藤森特赦風波
藤森特赦風波係指秘魯前總統藤森被總統庫琴斯基特赦之後發生嘅一連串事件[1]。
背景[編輯]
2017年12月21號，涉及貪污指控嘅庫琴斯基月中面對藤森個女藤森慶子領導嘅反對黨人民力量黨發起彈劾動議，戲劇性噉，最後人民力量黨入面藤森個仔藤森健次領導嘅派系有十個議員最後投咗棄權票，令庫琴斯基避過落台一劫[1]。
2017年12月23號，七十九歲嘅藤森因為侵犯人權同貪污等罪名原本要服刑到九十三歲，但係佢因為血壓低同心跳唔正常緊急送院[1]。
2017年12月24號，秘魯總統庫琴斯基突然宣布以人道理由特赦藤森，外界質疑一切都係政治交易[1]。
後續[編輯]
2017年12月25號聖誕節，響秘魯首都利馬，數以百計民眾唔係同屋企人或朋友慶祝，而係上街示威，抗議前總統藤森攞到特赦。示威者舉起聲稱係藤森主政期間被殺嘅人啲相響市中心遊行，期間防暴警察阻止示威者前進，雙方衝突，警察施放催淚氣體驅散人群。全國多處亦有反對特赦藤森嘅示威，估計最少五千人上街。而藤森個仔健次響社交網絡發放片段，話好開心同爸爸一齊過一個自由嘅快樂聖誕[1]。而庫琴斯基政府內部亦好多不滿特赦藤森嘅聲音，消息話，副人權部長辭職以示抗議，三名執政黨議員亦退黨[1]。
2017年12月27號，攞到特赦嘅秘魯前總統藤森響社交網站發布影片，話對執政期間嘅所作所為感到後悔，請求人民原諒。又感謝總統庫琴斯基嘅特赦，話完全支持對方呼籲國家和解，暗示自己唔會再涉足政治[2]。
2018年1月18號晏晝，教宗方濟各去到秘魯首都利馬，除了會同庫琴斯基見面之外，亦會探吓土著，希望搵返重建受性醜聞拖累嘅教會聲譽，而秘魯總統庫琴斯基就希望藉住教宗嚟到令國家返翻和平同對話嘅軌道。不過響教宗到秘魯之前嘅幾粒鐘，南部有一間一百年歷史嘅小教堂遇襲，大門有燒過嘅痕迹[3]。
分析[編輯]
上任一年幾嘅庫琴斯基已經多次遇到反對派嘅彈劾壓力，民望又跌到唔夠兩成，特赦藤森將佢捲入新一場政治風暴，地位勢將會更加難保。有評論形容今次特赦係藤森家族內鬥同回朝戲碼嘅序幕，藤森家族嘅內鬥亦趨向白熱化。四十二歲嘅慶子兩次參選總統失敗，野心未減，相信佢會喺2021年再接再厲。37歲嘅健次近年亦轉趨高調，今次被視為阿爸獲釋嘅最大「功臣」，得到藤森支持者歡心，有利從政前路，係事件中嘅最大贏家[1]。