空軍十字勳章 (美國)

空軍十字勳章個樣

空軍十字勳章（英文：Air Force Cross），係美國空軍成員可以被授予嘅第二高等級嘅勳章。空軍十字勳章係授予嗰尐響打仗嘅時候作出極度英勇嘅行為，但係又不足以頒發榮譽勳章嘅任何美國空軍人員。空軍十字勳章相當於美國陸軍嘅傑出服役十字勳章同海軍嘅海軍十字勳章。

史

空軍十字勳章原本叫做「傑出服役十字勳章」，同陸軍嘅傑出服役十字勳章同名，響1947年美國空軍成為咗獨立軍種之後被提議設立，由埃莉諾·考克斯設計，美國國防部紋章研究所嘅托馬斯·哈德遜·瓊斯製作。1960年7月6號，美國國會通過法案，正式設立呢個勳章，又將個名改做「空軍十字勳章」，以表明勳章屬於美國空軍嘅。

第一枚空軍十字勳章係追授畀響古巴導彈危機中陣亡嘅U-2駕駛員魯道夫·安德森少校，以表彰佢嘅英勇行為。

去到2008年4月，美軍一共授予192枚空軍十字勳章畀187個軍人。響第二次世界大戰嘅時候追授咗兩枚，越南戰爭中授予咗180枚，1975年嘅馬亞圭斯號事件授予4枚。1991年海灣戰爭授予兩枚，1993年索馬里摩加迪沙之戰授予一枚，2003年響阿富汗嘅巨蟒行動之後授予咗兩枚。

外觀

空軍十字勳章主體係一個光澤嘅銅製十字，響十字嘅正面係一隻喺雲上嘅美國國鳥白頭海鵰，同美國空軍紋章嘅設計相同，外圍由綠色琺琅整、邊緣鑲金嘅月桂花環環繞。勳章嘅背面留空，每枚授出嘅空軍十字勳章都會刻上被授予者個名。

綬帶中部係布列塔尼藍色，邊緣係白色同紅色嘅條帶；綬帶嘅式樣幾乎同陸軍嘅傑出服役十字勳章相同，只係中央條帶換咗做比較淺嘅顏色，以表明兩種勳章之間嘅相似性。如果一個人多次獲頒嘅話，綬帶上面會加佩橡葉束做裝飾。