第11屆中華民國立法委員選舉民進黨初選提名作業

.就第11屆中華民國立法委員選舉，民主進步黨嘅初選同提名作業喺2023年初開始，其中14個選舉區喺協調上未能達成共識而需要進行初選，而初選嘅競爭亦引起一啲關注。

時序表

• 3月20號至3月24號：立委初選領表登記。
• 4月11號：協調結束，有14個選區超過一個人登記。
• 4月12號：中執會審查初選登記參選人資格並就民調進行抽籤作業。
• 4月17號至4月23號：台北市第二選舉區、台北市第七選舉區、新北市第一選舉區、桃園市第四選舉區、台中市第六選舉區、嘉義市選舉區、屏東縣第一選舉區、台東縣選舉區進行電話民調。
• 4月24號至4月30號：新北市第三選舉區、新北市第四選舉區、台南市第一選舉區、桃園市第一選舉區、桃園市第五選舉區、基隆市選舉區、台南市第一選舉區進行電話民調。

區域暨原住民選舉

基隆市選舉區

喺基隆市選舉區，市議員張秉鈞、張之豪、鄭文婷三人競逐出線，最終張秉鈞出線。

候選人	性別	民調成績	備註	出線標記
張之豪	男	0.1306
張秉鈞	男	0.1744		Y
鄭文婷	女	0.1688

台北市第二選舉區

喺台北市第二選舉區，台北市議員王世堅對上現任立委何志偉。其中王世堅喺3月20號喺多位英系議員洪健益、林世宗、劉耀仁、張文潔、吳沛憶同埋在地里長陪同下，前往台北市黨部進行登記。但之後雙方指控互相指控對方抹黑，甚至傳出要黨主席賴清德調停。

台北市第四選舉區

喺台北市第四選舉區，民進黨現任立委高嘉瑜喺黨內並未有面對競爭，但由於高嘉瑜喺黨內同一啲其他人嘅爭議，令佢未得到黨內一啲人嘅支持，有啲綠營側翼甚至對佢作出攻擊。另一方面，同屬綠營嘅基進黨台北市黨部主委吳欣岱表明有意挑戰呢個選區，其中喺4月8日，吳欣岱嘅服務處開幕茶會入面，陳時中、徐國勇、姚文智都有到場出席，徐國勇更當場表態支持吳欣岱選立委。高嘉瑜之後表示，願意根據民調作出決定，以防止藍營被保送攞到呢個議席。

台北市第七選舉區

喺台北市第七選區，兩名台北市議員對決，分別係許淑華同埋洪健益。

台中市第六選舉區

喺台中市第六選區，市議員江肇國、黃守達、前市議員何敏誠嘅仔何昆霖登記參選，分別代表「正國會」、「新潮流」同埋「何家班」參與初選，形成三強爭霸局面。其中黃守達得到前老闆兼黨友立委吳思瑤嘅支持，江肇國就得到黨友市議員陳雅惠支持，而何昆霖就得到23位東南區與西區里長力挺。不過，初選期間就傳出可能代表國民黨參選立委嘅市議員羅廷瑋表態支持何昆霖，引發爭議。黃守達抨擊羅為咗蹭聲量蹭到民進黨初選，將民主當笑話；何昆霖就感謝羅相挺、強調定「不負眾望」。

新北市第一選舉區

喺新北市第一選舉區，前市議員何博文對上助理教授彭莉惠。

新北市第三選舉區

喺新北市第三選舉區，前市議員李坤城、市議員李余典、彭佳芸三人競逐出線。

新北市第四選舉區

喺新北市第四選舉區，現任立委吳秉叡被醫師許文琪挑戰。

桃園市第一選舉區

喺桃園市第一選舉區，現任立委鄭運鵬被前市議員郭麗華同埋桃園航空城前董事長黃適卓挑戰。其中黃適卓表示，覺得鄭運鵬應該可以擔任不分區立委，但就相信過程會係良性競爭。

桃園市第五選舉區

喺桃園市第五選舉區，市議員劉仁照同埋楊家俍二人競逐出線。

彰化縣第二選舉區

彰化縣黨部主委邱建富喺3月19號宣布參與初選，挑戰現任立委、同屬正國會派系嘅黃秀芳。但之後總統府秘書長林佳龍多次協調，邱建富宣佈唔參與初選，外間就指佢將會接任同國營事業相關嘅職位。

嘉義市選舉區

喺嘉義市選舉區，現任立委王美惠面對嘉義市議員黃露慧同埋前嘉義市議員凌子楚嘅挑戰。其中黃露慧、王美惠兩個人嘅駁火得到唔少傳媒嘅報導。其中黃露慧表明覺得王美惠唔適任，王美惠就反駁適唔適任唔係佢講就係。

5月22號，民進黨中央黨部公佈咗民調結果，王美惠得咗44.38%嘅支持率勝出，而黃露慧得20.40%，凌子楚得8.59%，無明確人選嘅有25.64%。

嘉義縣第一選舉區

喺嘉義縣第一選舉區，現任立委蔡易餘競逐連任，嘉義縣議員黃榮利一度話要挑戰蔡易餘，但去到4月7號同黨主席賴清德會面之後，宣佈退出初選。

嘉義縣第二選舉區

喺嘉義縣第二選舉區，現任立委陳明文放棄連任，交棒畀個仔陳冠廷。

台南市第一選舉區

喺台南市第一選舉區，前台南市觀旅局長郭貞慧，對上現任立委賴惠員。

屏東縣第一選舉區

喺屏東縣第一選舉區，鍾佳濱對上陳明達。

台東縣選舉區

喺台東縣選舉區，現任立委劉櫂豪被賴坤成挑戰，最後賴坤成挑戰成功，將會代表民進黨出戰。

睇埋

• 第11屆中華民國立法委員選舉國民黨初選提名作業