社會民主黨 (日本)

社會民主黨（日語：しゃかいみんしゅとう），簡稱社民黨，係日本一個左翼政黨。前身係日本戰後嘅萬年在野黨社會黨。

歷史

1996年1月，社會黨黨員大會決定改名做社會民主黨。不過社民黨一開局情況已經唔好，由創黨開始到10月嘅眾議院選舉，社民黨已經走咗超過一半嘅議員，大部分議員都過檔民主黨，連工會支持勢力都開始投向民主黨，原因係社民黨仍然堅持同自民黨聯合執政。10月嘅選舉，社民黨再由選前30席跌到15席。

1998年，社民黨退出執政聯盟。社民黨之後要到2009年先至同民主黨、國民新黨、新黨日本重新上台。僅僅1年之後，社民黨因為同民主黨喺美軍普天間基地問題上有分岐，社民黨就退出執政聯盟。

近年嚟因為黨員老化同親中、親北韓嘅政見，社民黨黨勢一日不如一日。喺吉田忠智做黨代表嗰陣，佢提議過社民黨同當時嘅民進黨合併，不過因為黨內保守派（好似舊黨代表福島瑞穗）反對而作罷。

喺第48屆日本眾議院議員總選舉，社民黨喺比例區嘅得票第一次跌破2%嘅關口，唔符合日本訂落嚟嘅政黨條件，從而影響政黨補助，呢次選舉進一步打擊社民黨嘅財政來源，點不知喺之後嘅第24屆日本參議院議員通常選舉，社民黨又攞返起碼2%嘅得票。

2019年尾，日本嘅自由派在野黨開始討論緊合併嘅事，當時嘅社民黨嘅黨首又市征治都表示支持，社民黨更加停咗本來喺2020年1月搞嘅黨首選舉。但係到2020嘅1月尾，由於當時嘅國民民主黨同立憲民主黨傾唔埋欄，在野黨合併嘅計劃暫時擱置，結果社民黨要重啟黨首選舉，由福島瑞穗重返黨首位置。福島對於在野黨合併嘅立場同又市唔同，佢唔多支持同其他在野黨合併。到咗9月，新嘅立憲民主黨終於成立，福島對於同新黨合併態度保守，但係另外三個國會議員就贊成社民黨同立民黨合併，而沖繩、大分、東京支部亦都傾向合併。到咗11月14號，社民黨開咗特別代表大會，最後容許想加入立民黨嘅議員離開社民黨，最後四個國會議員當中，得返福島瑞穗留喺社民黨，不過支持合併嘅照屋寬德後嚟縮沙，另外兩個議員就喺12月尾正式加入立民黨。

優勢地區

近年嚟，社民黨一路萎縮，依家嘅票倉主要集中喺九州嘅大分縣同埋沖繩縣，社民黨喺呢兩個縣有起碼10%得票。

選舉成績

眾議院

選舉	領袖	票數	得票率	比例區票數	得票率	議席	結果
1996	土井多賀子	1,240,649	2.19%	3,547,240	6.38%	15 / 500	執政聯盟成員（96-98）
							反對黨
2000	土井多賀子	2,315,235	3.80%	5,603,680	9.36%	19 / 480	反對黨
2003	土井多賀子	1,708,672	2.87%	3,027,390	5.12%	6 / 480	反對黨
2005	福島瑞穗	996,007	1.46%	3,719,522	5.49%	7 / 480	反對黨
2009	福島瑞穗	1,376,739	1.95%	3,006,160	4.27%	7 / 480	執政聯盟成員（09-10）
							反對黨（10-12）
2012	福島瑞穗	451,762	0.76%	1,420,790	2.36%	2 / 480	反對黨
2014	吉田忠智	419,347	0.79%	1,314,441	2.46%	2 / 475	反對黨
2017	吉田忠智	634,719	1.15%	941,324	1.69%	2 / 465	反對黨
2021	福島瑞穗	313,193	0.55%	1,018,588	1.77%	1 / 465	反對黨
2024	福島瑞穗					1 / 465