,斑馬食草。好多嘢都啱佢哋口味,似乎佢哋對食嘅嘢要求好低。除咗草之外,灌木、藥草、細樹支、樹葉甚至乎樹皮佢哋都食。適應能力咁強嘅消化系統,令到佢哋可以響低營養條件下便生存,噉樣嘅條件第啲草食動物一般都唔掂。

繁殖[編輯]

同第啲動物差唔多,斑馬亦都係乸嘅比公嘅成熟早,三歲就可以生第一胎。而公嘅要都五六歲先至有繁殖能力。乸可以一年一胎。駒出世之後跟著乸一年。同馬一樣,斑馬出世冇幾耐就識企識行識飲奶。啱啱出世嘅駒紋係棕色白色間隔嘅,唔似大嘅斑馬黑白間隔。

山斑馬同平原斑馬嘅駒由佢哋嘅媽咪、頭馬同埋同一個群嘅第啲馬乸一齊保護,而細紋斑馬嘅駒就通常只係由佢哋自己嘅媽咪保護,因為細紋斑馬嘅群會喺繁殖季節過咗幾個月即刻解散。

人類影響[編輯]

馴養[編輯]

Rothschild勳爵同佢用馴養斑馬(Equus burchelli)拉嘅馬車。佢經常坐斑馬馬車喺倫敦街頭行。

斑馬抵抗非洲疾病嘅能力強過馬,於是乎啲人就試圖馴養斑馬嚟代替馬。之但係大多數噉樣嘅嘗試都失敗咗,因為斑馬天性較難預料,緊張嗰陣好易著驚。斑馬同驢、馬嘅雜交後代較純種嘅斑馬適合馴養。

英國嘅動物博物學家華爾特·羅斯差爾特勳爵經常用斑馬嚟拉馬車。1907年,肯雅奈羅比嘅第一個醫生羅臣多·李比羅日常騎斑馬,代替咗要用到嘅馬。19世紀中葉紐西蘭總督佐治·格黎從佢之前任職嘅南非將斑馬引入到紐西蘭,重響佢私人小島卡華烏島上便用啲斑馬嚟拉馬車添。

東非,匹俾人騎緊嘅馴服斑馬。

何禮士·兮爾士船長喺佢本《馬嘅特點》(大概1893年倒)度比較咗各種唔同品種斑馬。1891年,兮爾士兩日就成功馴服咗隻成年原種山斑馬。隻斑馬溫順安靜,佢老婆都騎到上去,重影埋相添。佢發現布車氏斑馬較易馴服,重唔驚採採蠅咬,係較為理想嘅可馴養品種。佢話白氏斑馬好適合馴養,因為呢挺斑馬好易訓練到可以裝馬鞍同第啲馬具[6]

保護[編輯]

人好大程度影響緊斑馬嘅數目。而家重有人獵殺斑馬,唔係為咗食佢哋嘅肉,淨係剝佢哋嘅皮攞去賣。1930年代嗰陣,海角山斑馬掙啲絕種,全世界加埋都唔超過100隻。後尾數目增加到700隻,多得及時保護。野生嘅山斑馬而家多數都喺國家保護區入邊,不過重係有人去偷獵,重係瀕危動物。細紋斑馬亦都瀕危。偷獵、同家畜嘅競爭,都令到佢哋嘅數目變少。群體數目少,一有環境災難,好似乾旱,好易就會影響到佢哋成個種嘅安危。平原斑馬好彩啲,「馬口」多,有健康嘅群體數目。不過佢哋一樣有人偷獵,重有農業耕作,亦都影響緊佢哋嘅棲息地。一挺叫做「斑驢」嘅亞種,經已絕咗種。

文化[編輯]

Ludolphus 畫嘅斑馬插圖

非洲有啲民間古仔有講斑馬點解周身斑紋。當中一個納米比亞布士文嘅古仔話,之前冚嘭唥斑馬都係白色嘅,後尾同一隻狒狒響水氹入便打咗一交;斑馬猛噉踢狒狒,卒之跌落火堆,著緊火嘅樹枝燒燶咗斑馬嘅皮,留低黑色嘅斑,於是乎斑馬就有咗斑紋[7]。喺《幻想曲》呢部電影入便,半人馬上半身人下半身斑馬,同我哋經常描畫嘅上半身人下半身馬嘅形象唔同[8]

好多藝術亦都用斑馬嚟做主題[9]莫臥兒帝國嘅第四個皇帝查行亞(Jahângîr,1605~1624年在位)叫烏司達·萬舍畫咗一幅斑馬圖[10]。好多人都鍾意用斑馬嘅紋飾嚟做傢俬地幨時裝裝飾。電影入便嘅斑馬性格各樣,亦都有明星角色,好似《馬達加斯加》同《斑紋大賽》入便嘅斑馬角色。有啲人拜斑馬做「福神」。斑馬亦都係生產同合作嘅象徵(好似斑馬科技呢啲)。波茨華拿國徽上便亦都有斑馬圖案。

引用[編輯]

  1. Hunt, Kathleen. 馬嘅進化史. TalkOrigins Archive. 1995-01-04. 喺2008-10-10搵到;. 
  2. Gould, S. J. (1983) 《雞嘅脷,馬嘅腳趾:自然歷史嘅深層思考》,紐約: W. W. Norton and Company.
  3. Wingert, June M. 《斑馬係白皮黑紋動問定係黑皮白紋嘅動物?》. MadSci 網絡. 1999-11-05. 喺2008-10-10搵到;. 
  4. 《斑馬點樣用佢哋嘅紋嚟做偽裝?》. How Stuff Works. . 喺2006-11-13搵到;. 
  5. Waage, J. K. (1981). 《點解斑馬會有紋:吸血烏蠅嚮斑馬進化過程當中扮演選擇者嘅角色》。 J. Entom. Soc. 南非. 44: 351 - 358.
  6. 何禮士·兮爾士船長(1893), 《馬嘅特點》, 頁311-316, 倫敦: W. Thacker
  7. 點解斑馬會有紋. 非洲路(Gateway Africa). . 喺2008-10-10搵到;. 
  8. 添、德士. 幻想曲 (1940). 添同德士(Tim Dirks). . 喺2008-10-10搵到;. 
  9. 斑馬藝術. 藝術保護. . 喺2008-10-10搵到;. 
  10. Cohen, M.J. John Major, Simon Schama (2004), 《歷史語錄:5000年世界歷史嘅沉思》,第146頁, Sterling出版有限公司, ISBN 0-304-35387-6
  • Estes, R. (1991). 《非洲動物嘅行為:包括有蹄動物、肉食動物同埋靈長類》:落杉磯,加州大學出版社。
  • McClintock, Dorcas. 《斑馬嘅自然史》:1976年9月,Scribner's,紐約。ISBN 0-684-14621-5
  • Churcher, C.S. 1993. 《哺乳動物》第453號,《美國動物學家學會》

睇吓[編輯]

連結[編輯]