蛤𧊅

無尾目
綠雨濱蛙 - Litoria caerulea
物種分類
界 (Regnum): 動物界 Animalia 門 (Phylum): 脊索動物門 Chordata 綱 (Classis): 兩棲綱 Amphibia 目 (ordo): 無尾目 Anura
無尾目分布
亞目
始蛙亞目 Archaeobatrachia 中蛙亞目 Mesobatrachia 新蛙亞目 Neobatrachia

蛤𧊅（讀鴿拐），又叫蛤乸（讀鴿乸，gap³ naa²）、田鷄、蝦蟆、蛙等，係種動物。佢同蠄蟝都係無尾目下。不過佢唔似蠄蟝咁有粒粒，而係甚爲光滑，多喺水邊出沒，叻游水。識跳，亦會叫，蛤蛤聲。身多數濕軟，脷長，後腳強，跳得遠，叫得大聲。因為有唔少蛙都係青色，所以成日畀人叫青蛙，查實乜色都有，多數同自然環境接近。有一啲蛙有毒，好多色彩鮮艷，有警告食用動物嘅意味。

蛤𧊅脷長，會食蚊蟲。

名

蛤𧊅係總名。

蛤乸係大隻蛤𧊅。

田鷄係田度生嘅品種，可以食。又叫水鷄。佢同鷄一樣曉叫。

蝦蟆、又寫蝦蟇，俗寫蛤蟆。蛤係借字或相混。《說文》蝦，蝦蟆也。蟆，蝦蟆也。

蛙、古寫䵷、鼃，《說文》蝦蟇也。从黽圭聲。《說文解字注》話係蝦蟇屬。《周禮》寫蟈。漢時蛙同蝦蟆有別，不過有乜別就唔清楚。《漢書》武帝紀。元鼎五年。鼃、蝦蟆鬬。今下蛙多用於學術命名。

蛤、𧊅、蛙都來自佢嘅叫聲。

文

廣東話將蛤乸比喻成「着數」，例如「邊有咁大隻蛤乸隨街跳」，即係唔信有咁大嘅着數。

而台灣國語亦都比較常用「蛤」字當做一個驚訝音字嚟用，情況正如廣東話嘅「吓」一樣。